२ कोरन्थी 9 - केवट नया कारार

¹ आब यरूशलेम सहरमे सन्तसिके पैसा दियैके सेवकाईके विषयमे हमरा तोरासिके लिखना जरुरी नैछै।

² कहिनेकी हमे जानैछियै कि तुहेंसब सहायता करैके लिए उत्सुक छैं। जकर कारण हमे तोरसिके विषयमे माकेडोनिया प्रदेशके विश्वासीसिके समनामे गर्व करैछियै कि अखैया प्रदेशके तुहेंसब पौरे सालसे तैय्यारी करैछैं आर तोरसिके उत्सुकतासे ओकरसिमेसे बहुते झनके जोश मिल्लै छे।

³ मगर तुहेंसब यरूशलेम सहरके विश्वासीसिके धन दियैके लिए तैय्यार रहिहैं आर हमर कहेल मुताबिक तैय्यार र कहिके हमे तीन झन विश्वासी भ्यासिके भेजैछियौ।

⁴ एरं नैहै कि जब माकेडोनिया प्रदेशसे कुछु विश्वासीसब हमरसिके संगे आबै आर तोरसिके धन तैय्यार नैहौ ते कि पता हमेसब तोरसिके उप्पर आपन भरोसाके कारण शर्मिन्दा हैबै, मगर तुहेंसब आरहौ भी बेसी शर्मिन्दा हैभैं कहिनेकी हमेसब तोरासिपर बडका भरोसा राख्लियौ रहे।

⁵ इहे ल्याके हमे विश्वासी भ्या-बहिनसिसे यी बिन्ती करना जरुरी लाग्लै कि ऊसब सभैसे पहेला तोरसिकेलगत जै आर तोरसिके उटा धन जे तुहेंसब उदारतासे दैछैं जकर विषयमे पहलहैसे प्रतिज्ञा कैल गेलै रहे, तैय्यार करिके राख आर यी दबाबसे नै मगर उटा धन तुहेंसब उदारतासे दियैके लिए तैय्यार र।

⁶ मगर बात ते यी छै, कि जे कम बुनैछै ऊ कम काट्तै आर जे बहुते बुनैछै ऊ बहुते काट्तै।

⁷ हरेक आदमी आपन मनमे जतनें निश्चय कैल्कै छे ओहिने ही दान करै, बिना इच्छाके आर दबाबसे नै। कहिनेकी खुशीके साथ दिएवालाके परमेश्वर प्रेम करैछै।

⁸ परमेश्वर सभे प्रकारके अनुग्रह तोरसिके जरुरतसे बेसी दिए सकैछै। जकरासे हरेक बातमे आर हरेक समय, सभे कुछु, जे तोरासिके जरुरत हौ तोरसिकेलगत रहौ आर ताकी तोरसिकेलगत सभे कुछु सभे दिन बहुते हौ आर हरेक भला कामके लिए बहुतायतसे उपलब्ध करवाबे सक्हैं।

⁹ जेरं धरमशास्त्र लिख्ल छै, “परमेश्वर जरुरतमे भेल आदमीसिके उदारतासे दैछै, ऊ जे काम करैछै ऊ सभे सही छै आर ओकर काम सभे दिन रहतै।”

¹⁰ परमेश्वर सभे दिन किसानसिके बुनैके लिए बिहन दैछै, आर ओकरासिके खैके लिए भोजन भी दैछै। सेल्याके अहिने करिके परमेश्वर यी सम्भव कर्तै कि तोरसिकेलगत सभे दिन बहुते धन हौ, ताकी तुहेंसब आरहौ बेसी उदारतासे जरुरत पडल आदमीसिके सहायता करे सक्हैं।

¹¹ तुहेंसब हर तरहसे आशिषित हैभैं आर इहे ल्याके तुहेंसब सभे दिन उदारतासे दियैके लिए योग्य छैं। आर जब हमेसब तोरसिके उदारतासे देल दानके जरुरतमे पडल आदमीसिके देबै ते, ऊसब परमेश्वरमे धन्यवाद देतै।

¹² कहिनेकी यी सेवाके काम पुरा करैसे सन्तसिके जरुरत खाली पुरा नैहैछै, मगर आदमीसिके द्वारा परमेश्वरके बहुते धन्यवाद भी चढैल जैछै।

¹³ दोसर आदमीसिके सहायता करैके लिए धन दियैके यी सेवा देखाबैछै कि तुहेंसब आपन प्रतिज्ञा पुरा कैल्हैं छे सेल्याके बहुते आदमीसब परमेश्वरके महिमा करैछै कहिनेकी तुहेंसब स्वीकार कैल्हैं कि ख्रीष्टके खुश-खबरी सच छै आर आब तुहेंसब आपन वचनके पालन करैछैं आर ओकरसिके आर सभैके सहायता करैमे उदारता प्रकट कर्ते रहैछैं।

¹⁴ ऊसब तोरसिके लिए परमेश्वरसे प्रार्थना कर्तौ। ऊसब तोरसिसे बहुते गहरा प्रेम करैछौ, कहिनेकी ऊसब जानैछै कि परमेश्वर तोरासिपर बडका अनुग्रह कैल्कौ छे।

¹⁵ या अपनासब परमेश्वरके ओकर बेटाके लिए धन्यवाद दैछियै, एकटा एरंको दान जे शब्दसिमे बताबैके लिए बहुते अदभुद छै।