१ तिमोथी 4 - केवट नया कारार

झुट्ठा शिक्षकसिसे होशियार रह

¹ पवित्र आत्मा साफसे कहैछै, कि अन्तके समयमे कुछु आदमीसब ख्रीष्टके शिक्षासिके विश्वास करैले छोड्तै। ओकरासिके बहकाबेवाला भूतप्रेतके शिक्षाके ऊसब स्वीकार कर्तै, आर ओकरसिके झुट्ठा शिक्षाके विश्वास कर्तै।

² झुट्ठा शिक्षकसब छल-कपट करेवाला हैछै। जेरंके गरम लुहासे झरकलके बाद चमडा बोद्र भ्याजैछै, ओहिने करिके ओकरासिके महसुस नैहैछै कि ऊसब सही करैछै कि गलत करैछै।

³ ओरंको झुट्ठा आदमीसब बिहा नैकरना चाही आर कोनो-कोनो खानासब नैखाना चाही कहिके सिखाबैछै। मगर परमेश्वर उटा ख्यावाला चीजसब ऊ विश्वासीसिके लिए बनैल्कै छे जे परमेश्वरके धन्यवाद देलके बाद ख्या पडैछै कहिके सच्चा शिक्षा मालुम छै।

⁴ कहिनेकी परमेश्वरके बनैल सभे चीज बढियाँ छै, आर ओरं कोनो भी खाना नैछै जकरा इन्कार करना चाही। परमेश्वरके धन्यवाद द्याके कोनो भी खाना ख्या सकैछियै।

⁵ उटा खाना परमेश्वरके कहेल बात आर प्रार्थनाके द्वारा शुद्ध कैल जैछै।

ख्रीष्टके उत्तम सेवक

⁶ यदि तुहें विश्वासी भ्या-बहिनसिके हमर सिखैल बातसिके निरन्तर सिखैभैं, जकर बारेमे हमे तोरा एखन निर्देशन देलियौ छे आर तुहें विश्वासके सन्देशद्वारा मजगुत कैल गेल्हैं छे आर बढियाँ शिक्षाके अनुसरण कैल्हैं छे ते, तुहें येशू ख्रीष्टके एकटा बढियाँ सेवक हैभैं।

⁷ परमेश्वरके अनादर करेवाला बनौटी आर मूर्ख खिसासिसे पुरा रुपसे अलग र, आर ईश्वरीय जीवन बिताबैके लिए अपने आपके निरन्तर तालिम दहैं।

⁸ कहिनेकी शारीरिक कसरत तोरसिके शरीरके फैदा कर्तौ, मगर भक्ति सभे प्रकारसे फैदाके हैछै, कहिनेकी यी बात धर्तीमे जिन्दा रहैके समयमे आर मर्लके बाद भी इनामके प्रतिज्ञा करैछै।

⁹ यी बात सही छै आर एकरामे विश्वास करे सकैछियै।

¹⁰ यी जीवन पाबैके लिए हमेसब संघर्ष आर कडा मेहनत करैछियै, कहिनेकी अपनासब जिन्दा परमेश्वरमे आशा राखैछियै, जे सभे आदमीसिके विशेष करिके ओकरामे विश्वास करेवाला आदमीसिके उद्धारकर्ता छै।

¹¹ विश्वासीसिके यी निर्देशनसब सिखा आर ओकरासिके यी निर्देशनसिके आज्ञापालन करैले लगा।

¹² एरंको व्यवहार कर कि कोय भी तोरासिके अनादर नैकरौ कहिनेकी तुहेंसब जवान छैं, मगर तोरसिके बोल्ल वचनद्वारा, तोरसिके व्यवहारद्वारा, दोसर आदमीसिके प्रति प्रेमद्वारा, ख्रीष्टमे तोरसिके भरोसाद्वारा आर तोरसिके पापरहित जीवनद्वारा विश्वासीसिके लिए तोरासिके एकटा उदाहरण बने पड्तौ।

¹³ जबतक हमे ओत्ते नैऐबै विश्वासीसिके उत्साह देते आर सिखैते ऊँचा आवाजमे धरमशास्त्र पढ।

¹⁴ जब मण्डलीके अगुवासिके समूह तोरसिके उप्परमे हात राखल्कौ आर परमेश्वर तोरासिके विशेष क्षमताके विषयमे बताबैके लिए सन्देश देल बात याद कर। यी क्षमताके बेवास्ता नैकर।

¹⁵ यी बातसिके ध्यानसे अभ्यास कर आर अपने आपके ओकरसिके प्रति पुरा समर्पित कर, ताकी तुहेंसब आपन विश्वासमे बढैछैं कहेल बात सभेको देखे सकै।

¹⁶ तुहेंसब केरंके आपन जीवन जियैछैं आर तुहेंसब कि सिखाबैछैं उटा बातमे होशियार र आर ओकरा करैमे लाग्ल र। नतिजा स्वरुप तोरसिकेद्वारा परमेश्वर तोरासिके खुदके आर सुनेवाला आदमीसिके भी बचैतै।