२ कोरन्थी 4 - केवट नया कारार

खुश-खबरीके प्रकाश

¹ परमेश्वरके दयासे ओकर खुश-खबरी प्रचार करैके सेवकाई हमरासिके मिल्लै छे। सेल्याके हमेसब निराश नै हैछियै।

² हमेसब शर्मनाक आर गुप्त कामसिके छोडी देलियै छे। नैते हमरसिके स्वभावमे छल-कपट छै आर नैते परमेश्वरके वचनमे हेर-फेर करैछियै। मगर हमेसब परमेश्वरके समनामे खाली सच सिखाबैछियै। सभेकोय गवाही दिए सकैछै कि यी बात सच छै।

³ जे खुश-खबरी हमेसब प्रचार करैछियै यी नुकैल छै ते, ओकरेसिके लिए नुकैल छै जे आदमीसब विनाशके महर जैछै।

⁴ यी संसारके देवता शैतान परमेश्वरके नैचिन्हेवाला आदमीसिके बुद्धिके अनराह बन्या देल्कै छे, सेल्याके ऊसब ख्रीष्ट आर ओकर महिमाके विषयमे खुश-खबरीके नैबुझे सकैछै। ख्रीष्ट परमेश्वरके प्रतिरुप छै।

⁵ कहिनेकी हमेसब आपन नै बल्की येशू ख्रीष्ट प्रभु छै कहिके प्रचार करैछियै। हमेसब येशूके सेवामे तोरसिके सेवक छियै।

⁶ इहे ल्याके कि परमेश्वर कहैल्कै, “अनहारमेसे उजेत चम्कै” आर परमेश्वर उजेतके जुगुर हमरसिके मनमे समझ देल्कै, ताकी हमेसब परमेश्वरके महिमाके देखे सकियै जे येशू ख्रीष्टमे प्रकट हैछै।

⁷ मगर आब हमरसिके मनमे यी उजेत चम्कैछै, मगर हमेसब खुद माटीके उटा कमजोर बर्तनके जुगुर छियै जकरामे यी बडका खजाना भर्ल छै। जकरासे यी बात साफ भ्याजै कि यी सर्वश्रेष्ठ शक्ति हमरसिके नै, मगर परमेश्वरके छै।

⁸ हमेसब सभे प्रकारके परेशानीसिसे कष्टित छियै, मगर संकटमे नैपडैछियै, एत्तेतक कि जब हमरासिके कि करियै कहिके मालुम नैहैछै, हमेसब कहियो हार नैमानैछियै।

⁹ हमेसब सतैल ते जैछियै मगर त्यागल नैजैछियै। प्रहार करिके गिरैल ते जैछियै मगर नाश नै हैछियै।

¹⁰ हमेसब येशूके जुगुर हर समय निरन्तर जान मार्ल जैके खतरामे रहैछियै ताकी जे काम हमेसब करैछियै ओकरद्वारा आदमीसब येशूके जीवनके देखे सकै।

¹¹ सेल्याके हमेसब जेसब जिन्दा छियै, निरन्तर येशू ख्रीष्टके लिए जान मार्ल जैके खतरामे रहैछियै ताकी येशू ख्रीष्टके जीवन हमरसिके मरणशील जीवनसिमे प्रकट भ्याजै।

¹² ते एकर मतलब यी छै कि हमेसब निरन्तर मौतके सामना करैछियै मगर एकर परिणाम यी छै कि तोरासिके कहियो खतम नैहुएवाला जीवन मिल्लौ छे।

¹³ मगर हमेसब प्रचार करैले जारी राखैछियै कहिनेकी हमरासिमे ओहिने ही विश्वास छै जेरं भजनकारमे रहै, जेरं धरमशास्त्रमे लिख्ल छै, “हमे परमेश्वरपर विश्वास कैलियै, सेल्याके हमे कहैलियै।”

¹⁴ कहिनेकी हमेसब जानैछियै कि जे परमेश्वर प्रभु येशूके मुर्दासे जिन्दा बनैल्कै, उहे हमरासिके भी येशूके संगे जिन्दा बनैतै आर आपन समनामे खडा हुऐके लिए हमरासिके तोरसिके संगे आन्तै।

¹⁵ उटा सभे कष्ट जे हमेसब सहैलियै ऊ तोरसिके हितमे भेल छौ, ताकी बहुतेसे बहुते आदमीसिके पता चलि जैतै कि परमेश्वर कतनें अनुग्रही छै आर परमेश्वरके महिमाके लिए बहुते आदमीसब धन्यवाद देतै।

¹⁶ इहे ल्याके हमेसब साहास नैछोडैछियै। ओरं ते हमरसिके बाहरी शारीरिक बल कमजोर भेले जैछै तैय्योपर हमरसिके आत्मा दिन प्रतिदिन नया भेले जैछै।

¹⁷ कहिनेकी हमरसिके समस्या छोटका छै आर बहुते लम्बा समयतक नैरहतै। कहिनेकी एकर परिणाम कहियो खतम नैहुएवाला महिमा हैतै, जे ऊ सभैसे बहुते बेसी हैतै जकर हमेसब कल्पना करे सकैछियै।

¹⁸ इहे ल्याके हमरसिके नजर ऊ चीजसिपर टिक्ल नैछै जे दिखाई दैछै, मगर ऊ चीजसिपर नजर टिक्ल छै जे आँखीसे देख्ल नै ज्या सकैछै, कहिनेकी दिखाई दिएवाला चीजसब कुछु देर टिकैछै मगर जे चीज देख्ल नै ज्या सकैछै, ऊ सभे दिनके लिए रहैछै।