१ तिमोथी 2 - केवट नया कारारसभैके लिए प्रार्थना 1 आरहौ कोनो चीजसे बेसी हमे आग्रह करैछियौ, कि सभे आदमीसिके लिए परमेश्वरके संगे नम्र निवेदन, प्रार्थना, मध्यस्थ बिन्ती आर धन्यवाद चढा। 2 राजासब आर अधिकार भेल आदमी सभैके लिए प्रार्थना कर ताकी ऊसब अपनासिके शान्ति आर सुरक्षामे रहैके लिए सहायता करै आर अपनासब आजादीसे परमेश्वरके आराधना करे सकियै आर परमेश्वरके इच्छा मुताबिकके काम करे सकियै। 3 सभे आदमीसिके लिए एरंके प्रार्थना करना सही छै आर आपनसिके उद्धारकर्ता परमेश्वर यी बातके स्वीकार करैछै। 4 सभे आदमी सचके ज्ञानमे आबिके उद्धार पाबै कहिके परमेश्वर इच्छा करैछै। 5 कहिनेकी परमेश्वर एक्केटा ही छै, आर खाली एक आदमी मध्यस्थ छै जे परमेश्वर आर आदमीके बीचमे शान्ति आनैछै, यानिकी येशू ख्रीष्ट। 6 ख्रीष्ट पाप आर मौतके शक्तिसे मोल तिरिके सभैके बचाबैके लिए आपन बलि देल्कै। ओकर मौतद्वारा परमेश्वर सही समयमे सबूत देल्कै कि ऊ सभे आदमीसब उद्धार पाबै कहिके चाहैछै। 7 एकर खातिर, परमेश्वर हमरा खुश-खबरीके प्रचारक आर चुन्ल आर भेज्ल चेला नियुक्त कैल्कै। ऊ हमरा गैर-यहूदी आदमीसिके विश्वासके सच्चा शिक्षा सिखाबैके लिए चुन्लकै। हमे सच कहैछियौ, हमे झुठ नैबोलैछियौ। मण्डलीमे मरद आर जनानीसिके निर्देशन 8 हमे चाहैछियै कि जब भी तुहेंसब परमेश्वरके आराधना करैके लिए जमा हैछैं, ऊ पुरुषसब जे पवित्र जीवन जियैछै परमेश्वरके आपन समर्पित हातके उप्पर उठ्याके प्रार्थना करै आर बिना गोस्सा आर बिना वाद-विवादके साथ प्रार्थना करै। 9 अहिने करिके हमे चाहैछियै कि, जनानीसिके उचित तरिकासे कपडा लगाना चाही, एरंको कपडा जे कि दोनो सभ्य आर स्वीकार योग्य है। आदमीसिके ध्यान आपन महर खिचेवाला जुगुर केशके सिंगार-पटार करिके, सोना, मोती आर बहुमूल्य कपडासब लग्याके नै। 10 एकर बदलामे, ऊसब दोसर आदमीसिके लिए बढियाँ कामसब करे पडैछै, परमेश्वरके भक्ति करेवाला जनानीसिके लिए इहे उचित व्यवहार छै। 11 जब दोसर आदमीसब विश्वासीसिके शिक्षा दैछै तब सभे जनानीसब शान्तिके साथ आर बहुते आदरके साथ सुनैले सिखे पडैछै। 12 हमे जनानीसिके मरदसिके सिखाबैले आर ओकरसिपर अधिकार जमाबैके लिए अनुमति नैदैछियौ। जब तुहेंसब आराधनाके लिए जमा हैछैं ते जनानीसिके चुपचाप रहना चाही। 13 हमे यी बात कहैके कारण यी छै कि परमेश्वर पहेला आदमी, आदमके बनैल्कै आर तकरबाद परमेश्वर जनानी, हब्बाके बनैल्कै। 14 दोसर कारण यी छै कि शैतान हब्बाके धोखा देल्कै, आदमके नै। एरंके हब्बा परमेश्वरके विधि-विधानके प्रति अनाज्ञाकारी भेलै। 15 मगर जबतक ऊसब ख्रीष्टमे विश्वास करिके रहैछै, दोसरसिके प्रेम करैछै आर शुद्ध आर उचित तरिकासे व्यवहार करैछै, परमेश्वर जनानीसिके बच्चाके जनमके द्वारा बचैतै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation