कलस्सी 1 - केवट नया कारारनमस्कार 1 हमे, पावल, यी चिट्ठी लिखैछियै जकरा येशू ख्रीष्टके चुन्ल आर भेज्ल चेला बनियै कहिके परमेश्वर इच्छा कैल्कै रहे। आर आपनसिके विश्वासी भ्या तिमोथीके तरफसे भी हमे यी लिखैछियै। 2 ख्रीष्टमे भेल कलस्से सहरके परमेश्वरके आदमीसब आर विश्वासयोग्य भ्या-बहिनसब, हमे प्रार्थना करैछियौ कि आपनसिके परमेश्वर पिता तोरासिके अनुग्रह आर शान्ति दौ। धन्यवाद 3 जब हमेसब तोरसिके लिए प्रार्थना करैछियै ते, हमेसब आपन प्रभु येशू ख्रीष्टके पिता यानिकी परमेश्वरके धन्यवाद चढाबैछियै। 4 कहिनेकी ख्रीष्ट येशूमे तोरसिके विश्वास आर सभे परमेश्वरके आदमीसिके प्रतिके तोरसिके प्रेमके विषयमे हमेसब सुन्लियै छे। 5 तोरसिके विश्वास आर प्रेम तोरसिके लिए स्वर्गमे राख्ल आशामे आधारित छौ। तुहेंसब यी विषयमे पहलहैसे सुन्लहैं रहे, जब आदमीसब पहेला तोरसिकेलगत ऐलौ आर तोरासिके येशू ख्रीष्टके बारेमे खुश-खबरी सुनैल्कौ, जे परमेश्वरके सच्चा सन्देश छै। 6 इहे खुश-खबरी जे तोरसिकेलगत ऐलौ पुरा संसारभर फैलैछै। आदमीसिके जीवन परिवर्तन करिके हरेक जगहमे फल फराबैछै, जेरंके तुहेंसब पहेला बेर सुन्ल आर परमेश्वरके अदभुद अनुग्रहके बारेमे सचके बुझैके समयसे तोरसिके जीवनमे परिवर्तन ऐल छौ। 7 इहे बातके शिक्षा तुहेंसब हमरसिके प्रिय विश्वासी भ्या इपाफ्राससे सिख्लहैं, जे हमरसिके संगे सेवा करैछै आर हमरसिके प्रतिनिधिके रुपमे ख्रीष्टके विश्वासयोग्य सेवक छै। 8 पवित्र आत्माद्वारा तोरसिके पैल प्रेमके विषयमे इपाफ्रास हमरासिके बतैल्कै। आत्मिक उन्नतिके लिए प्रार्थना 9 सेल्याके जे दिनसे हमेसब यी बात सुन्लियै छे, हमेसब सभे दिन तोरसिके लिए प्रार्थना करैछियै। हमेसब प्रार्थना करैछियै कि तुहेंसब सच्चेके जाने सक्हैं कि परमेश्वर तोरासिके कि करैले कहैछौ। उटा यी छै कि तुहेंसब बहुते बुद्धिमान हैभैं आर तुहेंसब आत्मिक बातसब बढियाँसे बुझ्भैं। 10 हमेसब यी भी प्रार्थना करैछियै कि तुहेंसब एरंके व्यवहार करे सक्हैं जेरंके प्रभुके आदमीसिके व्यवहार करे पडैछै आर तुहेंसब प्रभुके सभे बातमे खुश बनैभैं आर तुहेंसब निरन्तर सभे किसिमके उपयोगी कामसब कर्भैं। आर परमेश्वरके चिन्हैमे तुहेंसब बढ्ते जैभैं। 11 हमे प्रार्थना करैछियौ कि परमेश्वर आपन बडका शक्ति प्रयोग करिके तोरासिके बहुते मजगुत बनाबौ, ताकी तुहेंसब धीरजी आर आनन्दित भ्याके आपन दुःखसब सहे सक्हैं। 12 परमेश्वर पिताके धन्यवाद देते र, जे तोरासिके उटा उत्तराधिकारमे सामिल हुऐके योग्य बनैल्कौ छे जे ऊ आपन आदमीसिके लिए स्वर्गमे तैय्यार कैल्कै छे। 13 कहिनेकी ऊ अपनासिके शैतानके शक्तिसे छुटैल्कै छे आर आपन प्रिय बेटाके राज्यमे आनल्कै छे। 14 परमेश्वर अपनासिके ओकर बेटाके खूनद्वारा छुटकारा देल्कै छे आर आपनसिके पापसिके माफ कैल्कै छे। ख्रीष्टके महानता 15 कोय भी परमेश्वरके देखे नैसकैछै, मगर जब ओकर बेटा आदमी बन्लै, ऊ परमेश्वरके आदमीसिके बीचमे प्रकट कैल्कै आर ओकरसंगे परमेश्वरके द्वारा सृष्टि कैल सभे चीजपर सर्वोच्च अधिकार छै। 