२ पत्रुस 3 - केवट नया कारार

प्रभुके फेर वापस आबैके दिन

¹ हे प्रिय विश्वासी भ्या-बहिनसब, हमे तोरासिके यी दोनो चिट्ठी इहे ल्याके लिख्लियौ छे ताकी जे बातसब तुहेंसब पहलहैसे जानैछैं, ओकर विषयमे तोरासिके याद दिलाबैके द्वारा हमे तोरसिके मनसिमे शुद्ध विचारसिके उत्पन्न करे सकियै।

² हमे एरं इहे ल्याके करैछियौ कहिनेकी हमे चाहैछियै कि तुहेंसब उटा वचनसिके याद राख, जे परमेश्वरके वक्तासब बहुते पहेला कहैल्कै रहे आर आपनसिके उद्धारकर्ता, प्रभु येशू ख्रीष्टके शिक्षासिके याद राख जे तोरासिके चुन्ल आर भेज्ल चेलासब देल्कौ जे तोरसिकेलगत ऐलौ रहे।

³ सबसे महत्वपूर्ण बात तोरासिके पता होना चाही कि ख्रीष्टके फेर वापस आबैसे पहेला अन्तिम दिनसिमे एरं आदमीसब हैतै जे तोरसिके मजाक उडैतौ कहिनेकी तुहेंसब विश्वास करैछैं कि ख्रीष्ट फेर वापस ऐतै। ऊसब आपन आदतके कारणसे खराब काम कर्तै जे ओकरासिके खुश करैछै।

⁴ आर ऊसब कहतै, “ओकर आबैके प्रतिज्ञा सच नैछै! ऊ कहियो भी नैऐतै!” जेसब शुरुआतमे आपनसिके अगुवासब रहै, ऊसब सभेको मरि गेलै छे, तैय्योपर भी कुछु भी नैबदल्लै छे। संसारके सृष्टि भेल समयसे चल्ल सभे चीज जेरं रहै ओहिने चलैछै।

⁵ ऊसब एरं कहतै कहिनेकी ऊसब यी बात भूलैले चाहैछै कि बहुते समय पहेला परमेश्वरके आज्ञासे आकाश आर धर्ती बन्लै रहे। ऊ धर्तीके पानीसे बाहार निकाल्लकै आर ओकरा पानीसे अलग करिदेल्कै।

⁶ इहे पानीके द्वारा परमेश्वर उटा संसारके नाश करिदेल्कै जे उटा समयमे अस्तित्वमे रहै। ऊ एकटा भारी बर्षा भेजल्कै आर एकर कारणसे धर्तीमे बाढ ऐलै आर सभे जिन्दा प्राणीसिके नाश करिदेल्कै।

⁷ जेरंके परमेश्वर धर्तीके सृष्टिके आज्ञा देल्कै रहे, ओहिने करिके ऊ आज्ञा देल्कै छे कि वर्तमान ब्रम्हाण्ड तबतक रहै जबतक परमेश्वर एकरा आगिनसे नै जर्या दै। परमेश्वर एकरासिके उटा दिनतक राखल्कै छे जब ऊ सभे आदमीसिके न्याय कर्तै आर ऊ आदमीसिके नाश करि देतै जेसब ओकर सम्मान नैकरैछै। तब परमेश्वर आकाश आर धर्तीके जर्या देतै।

⁸ हे प्रिय विश्वासी भ्या-बहिनसब, यी एकटा बातके कहियो नै भूल कि परमेश्वरके लिए एक दिन एक हजार सालके जुगुर छै आर एक हजार साल एक दिनके जुगुर छै। ओकर लिए एक दिन आर एक हजार साल सभे एक बराबर छै।

⁹ कुछु आदमीसब सोचैछै कि प्रभु आपन वापस आबैके प्रतिज्ञाके पुरा करैमे देरी करैछै। मगर प्रभु ओरंके देरी नैकरैछै। बल्की ऊ तोरसिके संगे धीरज धारण करैछै। कहिनेकी ऊ कक्रहौ नाश करैले नैचाहैछै। मगर सभेको पाप करैले छोडिके परमेश्वरके तरफ मन लगाबै आर गलत काम करना बन्द करिदै आर ओकरलगत आबी जै।

¹⁰ मगर ख्रीष्ट जरुर फेर वापस ऐतै। ऊ अचानक फेर वापस आबी जैतै, जेरंके रातके समयमे कोनो चोर अचानक ही आबी जैछै। उटा समय आकाशमे गर्जनके आवाज हैतै आर आकाश अलप भ्याजैतै। आकाशमे सभे कुछु यानिकी सुरुज, चान आर तारा पुरा तरहसे जरि जैतै। उटा दिन परमेश्वर उटा सभे कामसिके प्रकट करि देतै जे काम आदमीसब कैल्कै छे ताकी ऊ ओकरसिके न्याय करे सकै।

¹¹ जब कि परमेश्वर जरुर यी सभे चीजसिके नाश करि देतै, जेरं कि हमे एखन कहैलियौ छे, सेल्याके तोरासिके निश्चित रुपसे पवित्र आर ईश्वरीय तरिकासे व्यवहार करना चाही।

¹² जब कि तुहेंसब उटा दिनके इन्तजार करैछैं जब परमेश्वर संसारके न्याय करैके लिए ऐतै ते, उटा दिनके जल्दी आबैके लिए आपन तरफसे पुरा कोशिश कर। उटा दिन आगिन धधकीके उठ्तै आर आकाशके नाश करि देतै आर ओकर गर्मी आकाशमे सभे कुछु पघल्या देतै।

¹³ मगर अपना विश्वासीसब नया स्वर्ग आर नया धर्तीके इन्तजार करैछियै जकर परमेश्वर प्रतिज्ञा कैल्कै छे, जते हरेक जगहके आदमीसब परमेश्वरके इच्छाके मुताबिक रहतै।

प्रभुके दिनके लिए तैय्यार र

¹⁴ हे प्रिय विश्वासी भ्या-बहिनसब, परमेश्वर संसारके न्याय करैके दिनके तुहेंसब इन्तजार करैबेरियाँ तोरासिके पवित्र आर निष्खोट हुऐके लिए आर ओकरसंगे शान्तिमे रहैके लिए आपन तरफसे पुरा कोशिश करे पडैछै।

¹⁵ यी जानी ले कि आपनसिके प्रभु आपनसिके प्रति धीरज धारण करैछै, एकर कारण यी छै कि ऊ आदमीसिके पाप करैले छोडिके परमेश्वरके तरफ मन लगाबैके समय दियैले चाहैछै ताकी ऊ ओकरासिके बचाबे सकै। जब आपनसिके संगी-विश्वासी पावल, जकरासे अपनासब प्रेम करैछियै, तोरासिके उटा ज्ञानके प्रयोग कर्ते हुए लिखल्कै, जे परमेश्वर ओकरा देल्कै ते, ऊ भी तोरासिके इहे बातसब बतैल्कौ, जे हमे तोरासिके बतैलियौ छे।

¹⁶ आपन सभे चिट्ठीसिमे जे ऊ विश्वासीसिके लिखल्कै छे, ऊ इहे तरिकासे लिखैछै जे ऊ तोरासिके लिखल्कौ छे। मगर कुछु बातसब जे ऊ आपन चिट्ठीसिमे लिखल्कै छे, ओकरा समझना कठिन छै। जे आदमीसब बढियाँ शिक्षा नैपैल्कै छे आर जकरासिके निश्चय नैछै कि ऊसब कि विश्वास करैछै, ऊसब यी कठिन बातके मतलबके गलत तरिकासे व्याख्या करैछै, ओहिने ही जेरंके ऊसब धरमशास्त्रके दोसर भागसिके गलत व्याख्या करैछै। एरं करिके ऊसब खुद ही परमेश्वरके द्वारा आपन नाश हुऐके कारण बनैछै।

¹⁷ सेल्याके हे प्रिय विश्वासी भ्या-बहिनसब, तुहेंसब पहलहैसे जानैछैं कि यी बातसब हैतै। सेल्याके होशियार र, ताकी जे आदमीसब नियमसिके नैमानैछै ओकरसिके झुठसे धोखा नैखो। यदि तुहेंसब ओकरसिके अनुसरण करैछैं ते तुहेंसब उटा बात पर शंका करैले शुरु करि देभैं जकरापर तुहेंसब एक समय मजगुतीसे विश्वास कैल्हैं रहे।

¹⁸ मगर तोरासिके आपनसिके प्रभु आर उद्धारकर्ता येशू ख्रीष्टके अनुग्रहके आरहौ बेसीसे बेसी अनुभव करना चाही आर ओकर प्रति आपन समझमे बढना चाही। ओकर महिमा एखन आर सभे दिनके लिए हैते रहै। आमेन।