चुन्ल आर भेज्ल चेलासब 6 - केवट नया कारार

सेवा करैके लिए सातटा आदमी चुन्ल गेलै

¹ उटा समयमे प्रभु येशूके चेलासिके संख्या बढ्ते जैते रहै। तब हिब्रू भाषा बोलेवाला यहूदी विश्वासीसिके विरोधमे यूनानी भाषा बोलेवाला यहूदी विश्वासीसब कुड-कुडाबे लाग्लै। हरेक दिन खाना-पिना या पैसा बाँटै बेरियाँ ओकरसिके मोसामातसिके वास्ता नैभेलै कहिके यूनानी भाषा बोलेवाला यहूदी विश्वासीसिके कहना रहै।

² तब बारहो चुन्ल आर भेज्ल चेलासब यरूशलेम सहरके दोसर विश्वासीसिके बोल्याके कहैल्कै, “हमेसब चुन्ल आर भेज्ल चेलासिके आपन समय परमेश्वरके वचन सिखाबैमे व्यतित करना चाही, नै कि खिलाबै-पिलाबैके सेवा करैमे।

³ सेल्याके विश्वासी भ्यासब, तोरसिके बीचसे सातटा आदमीसिके चुन जकर बारेमे सभैके यी मालुम छै कि ऊसब पवित्र आत्मा आर बुद्धिसे परिपूर्ण छै आर सभैसे आदर पैल छै, ताकी ओकरासिके यी कामके लिए हमेसब नियुक्त करियै।

⁴ आर हमेसब प्रार्थना, वचनके प्रचार आर शिक्षा दियैके सेवामे पुरा समय देबै।”

⁵ यी विचार समूहके सभैके बढियाँ लाग्लै। ऊसब पवित्र आत्मा आर विश्वाससे परिपूर्ण भेल स्तिफनस, फिलिप, प्रखरस, निकनोर, तीमोन, पर्मिनास, आर एन्टीओखियाके यहूदी मत मानेवाला निकोलाउसके चुनल्कै।

⁶ ऊसब यी आदमीसिके चुन्ल आर भेज्ल चेलासिके समनामे आनल्कै आर चुन्ल आर भेज्ल चेलासब प्रार्थना कैल्कै आर ओकरासिके जे कामके लिए चुनल्कै रहे उहे काम करैके लिए ओकरासिके नियुक्त कैल्कै।

⁷ एरंके परमेश्वरके वचन फैल्ले गेलै आर चेलासिके संख्या यरूशलेम सहरमे बहुते बढ्ते गेलै। आर बहुते यहूदी पुजारीसब भी येशू ख्रीष्टमे विश्वासके यी सन्देशके स्वीकार कैल्कै।

स्तिफनसके गिरफ्तारी

⁸ स्तिफनस अनुग्रह आर शक्तिसे परिपूर्ण भ्याके आदमीसिके बीचमे बडका-बडका चमत्कार आर चिन्हसब देखैल्कै।

⁹ मगर कुछु आदमीसब स्तिफनसके विरोध कैल्कै। ऊसब यहूदी आदमीसिके सभाघरके सदस्य रहै, जकरा गुलामी-मुक्त कहेल जैते रहै, ऊसब कुरेनी आर अलेक्जेण्ड्रिया सहरसिसे रहै आर किलिकिया प्रदेश आर एशिया प्रदेशसिसे भी रहै। ऊ सभेको मिलिके स्तिफनस संगे वाद-विवाद करे लाग्लै।

¹⁰ मगर ऊ जे कुछु भी कहैल्कै ऊसब ओकर बातके कोनो जबाब दिए नैसकल्कै, कहिनेकी पवित्र आत्मा ओकरा बहुते बुद्धिमानीसे बोलैमे सहायता कैल्कै।

¹¹ तब गुलामी-मुक्त आदमीसब गुप्तमे कुछु आदमीसिके स्तिफनसके विषयमे झुठ बोलैके लिए मनैते कहैल्कै, “हमेसब यी आदमीके मूसा आर परमेश्वरके विधि-विधानके विरुद्धमे अपमानके बात बोल्ते सुन्लियै छे।”

¹² ऊसब स्तिफनसके विरुद्धमे जनतासिके, यहूदी आदमीसिके अगुवा आर यहूदी धरमशास्त्रके पण्डितसिके भडकैल्कै, आर ऊसब आबिके स्तिफनसके पक्डीके यहूदी आदमीसिके महासभाके समनामे ल्यागेलै।

¹³ ओत्ते ऊसब झुट्ठा गवाह पेश कैल्कै जेसब स्तिफनसपर यी आरोप लगैते कहैल्कै, “यी आदमी पवित्रस्थान आर मूसाके विधि-विधानके विरोधमे अपमानवाला बात बोलैले नैछोडैछै।

¹⁴ कहिनेकी एकरा हमेसब एरं कहते सुन्लियै छे कि, ‘नासरत गाँवके निवासी येशू यी परमेश्वरके मन्दिरके ढाही देतै, आर मूसाद्वारा अपनासिके देल रिती-रिवाजके भी बदली करि देतै।’ ”

¹⁵ यहूदी आदमीसिके महासभामे बैठ्ल आदमीसब जब स्तिफनसके तरफ देखल्कै ते, देखल्कै कि ओकर चेहरा स्वर्गदूतके चेहरा जुगुर चमकते रहै।