२ थेसलोनिकी 3 - केवट नया कारारप्रार्थनाके अनुरोध 1 अन्तमे, हे विश्वासी भ्या-बहिनसब, हमरसिके लिए प्रार्थना कर कि हमेसब प्रभु येशू ख्रीष्टके विषयमे खुश-खबरी सभे जगहमे जल्दीसे फैलाबैले सकियै आर आदमीसब तोरसिके आदर कैल जुगुर आदर करे सकै। 2 आर प्रार्थना कर कि परमेश्वर हमरासिके बचाबै ताकी यी दुष्ट आदमीसब हमरासिके हानी करे नैसकै कहिनेकी प्रभु येशूके वचन सुनेवाला बहुते आदमीसब वचनमे विश्वास नैकरैछै। 3 मगर तुहेंसब प्रभुके पुरा रुपसे भरोसा करे सकैछैं। ऊ तोरासिके आत्मिक रुपसे मजगुत बनैतौ आर तोरासिके शैतानसे बचैतौ। 4 आर हमरासिके प्रभुमे तोरासिपर भरोसा छै कि हमेसब तोरासिके जे कुछु करैले कहैलियौ छे, तुहेंसब ओहिने करैछैं आर कर्ते रहभैं। 5 हमेसब प्रार्थना करैछियै कि प्रभु येशू ख्रीष्ट तोरासिके यी बुझैके योग्य बनाबौ कि परमेश्वर आपन आदमीसिके कतनें प्रेम करैछै आर जब आदमीसब ओकरा सतैल्कै रहे जेरंके ऊ खुद धीरज धारण कैल्कै ओहिने करिके तुहेंसब भी धीरज धारण कर। वचन पालन नैकरेवालाके चेतावनी 6 हे विश्वासी भ्या-बहिनसब, हमरसिके प्रभु येशू ख्रीष्टसे मिल्ल अधिकारसे हमेसब तोरासिके आज्ञा दैछियौ कि कोनो एरंको संगी विश्वासीसे संगत नैकर जे हमरसिके सिखैल शिक्षाके आज्ञापालन नैकरैछै। 7 कहिनेकी तोरासिके आपनहैं मालुम छौ कि जेरंके हमेसब जियैछियै ओहिने करिके तोरासिके जिये पडैछै। कहिनेकी जब हमेसब तोरसिके बीचमे रहते रहियै, हमेसब अस्कतिहा नैरहियै मगर काम कर्ते रहियै। 8 आर हमेसब फोकटमे ककरो खाना नैखैलियै। मगर हमरसिके जरुरत पुरा करैके लिए हमेसब तोरसिमेसे कक्रहौ पर निर्भर नैहइयै कहिके हमेसब दिनरात मेहनतके साथ खटीके काम कैलियै। 9 हमेसब कडा मेहनत यी कारणसे नैकरैछियै कि तोरासिसे सहायता पाना हमरसिके अधिकार नैछै मगर सेल्याके कि हमेसब खुदके तोरसिके समनामे आदर्श स्वभाव प्रस्तुत करियै आर तुहें हमरसिके उदाहरणमे अनुसरण कर। 10 आर जब हमेसब तोरसिके संगमे रहियै, हमेसब तोरासिके अक्सर कहते रहियौ: अगर कोय कोनो काम करैले इन्कार करैछै ते ओकरा खाना नैदिहैं। 11 हमेसब सुनैछियै, कि तोरसिमेसे कतनें झन कोढिया जीवन बिताबैछै। ऊसब अपना कोनो काम नैकरैछै, मगर दोसरके काममे बेकारमे दखल दैछै आर ओकरासिके काम करैसे रोकैछै। 12 एरंको आदमीसिके हमेसब हमरसिके प्रभु येशू ख्रीष्टसे मिल्ल अधिकारसे आज्ञा आर उपदेश दैछियै, कि ऊसब शान्तिपूर्वक आपन काम करिके जियैके लिए पैसा कमाबक। 13 हे विश्वासी भ्या-बहिनसब, जे चीज सही छै से करैके लिए थकित नैहु। 14 यी चिट्ठीमे हमरसिके देल आज्ञा अगर कोय पालन करैले इन्कार करैछै ते, ऊ के छै कहिके सभेको चिन। आर एरंको संगी विश्वासीसे संगत नैकर ताकी ऊसब लज्जित है। 15 तैय्योपर ओकरा दुश्मनके जुगुर व्यवहार नैकर मगर ओकरा सुधार, जेरंके तुहें आपन भ्याके सुधारैछैं। अन्तिम शुभकामना 16 हमे प्रार्थना करैछियै कि प्रभु जे शान्तिके स्रोत छै, ऊ सभे बातमे तोरासिके शान्ति दौ। हमे प्रार्थना करैछियै कि प्रभु सभे दिन तोरसिके संगे रहौ। 17 हमे, पावल चिट्ठीके यी भाग तोरासिके नमस्कार करैके लिए आपने हातसे लिखैछियौ। इहे तरिकासे हमे आपन सभे चिट्ठीके अन्तिम भाग लिखैछियै, ताकी सभैके मालुम हैतै कि चिट्ठी हमे लिख्लियै छे। 18 हमे प्रार्थना करैछियै कि आपनसिके प्रभु येशू ख्रीष्टके अनुग्रह तोरसिके सभैके संगे सभे दिन रहौ। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation