२ थेसलोनिकी 2 - केवट नया कारार

पापके आदमी यानिकी विनाशके बेटा

¹ हे विश्वासी भ्या-बहिनसब, आपनसिके प्रभु येशू ख्रीष्टके फेर वापस आबैके विषयमे आर फेर ओकरासे भेट करैके समयके विषयमे हमेसब तोरासिके कुछु लिखैले चाहैछियौ।

² यदि तुहेंसब प्रभु येशूके वापस आबैके दिन आबी गेलै छे कहिके सुन्भैं ते आपन मनमे आसानीसे निराश नैहइहैं या नैडरइहैं। यी हमे लिख्लियै छे कहिके कोय यी बात आत्मिक दर्शनमे या प्रकाशमे या कोनो चिट्ठीमे तोरासिके कहे सकैछौ।

³ कोय कोनो किसिमसे तोरासिके प्रभु आबैके विषयमे धोखा नैदौ। कहिनेकी प्रभु येशू वापस आबैसे पहेला एरंको समय ऐतै जब आदमीसब परमेश्वरके विरुद्धमे हैतै आर दुष्ट आदमी दिखाई पड्तै जकरा परमेश्वर जरुर ही नरकमे नाश कर्तै।

⁴ ऊ परमेश्वर आर दोसर सभे चीजसिके विरोध कर्तै जकरा आदमीसब आराधना करैछै आर ईश्वर कहैछै, आर ऊ दाबी कर्तै कि ऊ सभे चीजसे बेसी महत्वपूर्ण छै। ऊ दुष्ट आदमी परमेश्वरके मन्दिरमे बैठिके सभे आदमीके समनामे अपने आपके परमेश्वर कहतै।

⁵ हमे तोरसिके संगे रहै बेरियाँ तोरासिके अक्सर कहेल यी बातसब नैभुल।

⁶ एखनतक ऊ ख्रीष्ट विरोधी दिखाई नैदेल्कै छे कहिनेकी कोनो चीज ओकरा रोकैछै। जरुर ही तोरासिके मालुम छौ कि कोन बात ओकरा रोकैछै। सेल्याके, जब परमेश्वरके तय कैल समय ऐतै तब ऊ ख्रीष्ट विरोधी दिखाई पड्तै।

⁷ वास्तवमे, दुष्ट आदमीके शक्तिसब आदमीसिके पहलहैसे गुप्त रुपमे परमेश्वरके विधि-विधान अस्वीकार करैले लगाबैछै। मगर जे आदमीके परमेश्वरसे अलग करैले खोजैछै परमेश्वर ओकरा नैहटाबै तक ऊ उटा काम कर्तहैं रहैछै।

⁸ सेल्याके, जब ख्रीष्ट विरोधीके रोकेवाला चीजके हटैल जैतै तब येशू ख्रीष्ट दिखाई पड्तै। तब उटा ख्रीष्ट विरोधीके प्रभु येशू नाश करैके आदेश द्याके आर ओकर फेर वापस आबैके महिमा देख्याके शक्तिहीन बनैतै।

⁹ ऊ ख्रीष्ट विरोधीसंगे शैतानके शक्ति हैतै आर सभे किसिमके झुट्ठा चमत्कारसब, चिन्हसब आर अदभुत कामसब कर्तै जे आदमीसिके यी सोचैले लगैतै कि यीसब काम परमेश्वर करैछै।

¹⁰ ऊ आदमीसब जे निश्चित रुपसे परमेश्वरद्वारा नाश हुऐके लिए तोक्ल छै। ओकरासिके हरेक किसिमके दुष्ट कामसिके द्वारा धोखा देतै, कहिनेकी ऊसब ओकरासिके बचाबेवाला सचके विश्वास करैले अस्वीकार करैछै।

¹¹ सेल्याके परमेश्वर ओकरासिके धोखा देतै ताकी ऊसब झुट्ठा बात पर विश्वास करै।

¹² आर परमेश्वर ऊ सभे आदमीसिके दोषी ठहरैतै जेसब येशू ख्रीष्टके विषयमे सच्चा सन्देशपर विश्वास नैकरैछै मगर दुष्ट तरिकाके प्रेम करैछै।

दृढ बनिके र

¹³ हे विश्वासी भ्या-बहिनसब, एत्ते तोरसिके लिए परमेश्वरके समनामे हमरसिके सभे दिन धन्यवाद देना सही छै। तुहेंसब प्रभुके प्यारा छैं, कहिनेकी परमेश्वर संसारके सृष्टिके शुरुसे ही पवित्र आत्माद्वारा तोरासिके पापसे अलग करिके आर येशू ख्रीष्टके बारेमे सच्चा सन्देशमे विश्वास करैके कारण उद्धारके लिए चुनी लेल्कौ छे।

¹⁴ परमेश्वर हमरसिके प्रचार कैल खुश-खबरीके तोरासिके उद्धार पाबैके लिए प्रयोग कैल्कै ताकी आपनसिके प्रभु येशू ख्रीष्टके आदरमे तुहेंसब भी सामिल हुए सक्हैं।

¹⁵ सेल्याके विश्वासी भ्या-बहिनसब, मजगुत भ्याके खडा हु, आर हमेसब तोरसिके संगे व्यक्तिगत रुपमे आर चिट्ठीसिमे बात करैबेरियाँ देल शिक्षामे निरन्तर विश्वास कर।

¹⁶ हमेसब आपन प्रभु येशू ख्रीष्ट आर परमेश्वर पितासंगे प्रार्थना करैछियै जे अपनासिके प्रेम कैल्कै आर जे आपन अनुग्रहसे अपनासिके कहियो खतम नैहुएवाला उत्साह आर दृढ आशा देल्कै।

¹⁷ हमेसब यी भी प्रार्थना करैछियै कि आपनसिके प्रभु येशू ख्रीष्ट आर परमेश्वर पिता तोरसिके हृदयके साहाससे भरि दौ आर तोरासिके सभे दिन बढियाँ काम करैले आर सच बोलैके लिए मजगुत बनाबौ।