२ पत्रुस 1 - केवट नया कारार

¹ हमे, सिमोन पत्रुस तोरासिके यी चिट्ठी लिखैछियौ, हमे येशू ख्रीष्टके सेवक आर चुन्ल आर भेज्ल चेला छियै। हमे तुहेंसब सभैके लिए लिखैछियौ जेसब आपनसिके जुगुर समान बहुमूल्य विश्वास प्राप्त कैल्कै छे, यी विश्वास आपनसिके परमेश्वर आर उद्धारकर्ता येशू ख्रीष्टके द्वारा अपनासिके देल गेलै छे, जे अपनासिके परमेश्वरके नजरमे धर्मी घोषित करैछै।

² हमे प्रार्थना करैछियौ कि परमेश्वरके आर येशू आपनसिके प्रभुके ज्ञानमे तुहेंसब बढते जैके समयमे, परमेश्वर तोरासिके बहुतसे बहुत अनुग्रह आर शान्ति दौ।

विश्वासमे उन्नति

³ परमेश्वर आपन शक्तिके द्वारा अपनासिके उटा सभे कुछु देल्कै छे, जे अपनासिके एकटा ईश्वरीय जीवन जियैके लिए चाही। यी सम्भव छै कहिनेकी अपनासब परमेश्वरके चिन्हैछियै आर ऊ उहे छै जे अपनासिके आपन महिमा आर नैतिक भलाइके द्वारा आपन आदमी हुऐके लिए बोलैल्कै छे।

⁴ उहे शक्तिशाली सामर्थ्यके द्वारा ऊ अपनासिके सभे बहुते बढियाँ आर अदभुद प्रतिज्ञासब देल्कै छे। इहे प्रतिज्ञासब ही संसारके दुष्ट मानव इच्छासिसे बचाबैछै आर ईश्वरीय स्वभावमे सामिल बनाबैछै, जे ख्रीष्टमे विश्वास नैकरेवाला आदमीसब करैले नैचाहैछै।

⁵ कहिनेकी तुहेंसब ईश्वरीय स्वभावमे सामिल हुऐके लिए बन्ल छैं, तुहेंसब ख्रीष्टमे विश्वास करेवाला खाली नै मगर तुहेंसब दोसर आदमीसिके लिए सभे दिन बढियाँ काम करैके कोशिश भी करे पडैछै। तुहेंसब बढियाँ काम करेवाला खाली नै, मगर तुहेंसब समझदारी तरिकासे व्यवहार करेवाला आदमी भी बने पडैछै।

⁶ तोरासिके खाली यी नै जानना चाही कि समझदारीसे केरंके व्यवहार करना छै, बल्की तोरा अपने आपके नियन्त्रित भी करना चाही, तोरासिके नैते खाली अपने आपके नियन्त्रित करना चाही बल्की तोरासिके मुसीबतमे धीरज भी राखना चाही। तोरासिके खाली धीरज ही नैराखना चाही मगर परमेश्वरके खुश करेवाला जीवन भी जिना चाही।

⁷ तोरासिके नैते खाली एरं तरिकासे जिना चाही जे परमेश्वरके खुश करैछै, बल्की तोरासिके एक दोसरके आपन खुदके परिवारके सदस्यसिके जुगुर प्रेम करना चाही। तोरासिके खाली एक दोसरके ही आपन परिवारके सदस्यसिके जुगुर प्रेम नैकरना चाही मगर तोरासिके सभे आदमीसिके प्रेम करना चाही।

⁸ यदि यी सभे बात तोरासिमे छौ आर बढैछौ ते, यी तोरासिके आपनसिके प्रभु येशू ख्रीष्टके ज्ञानमे उपयोगी आर फलदायक हुऐमे सहायता कर्तौ।

⁹ मगर यदि कोनो आदमी एरंके नैजियैछै ते ऊ एकटा एरं आदमीके जुगुर छै जे बढियाँसे नैदेखे सकैछै या जे अनराह छै। ऊ भूली गेलै छे कि परमेश्वर ओकरा उटा पापसिके लिए माफ करिदेल्कै छे, जे ऊ ख्रीष्टमे विश्वास करैसे पहेला कैल्कै रहे।

¹⁰ सेल्याके हे विश्वासी भ्या-बहिनसब, अपने आपके आर दोसर आदमीसिके यी देखाबैके लिए आरहौ भी बढियाँ व्यवहार करैके कडा मेहनत कर कि परमेश्वर तोरासिके वास्तवमे चुनल्कौ छे आर तोरासिके आपन आदमी हुऐके लिए बोलैल्कौ छे। यदि तुहेंसब एरं कर्भैं ते तुहेंसब निश्चित रुपसे परमेश्वरसे अलग नैहैभैं।

¹¹ आर साथे-साथ परमेश्वर तोरासिके उटा राज्यमे भव्य स्वागत कर्तौ जते येशू ख्रीष्ट छै, जे आपनसिके प्रभु आर आपनसिके उद्धारकर्ता छै, जे सभे दिनके लिए राजाके रुपमे राज्य कर्तै।

¹² हमे तोरासिके यी बातसिके विषयमे घुरी-घुरीके याद दिलाबे चाहैछियौ, जब कि तोरासिके पहलहैसे यी बातसिके विषयमे मालुम छौ आर तुहेंसब निश्चित छैं कि यी बातसब सच छै।

¹³ हमे जानैछियै कि जबतक हमे यी शरीरमे जिन्दा छियै ते यी उचित छै कि यी बातसिके विषयमे तोरासिके अक्सर याद दिलैते रहियौ, ताकी तुहेंसब उटा बातसब भूली नैजहैं।

¹⁴ कहिनेकी हमे जानैछियै कि हमे जल्दी मरि जैबै, कहिनेकी आपनसिके प्रभु येशू ख्रीष्ट हमरा साफसे देख्या देल्कै छे।

¹⁵ सेल्याके हमे तोरासिके यी बातसब एखनी लिखिके कडा मेहनत करैछियै ताकी हमर मौतके बाद तुहेंसब यी बातसिके जहिया भी याद करे सक्हैं।

ख्रीष्टके महिमाके गवाही

¹⁶ जब हमे चुन्ल आर भेज्ल चेलासब तोरासिके आपनसिके प्रभु येशू ख्रीष्टके शक्ति आर फेर वापस आबैके विषयमे प्रचार कैलियौ ते, हमेसब तोरासिके चलाकीसे कुछु बन्ल बनैल कहानी नैबतैते रहियौ। बल्की हमेसब ख्रीष्टके महिमा आपन आँखीसे देख्लियै रहे।

^17-18 हमेसब ओकरसंगे उटा पवित्र पहाडमे रहियै जब ओकरा परमेश्वर पिताके द्वारा सम्मान आर महिमा देल गेलै। उटा समयमे ओकरलगत सर्वोच्च महिमा यानिकी परमधन्य परमेश्वरके तरफसे एरं कहते आवाज ऐलै, “यी हमर आपन प्यारा बेटा छै, जकरासे हमे खुश छियै!” हमेसब खुद स्वर्गसे ऐल उटा आवाजके सुन्लियै।

¹⁹ हमेसब भी जानैछियै कि ख्रीष्टके विषयमे परमेश्वरके वक्तासब जे वचन लिखल्कै रहे, ऊ सभे सच्चा छै आर जे हमेसब तोरासिके ऊ फेर वापस आबैके विषयमे सिखैलियौ रहे ऊसब ओकर पुष्टि करैछै। तोरासिके उटा वचनसिके बढियाँसे सुनना चाही, कहिनेकी जेरंके अनहारमे चमक्ल चिराग आदमीसिके सही रस्ता देखैमे सहायता करैछै, ओहिने करिके यी वचन तोरासिके यी जानैमे सहायता कर्तौ कि सच कि छै। आपनसिके प्रभु ख्रीष्ट फेर वापस आबैतक तोरासिके उटा वचनसिके बढियाँसे सुनना चाही। ओकर आना नया दिनके भरौवाके जुगुर उजेत आन्तै आर ऊ भरौवाके ताराके जुगुर हैतै। उटा समयमे ओकर उजेत तोरसिके हृदयसिमे चमक्तौ आर तोरसिके समनामे परमेश्वरके साफसे प्रकट कर्तौ।

²⁰ मगर यी महत्वपूर्ण छै कि तुहेंसब यी बातके बुझैं कि धरमशास्त्रमे तुहेंसब परमेश्वरके वक्तासिके जे वचन पढैछैं उटा खाली परमेश्वरके वक्तासिके आपन विचार नैछै।

²¹ कहिनेकी कोनो भी भविष्यवाणी कहियो भी आदमीसे उत्पन्न नैभेलै। मगर पवित्र आत्मा आदमीसिके प्रेरित कैल्कै जब ऊसब परमेश्वरके तरफसे ऐल सन्देशके बोल्लै।