२ कोरन्थी 3 - केवट नया कारार

नया करारके सेवकसब

¹ हमेसब फेर आपने बडै नैकरे लाग्लियै छे। या कुछु दोसर आदमीसिके जुगुर हमरासिके भी तोरसिसे या तोरसिके लिए सिफारिसके चिट्ठीके जरुरत नैछै।

² तुहेंसब खुद ही एकटा चिट्ठीके जुगुर छैं जे सभे आदमीसिके समनामे परमेश्वरके लिए हमर कामके सिफारिस करैछै, जे हमरसिके हृदयमे लिख्ल छै आर तोरसिके बदल्ल जीवन तोरसिके बीचमे हमरसिके कामके कारणसे छौ, जे एकटा चिट्ठीके जुगुर छै जकरा सभेकोय पढे आर चिन्हे सकैछै।

³ यी बात साफ छै कि तोरसिके बदल्ल जीवन एकटा चिट्ठी छै जे ख्रीष्ट लिखल्कै छे। ऊ यी चिट्ठी हमरसिके कामके द्वारा लिखल्कै, जे चिट्ठी मसीसे या पत्थलके पाटीमे नै, मगर जिन्दा परमेश्वरके आत्माके द्वारा आदमीसिके हृदयके पाटीसिमे लिख्ल गेलै छे।

⁴ हमेसब एरं इहे ल्याके कहैछियै कहिनेकी हमरासिके ख्रीष्टके द्वारा परमेश्वरमे आश्वासन छै।

⁵ हमेसब यी नैकहैछियै कि हमरसिके लगत खुदके ताकतसे कुछु भी करैके क्षमता छै। मगर परमेश्वर हमरासिके यी क्षमता दैछै।

⁶ जे हमरासिके नया करारके सेवक हुऐके क्षमता देल्कै छे, यी करार लिख्ल विधि-विधानके नै मगर पवित्र आत्माके छै। कहिनेकी मूसाके लिख्ल विधि-विधानके पालन करैके परिणाम मौत छै मगर पवित्र आत्मा कहियो खतम नैहुएवाला जीवन दैछै।

^7-8 जब मूसाके विधि-विधान जे पत्थलके पाटीमे लिख्ल गेलै रहे, परमेश्वरके महिमा उटा समयमे प्रकट भेलै रहे। इस्राएलीसब लम्बा समयतक मूसाके चेहराके महर नैदेखे सकल्कै कहिनेकी ऊ चमकते रहै, जब कि यी चमक लम्बा समयतक नै रहलै। इहे ल्याके यदि मूसाके देल गेल विधि-विधानपर आधारित सेवकाई मौत आनैछै, जकर एरं महिमा रहै ते, पवित्र आत्माके सेवकाईके महिमा आरहौ बेसी हैतै।

⁹ कहिनेकी जब दोषी ठहराबेवाला करार महिमामय रहै ते, निश्चित रुपसे आदमीसिके लिए परमेश्वरके समनामे धर्मी घोषित करेवाला नया करार आरहौ भी बेसी महिमामय छै।

¹⁰ वास्तवमे, उटा महिमा जे मूसाके विधि-विधानके द्वारा रहै, ओकर नया करारके सर्वश्रेष्ठ महिमाके समनामे आब कोनो महिमा नैछै।

¹¹ मूसाके विधि-विधान एकटा एरं महिमाके साथ देल गेलै रहे जे लम्बा समयतक नै रहलै। मगर नया करारके महिमा बहुते बेसी छै कहिनेकी यी सभे दिन रहतै।

¹² सेल्याके एरं आशा राखिके हमेसब साहासके साथ बोलैछियै।

¹³ आर हमेसब मूसाके जुगुर नैछियै, जे आपन चेहरा कपडा ल्याके झाँपीके राख्ते रहै ताकी इस्राएलीसब ओकर चेहरामे परमेश्वरके चमकके कम हैते आर अन्तमे गायब हैते नैदेखै।

¹⁴ मगर ओकरसिके मन कठोर भेल रहै, कहिनेकी ऐजके दिनतक पुरना करार पढैके समयमे ओकरसिके हृदय उहे कपडा ल्याके झाँप्ल रहैछै, मगर जब ऊसब ख्रीष्टमे विश्वास करैछै तभे पर्दा हटैल जैछै।

¹⁵ आर ऐजतक जब भी मूसाके विधि-विधान पढ्ल जैछै ते, ओकरसिके हृदय कपडा ल्याके झाँप्ल रहैछै आर इहे ल्याके ऊसब एकरा पुरा तरहसे नैबुझैछै।

¹⁶ मगर जब ऊसब प्रभु येशूमे विश्वास करैछै, तब उटा कपडा हटी जैछै।

¹⁷ प्रभु ते आत्मा छै आर जते प्रभुके आत्मा छै ओत्ते पुरना करारसे आजादी छै।

¹⁸ मगर अपनासब एकटा ऐनाके जुगुर परमेश्वरके महिमाके एरं चेहरासे देखाबैछियै जकरा कपडा ल्याके झाँप्ल नैछै। परमेश्वर अपनासिके लगातार बढते रहेवाला महिमामे बेसीसे बेसी आपन जुगुर बनाबैछै। यी प्रभुके काम छै, जे पवित्र आत्मा छै।