१ तिमोथी 3 - केवट नया कारारमण्डलीके देख-रेख करेवाला आदमीके योग्यता 1 यी बात सही छै कि अगर कोय आदमी मण्डलीमे अगुवा बनैके इच्छा करैछै ते, ऊ सम्मानवाला कामके इच्छा करैछै। 2 सेल्याके मण्डलीके देख-रेख करेवालासिमे यी गुणसब होना चाही: ओकरासिमे कोनो दोष नै होना चाही। आर ऊसब आपन पतनीके प्रति वफादार होना चाही। ऊसब शान्तिके साथ व्यवहार करेवाला होना चाही। ऊसब अपने आपके वशमे राखेवाला होना चाही। ऊसब आदमीसिके द्वारा सम्मान पैल होना चाही। ऊसब आपन घरमे मैजमानसिके स्वागत करैले तैय्यार रहे पडैछै आर ऊसब परमेश्वरके वचन सिखाबे सकेवाला होना चाही। 3 ऊसब बेसी नशा करेवाला आदमी आर मार-पीट करेवाला आदमी नै होना चाही। ऊसब दयालु, धीरजी आर शान्त आदमी होना चाही, आर ऊसब वाद-विवाद नैकरेवाला, आर पैसाके लालच नैकरेवाला आदमी होना चाही। 4 ऊसब आपन घर-परिवारके बढियाँसे चलाबे सकेवाला आर व्यवस्थित होना चाही, आर ऊसब आपन बाल-बच्चासिके सभे बातमे आदरके साथ आज्ञापालन करैले सिखाबे पडैछै। 5 अगर कोय आदमी आपन घर-परिवारके चलाबैले आर व्यवस्थित करे नैसकैछै ते, जरुर ही ऊ आदमी परमेश्वरके मण्डलीके भी देखभाल करैमे सक्षम नैहैतै। 6 ऊसब नया विश्वासी नै होना चाही, नैते ऊसब घमण्ड कर्तै आर शैतानके पैल जुगुर सजाय पैतै। 7 आर ऊसब बढियाँ आदमीसब छै कहिके मण्डलीसे बाहारके आदमीसब भी कहै ताकी आदमीसब ओकर विषयमे खराब बातसब नैबोल्तै आर ऊ शैतानके फाँसमे नैपडतै। सेवकसिके योग्यता 8 अहिने करिके, मण्डलीके सेवकसब आदर पाबैके योग्यके होना चाही। ऊसब इमानदार होना चाही, आर बेसी नशा करेवाला नै होना चाही। ऊसब दोसर आदमीसिके धोखा द्याके रुपिया-पैसा कमाबेवाला नै होना चाही। 9 ऊसब परमेश्वरमे स्पष्ट विवेकसे प्रकट कैल सच्चा सन्देशमे निरन्तर विश्वास करेवाला होना चाही। 10 जब मण्डलीके सेवकसब चुन्ल जैछै, पहेला ओकरसिके संगे सही गुणसब छै कहिके साबित करे दहैं। आर यदि कोय ओकरासिमे दोष नैपाबैछै ते ऊसब मण्डलीके सेवक बनक। 11 इहे प्रकारसे मण्डलीके सेवकके पतनीसब सभैसे आदर पाबैके योग्यके हुए पडैछै, दोसरके बारेमे खराब बात बोलेवाली नै होना चाही, मगर संयमी आर ऊसब सभे परिस्थितिमे भरोसा करैके योग्यके होना चाही। 12 मण्डलीके सेवक आपन पतनीके प्रति वफादार होना चाही। ऊसब आपन बाल-बच्चासिके आर घर-परिवारके बढियाँसे चलाबेवाला आर व्यवस्थित करे सकेवाला होना चाही। 13 जे मण्डलीके सेवकसब बढियाँसे मण्डलीके काम करे सकैछै, ऊसब आदमीसिके द्वारा आपन लिए सम्मान पाबैछै आर ऊसब येशू ख्रीष्टमे आपन विश्वासके बारेमे साहासके साथ बोले सकैछै। मण्डली आर आत्मिक जीवनके रहस्य 14 तोरलगत जल्दी आबैके आशा राख्ल पर भी हमे तोरासिके यी निर्देशनसब लिखैछियौ। 15 ताकी यदि हमरा आबैमे बेर हैबो कर्तै ते तोरासिके मालुम हौ कि अपनासिके केरंके परमेश्वरके परिवारके सदस्यके रुपमे आपन जीवन जिये पडैछै, जे जिन्दा परमेश्वरके मण्डली छै आर जेरंके जग आर खम्भा घरके थामैछै आर मजगुत बन्याके राखैछै, ओहिने करिके यी विश्वासीसब सच्चा शिक्षाके थामैछै आर स्थिर राखैछै। 16 बिना कोनो शंकाके, हमेसब कहे सकैछियै कि परमेश्वरद्वारा प्रकट कैल शिक्षासब पुरा रुपसे सच्चा छै, यानिकी येशू ख्रीष्ट आदमीके रुपमे ऐलै, ऊ पवित्र आत्माद्वारा परमेश्वरके बेटा साबित भेलै, स्वर्गदूतसब ओकरा देखल्कै, ऊ स्वर्गके महिमामे लजैल गेलै, आदमीसब ओकर बारेमे जात-जातके आदमीसिमे प्रचार कैल्कै, आर संसारके बहुते आदमीसब ओकरापर विश्वास कैल्कै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation