२ पत्रुस 2 - केवट नया कारार

झुट्ठा शिक्षकसब

¹ जेरंके बहुते पहेला गलत शिक्षासब सिखाबेवाला आदमीसब इस्राएलीसिके बीचमे दिखाई देल्कै रहे, ओहिने करिके ही तोरसिके बीचमे झुट्ठा शिक्षकसब दिखाई देतौ। ऊसब झुट्ठा शिक्षासिके गुप्त रुपसे फैल्या देतौ, जे बात आदमीसिके ख्रीष्टमे विश्वास करैसे रोकी देतै। यी झुट्ठा शिक्षकसब ख्रीष्टके आपन मालिक मानैसे भी इन्कार करि देतै आर जे ओकरासिके पापके शक्तिसे छुटकारा देल्कै छे। एरंके ऊसब अपने आपके अचानक नाश करैतै।

² परमेश्वरके बहुते आदमीसब यी शिक्षकसिके खराब कामसिके नक्कल कर्तै आर जे कुछु भी ऊसब करैछै ओकर कारण आदमीसब सच्चा रस्ताके विषयमे अपमान कर्तै।

³ यीसब लोभी हैतै आर ऊसब बन्ल बनैल कहानीसब सुन्याके तोरासिके धोखा देतौ ताकी तोरासिसे पैसा कमाबे सकै। परमेश्वर बहुते समय पहेला ही फैसला करि लेल्कै रहे कि ऊ ओकरासिके सजाय देतै आर ऊ एरं करैके लिए तैय्यार छै। परमेश्वर जरुर ओकरासिके नाश करि देतै।

⁴ तुहेंसब जानैछैं कि बहुते समय पहेला जब कुछु दूतसब परमेश्वरके आज्ञाके उलंघन कैल्कै ते, ऊ ओकरासिके सजाय देल्कै। ऊ ओकरासिके नरकमे फेकि देल्कै आर ओकरासिके न्याय आर सजाय दियैके दिनतक ओकरासिके उटा अनहार कैदमे राखल्कै छे।

⁵ तुहेंसब यी भी जानैछैं कि जब बहुते समय पहेला रहेवाला आदमीसब परमेश्वरके डर नैमानल्कै ते परमेश्वर उटा खराब कामसिके नजर अन्दाज नैकैल्कै जे ऊसब कर्ते रहै। बल्की ऊ पुरा संसारके डुबाबैके लिए पानी भेजिके ओकरासिके एरं सजाय देल्कै कि ऊ सभे आदमीसब डुबि गेलै। मगर परमेश्वर नूहके सहित ऊ आठ आदमीसिके बचैल्कै, जे परमेश्वरके संगे धर्मी हुऐके विषयमे प्रचार कैल्कै रहे।

⁶ तोरासिके यी बात भी मालुम छौ कि बहुते समय पहेला सदोम आर गमोरा सहरमे रहेवाला आदमीसिके परमेश्वर सजाय देल्कै कहिनेकी ऊसब दुष्ट काम कैल्कै रहे। इहे ल्याके ऊसब जरिके भसम नैहुऐतक परमेश्वर ओकरासिके पूर्ण रुपसे जरैल्कै। एरं करिके ऊ यी देखैल्कै कि ऊ आदमीसिके कि हैतै जेसब ओकर डर नैमानैछै।

⁷ मगर सदोम सहरके नाश करैसे पहेला परमेश्वर लोतके बचैल्कै, जे एकटा धर्मी आदमी रहै, परमेश्वर ओकरा सहरसे निकाली देल्कै आर एरंके ओकरा बच्या लेल्कै। लोत बहुते दुखित रहै कहिनेकी सदोम सहरके आदमीसब कोनो भी नियमके पालन नैकर्ते रहै आर अनैतिक काम कर्ते रहै।

⁸ लोत उटा जगहके खराब आदमीसिके बीचमे रहते रहै आर ऊ सभे दिन उटा खराब कामसिके देख्ते रहै जे ऊसब कर्ते रहै आर उटा दुष्ट बातसिके सुन्ते रहै जे ऊसब बोल्ते रहै आर यी सभे ओकरा बहुते दुखित बनाबै कहिनेकी ऊ एकटा धर्मी पुरुष रहै।

⁹ यी सभे काम जे परमेश्वर पहेला कैल्कै, उटा कामसब अपनासिके यी देखाबैछै कि जे आदमीसब ईश्वरीय जीवन जियैछै, जब ऊसब मुसीबतमे हैछै ते परमेश्वर जरुर ओकरासिके सुरक्षित राख्तै। आर अपनासब यी भी निश्चित करे सकैछियै कि ऊ दुष्ट आदमीसिके उटा दिनतक निरन्तर सजाय देतै जबतक कि ऊ सभे आदमीसिके न्याय नैकर्तै।

¹⁰ परमेश्वर जरुर ही ऊ झुट्ठा शिक्षकसिके सजाय देतै, जे आपन दुष्ट, लजलग्गा इच्छाके मुताबिक काम करैछै आर आपन उप्परमे परमेश्वरके अधिकारके अस्वीकार करैछै। ऊसब हठी आर अहंकारी हैछै। ऊसब स्वर्गमे भेल महिमित प्राणीसिके बारेमे अपमान करैले नैडराबैछै।

¹¹ स्वर्गदूतसिके बारेमे विचार कर। ऊसब झुट्ठा शिक्षकसिसे कतनें बेसी शक्तिशाली छै। मगर जब ऊसब परमेश्वरके उपस्थितिमे यी शिक्षकसिके उप्परमे दोष लगाबैछै ते ऊसब भी अपमानजनक भाषाके प्रयोग नैकरैछै।

झुट्ठा शिक्षकसिके भ्रष्टता

¹² मगर यी शिक्षकसब बेअकल जानवरसिके जुगुर काम करैछै जेसब ओरं करैछै जेरं ओकरसिके शरीर चाहैछै आर जेसब इहे ल्याके जनम हैछै ताकी आदमीसब ओकरासिके फस्याके मारे सकै। कहिनेकी ऊसब यी जानवरसिके जुगुर छै, यी शिक्षकसब उटा चीजसिके अपमान करैछै, जकर विषयमे ऊसब वास्तवमे कुछु भी नैजानैछै। परमेश्वर ओकरासिके ओहिने करिके नाश करि देतै जेरंके आदमीसब जानवरसिके मारैछै।

¹³ ओकरसिके विनाश उटा नोक्सानीके प्रतिफल छै जे ऊसब कैल्कै छे। ऊसब दिन्हैमे खराब सुख-विलासमे पडल रहना पसन्द करैछै। ऊसब तोरसिके बीचमे एकटा कलंक आर दाग छै। ऊसब धोखा दियैमे खुशी मनाबैछै, जब कि ऊसब तोरसिके प्रीति-भोजमे तोरसिके संगे खान-पिन करैछै।

¹⁴ ऊसब हरेक जनानीके संगे व्यबिचार करैले चाहैछै, जकरा ऊसब देखैछै। ऊसब पाप करैके मौका खोजैसे कहियो पाछु नैहटैछै। ऊसब ऊ आदमीसिके धोखा दैछै जेसब ख्रीष्टमे मजगुतीसे विश्वास नैकरैछै, आर ऊसब ओकरासिके पापके तरफ ल्याजैछै। ओकरसिके बेसीसे बेसी चीजसिके पाबैके सभे दिन बढते रहेवाला इच्छाके कारण परमेश्वर ओकरासिके सजाय देतै।

¹⁵ ऊसब उटा काम करैले छोडी देल्कै छे, जे सही छै आर ऊसब ओहिने प्रकारके खराब काम करैले शुरु करिदेल्कै छे, जे कि बओरके बेटा बालाम बहुते समय पहेला कैल्कै रहे। ऊ गलत काम करिके पैसा कमाना पसन्द कैल्कै।

¹⁶ मगर परमेश्वर बालामके ओकर खराब कामके लिए ओकर गधाके द्वारा फटकार लग्वैल्कै। जब कि गधा नैबोलैछै मगर उटा गधा बालामसे एकटा आदमीके जुगुर बात कैल्कै, जब ऊ बालामके राजासे भेट करैके लिए लादिके ल्याजैते रहै, आर ऊ उटा समय परमेश्वरके वक्ता बालामके बेवकूफीवाला काम करैसे रोकी लेल्कै।

¹⁷ यी झुट्ठा शिक्षकसब उटा पानीके झरनासिके जुगुर बेकार छै, जेसब सुखी गेलै छे। यी पानी नैपडेवाला मेघके जुगुर बिना कामके छै, जकरा हावा उड्याके ल्याजैछै। परमेश्वर ओकरसिके लिए एकटा एरं जगह तैय्यार कैल्कै छे जे पुरा तरहसे अनहार छै।

¹⁸ जब ऊसब आदमीसिके सिखाबैछै, ऊसब बेकारके आर घमण्डसे भर्ल शब्दसिके इस्तमाल करैछै। ऊसब आदमीसिके बताबैछै कि ओकरसिके आपन शरीर जे करैले चाहैछै उटा लजलग्गा काम करे सकैछै आर ऊसब आदमीसिके फेरसे पाप करैके लिए भरम्या दैछै जे आदमीसब कुछु समय पहेला ही दुष्ट जीवनशैली त्यागल्कै छे।

¹⁹ झुट्ठा शिक्षकसब आदमीसिके बताबैछै कि ऊसब जे कुछु भी करैले चाहैछै उटा करैके लिए आजाद छै जब कि ऊसब खुद ही दाससिके जुगुर छै, कहिनेकी ओकरसिके आपन पापमय स्वभाव ओकरासिके पाप पूर्ण काम करैके लिए मजबूर करैछै। अपनासिके मालुम छै जे कुछु भी तोरासिके नियन्त्रित करैछौ, तुहें ओकर दास बनी जैछैं।

²⁰ जब आदमीसब येशू ख्रीष्टके आपन प्रभु आर उद्धारकर्ता कहिके स्वीकार करैछै, तब ऊसब संसारके दुष्टतासे भागैछै। मगर आब एकबेर फेर ऊसब खराब काम करैमे लिप्त भ्यागेलै छे आर उटा खराब कामसब ओकरासिके नियन्त्रित करैछै, सेल्याके आब ख्रीष्टके अस्वीकार करि देलके बाद ओकरसिके अन्तिम दशा ओकरसिके विश्वासी बनैसे पहेलाके स्थितिसे भी खराब भ्यागेलै छे।

²¹ हमर कहैके मतलब यी छै कि, ख्रीष्टके कहियो स्वीकार नैकैल आदमीसिसे ख्रीष्टके विश्वास करिके त्यागेवाला आदमीसिके परमेश्वर कडा सजाय देतै। ओकरसिके लिए यी बढियाँ हैतियै यदि ऊसब कहियो यी जान्बे नैकर्तियै कि आपन जीवनके धार्मिक पथमे चलाबैके कि मतलब हैछै। आब ऊसब जानैछै कि सही कि छै, मगर ऊसब परमेश्वरके उटा आज्ञासिके अस्वीकार करिदेल्कै छे, जे हमे चुन्ल आर भेज्ल चेलासब ओकरासिके सिखैलियै रहे।

²² ओकरसिके संगे जे हैछै ऊ देखाबैछै कि यी कहावत सच छै: ऊसब कुत्तासिके जुगुर छै जे आपन उल्टी चाटैके लिए वापस घुमिके आबैछै आर ऊसब सुग्गरसिके जुगुर छै जकरा धोयल जैछै आर फेरसे कादमे लोटैछै।