16 कहिनेकी जब परमेश्वर सभे चीज सृष्टि कैल्कै ऊ ख्रीष्टके द्वारा सृष्टि कैल्कै। ऊ चाहे आकाशके है या धर्तीपरके, दिखाई दिएवाला है या दिखाई नैदिएवाला, चाहे सिंहासनसब, चाहे प्रभुत्वसब, चाहे शासकसब, अधिकारसब है, सभे चीज ख्रीष्टके द्वारा आर ख्रीष्टके लिए ही बन्ल छै। 17 आर कोनो भी चीजके सृष्टि हुऐसे पहेलासे ही ख्रीष्ट रहै आर उहे ही सभे चीजसिके व्यवस्थित रुपमे काममे आने सकैछै। 18 उहे ही छै जे मण्डलीके उप्परमे सर्वोच्च छै, जे ओकर शरीर छै। उहे शुरुआत छै, आर उहे पहेला छै जे मर्लमेसे जिन्दा भेलै ताकी सभे बातमे ख्रीष्ट ही सर्वोच्च हुए सकै। 19 कहिनेकी परमेश्वर पिताके खुशी एक्रहैमे छै परमेश्वर आपन परिपूर्णतामे ख्रीष्टमे बास करैछै। 20 परमेश्वर आपन बेटाके भेजैके निर्णय कैल्कै, जे आपन खून बहैल्कै आर क्रूसमे मर्लै। परमेश्वर आपन आर सभे चीजसिके बीचमे मेल-मिलाप करैके लिए यी कैल्कै। एरंके, परमेश्वर ख्रीष्टके द्वारा आपन आर सभे चीजसिके बीचमे शान्ति स्थापित कैल्कै जे स्वर्गमे छै आर ऊ सभे कुछु जे धर्तीपर छै। 21 तुहेंसब कोनो समयमे परमेश्वरसे दूर रहैं आर आपन खराब कामके कारण आपन मनमे परमेश्वरके विरोधी रहैं। 22 परमेश्वर तोरासिके आपनसंगे मिलापमे आनैके लिए आपन बेटा ख्रीष्टके आदमी बन्याके क्रूसमे मरैले देल्कै ताकी ओकर समनामे तुहेंसब पवित्र, बेदाग आर दोषरहित हुए सक्हैं। 23 ख्रीष्टमे तोर विश्वास अटल जगमे बनैल घरके जुगुर मजगुत बना। आर तोरसिके सुन्ल खुश-खबरीके आशासे पाछु नैहट्। इहे खुश-खबरीके बारेमे आकाशके निच्चामे भेल सभैके प्रचार कैल गेलै आर हमे, पावल, इहे खुश-खबरी सुनाबेवाला सेवक भेलियै छे। मण्डलीके लिए पावलके मेहनत 24 आर आब हमे तोरसिके खातिर ख्रीष्टके तकलीफमे सामिल भेल छियै, कहिनेकी हमर शारीरिक तकलीफके कारण ख्रीष्टके शरीर, यानिकी मण्डलीके लिए आरहौ बाँकी रहेल ख्रीष्टके तकलीफ पुरा करैले हमे सहायता करैछियै। 25 परमेश्वर हमरा ओकर वचन पुरा तरिकासे तोरासिके बुझाबैके लिए चुनल्कै आर एकरे खातिर हमे मण्डलीके सेवक भेलियै छे। 26 यानिकी इहे रहस्यके प्रचार, जे युग-युगसे आर पिढीदर-पिढीसे गुप्त रहै, मगर आब परमेश्वरके आदमीसिके प्रकट कैल गेलै छे। 27 परमेश्वर आपन आदमीसिके लिए यी रहस्य प्रकट करैके निर्णय कैल्कै ताकी ऊसब जानी जै कि ओकर योजना, जे जात-जातके आदमीसिके लिए छै से कतनें अदभुद आर महिमामय छै। ऊ रहस्य खुद ख्रीष्ट ही छै, जे तोरासिमे छौ। आर उहे यी बातके आशाके आधार छै कि तुहेंसब परमेश्वरके महिमामे सहभागी हैभैं। 28 हमेसब सभे आदमीके ख्रीष्टके बारेमे सन्देश प्रचार करैछियै, आर परमेश्वरके देल बुद्धिसे सभे आदमीसिके चेतावनी आर शिक्षा दैछियै। ताकी जब ऊसब परमेश्वरके समनामे खडा हैतै, तब ऊसब ख्रीष्टमे परिपक्क भेल बात हमेसब पक्का करे सकियै। 29 ख्रीष्टके देल हमर भितरमे काम करेवाला अदभुद शक्तिसे ही हमे यी काम करैले एत्तेतक कठिन मेहनत करैछियै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation