२ कोरन्थी 8 - केवट नया कारारउदारतापूर्वक दान देना 1 आब हे विश्वासी भ्या-बहिनसब, हमेसब तोरासिके माकेडोनिया प्रदेशके मण्डलीके विश्वासीसिके परमेश्वरके द्वारा देल गेल अनुग्रहके विषयमे बताबैले चाहैछियौ। 2 जब बहुते बेसी परेशानीसिसे ओकरसिके परीक्षा कैल गेलै ते, ऊसब बहुते आनन्दित भेलै आर जब कि ऊसब बहुते गरिब रहै, तैय्योपर भी ऊसब दोसर विश्वासीसिके सहायता करैके लिए बहुते उदारतासे धन देल्कै। 3 आर ओकरसिके विषयमे हमे गवाही दैछियै, कि ऊसब आपन क्षमता मुताबिक आर क्षमतासे भी बेसी आपन राजी-खुशीसे देल्कै। 4 आर ऊसब यी दानमे आर यरूशलेम सहरके विश्वासीसिके सहायता करैमे सामिल हुए पाबियै कहिके हमरासिके आग्रहके साथ बिन्ती कैल्कै। 5 हमेसब नैसोच्लियै रहे कि ऊसब एरंके दिए सकैछै। पहेला, ऊसब अपने आपके प्रभुके सेवाके लिए समर्पित करिदेल्कै। एकरबाद ऊसब परमेश्वरके इच्छासे हमरसिके अनुसरण करैके लिए अपने आपके समर्पित करिदेल्कै। 6 इहे ल्याके हमेसब तीतसके सम्झैलियै कि जेरं ऊ पहेला दान दिएवाला काम शुरुआत कैल्कै रहे, ओहिने ही तोरसिके बीचमे यी दानके कामके पुरा भी करि लै। 7 जेरंके तुहेंसब सभे बातमे आगु बढ्ल छैं यानिकी विश्वासमे, प्रचार करैके योग्यतामे, ज्ञानमे, दोसर आदमीसिके वास्ता करैमे आर हमरसिके प्रतिके प्रेममे, ओहिने करिके तुहेंसब गरिब विश्वासीसिके सहायता करैमे भी आगु बढ्ते जो। 8 हमे यी बात आज्ञाके रुपसे ते नैकहैछियौ, मगर एकरा दोसर आदमीसिके उत्सुकतासे तुलना करिके तोरसिके प्रेमके सच्चाईके जाँचैके लिए कहैछियौ। 9 तुहेंसब आपनसिके प्रभु येशू ख्रीष्टके अनुग्रहके जानैछैं, कि ऊ मातबर भ्याके भी तोरसिके खातिर गरिब बन्लै ताकी ओकर गरिबीसे तुहेंसब मातबर हुए सक्हैं। 10-11 एक साल पहेला तुहेंसब खाली दियैमे नै बल्की एरं करैके इच्छा राखैमे भी पहेला रहैं। यी विषयमे तोर लिए सभैसे बढियाँ कि छै ओकर बारेमे हमर सल्लाह यी छौ: आब जे तुहेंसब शुरु कैल्हैं छे ओकरा पुरा कर। शायद तुहेंसब भी एकरा समाप्त करैके लिए ओतनें ही उत्सुक छैं जतनें कि तुहें एकरा शुरु करैमे रहैं। तुहेंसब आपन क्षमताके मुताबिक दहैं। 12 कहिनेकी यदि ककरो मनमे दोसर आदमीसिके दान दियैके विचार छै ते जे कुछु ओकरलगत छै ओकरे आधारपर ओकर दान स्वीकार योग्य हैतै नै कि एकर आधारपर जे ओकरलगत नैछै। 13 एरं नैछै कि तोरासिके दोसर आदमीसिके जरुरतमे सहायता करना छौ आर अपने आपके दिक्कतमे करि ले। हमर मकसद यी छै कि तोरसिके जीवन एक समान हौ। 14 यी समयमे तोरसिके संगे जे बढती छौ, तुहेंसब ओकरसिके अभावमे ओकरासिके सहायता करे सकैछैं ताकी आबेवाला समयमे जब ओकरसिके संगे बढती हैतै, तोरसिके अभावमे ऊसब तोरासिके सहायता कर्तौ आर एरंके सभैके जरुरत पुरा हैतै। 15 जेरं धरमशास्त्रमे लिख्ल छै, “जे आपन लिए बहुते जमा कैल्कै ओकरलगत फाजिल नैभेलै, आर जे आपन लिए कम जमा कैल्कै ओकरा अभाव नैभेलै।” 16 परमेश्वरके धन्यवाद है, जे चिन्ता हमरा तोरसिके लिए छै उहे चिन्ता तीतसके भी छै। 17 जब हमेसब ओकरा तोरसिकेलगत जैके लिए अनुरोध कैलियै ते, ऊ हमरसिके अनुरोधके सम्मान कैल्कै आर बहुते उत्साही भ्याके आपन इच्छासे तोरसिकेलगत गेलौ छे। 18 आर हमेसब ओकरसंगे दोसर विश्वासी भ्याके भेज्लियै छे, जे सभे मण्डलीके विश्वासीसिके बीचमे खुश-खबरीके प्रचार करैके कामके लिए बहुते सम्मानित छै। 19 आर खाली एतनें ही नै, मगर ऊ मण्डलीके आदमीसिके द्वारा चुन्ल भी गेलै कि यी दानके कामके लिए हमरसिके संगे जै। आर हमेसब यी सेवा इहे ल्याके करैछियै कि प्रभुके महिमा आर यी देखाबैके लिए कि हमेसब यरूशलेम सहरमे विश्वासीसिके सहायता करैके लिए उत्सुक छियै। 20 हमेसब यी बातमे होशियार रहैछियै कि तीतसके संगे ऊ साथी विश्वासीके भेजैके द्वारा यी उदारताके कामके विषयमे जकर हमेसब सेवा करैछियै, कोय हमरासिपर दोष नैलगाबे सकै। 21 कहिनेकी हमेसब खाली प्रभुके नजरमे नै, मगर आदमीसिके नजरमे भी हमेसब कामसिके सही तरिकासे करैमे आपन ध्यान दैछियै। 22 आर हमेसब एकरसिके संगे एकटा आरहौ विश्वासी भ्याके भेजैछियौ, जकरा हमेसब बहुतेबेर जाँचिके बहुते बातमे उत्साही पैलियै छे, मगर आब तोरासिपर ओकरा बहुते भरोसा छै, इहे ल्याके ऊ आरहौ भी बेसी उत्साही भेल छै। 23 यदि कोय तीतसके विषयमे पुछैछै ते, ऊ हमर साजी आर तोरसिके लिए हमर सहकर्मी छै, आर यदि हमरसिके विश्वासी भ्यासिके विषयमे पुछैछै ते, ऊसब मण्डलीके विश्वासीसिके द्वारा भेज्ल सन्देशवाहक आर ओकरसिके जीवन ख्रीष्टके महिमाके लिए छै। 24 इहे ल्याके ओकरासिके तोरसिके प्रेम देखा आर तोरसिके विषयमे कैल हमरसिके गर्व सही छै कहिके मण्डलीसिके सभे विश्वासीसिके सबूत दहैं। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation