१ थेसलोनिकी 5 - केवट नया कारारयेशूके दोसर आगमनके लिए तैय्यार रहिहैं 1 मगर हे विश्वासी भ्या-बहिनसब, प्रभु येशू कहिया ऐतै कहिके यी बात तोरासिके लिखि रहना जरुरी नैछै। 2 कहिनेकी तुहेंसब आपनहैं बढियाँसे जानैछैं कि जेरंके रातके समयमे चोर आबैछै ओहिने करिके प्रभु येशू भी अचानकसे फेर वापस ऐतै। 3 जब आदमीसब कहतै, “कुशल छै, आर कोनो डर नैछै” उटा समयमे ऊसब अचानक बडका समस्याके अनुभव कर्तै। यी गर्भवती जनानीके बच्चा जनमके दरद शुरु हुऐ जुगुर अचानक हैतै। ऊसब उटा बडका समस्यासे बचे नैसक्तै। 4 मगर हे विश्वासी भ्या-बहिनसब, तुहेंसब आत्मिक अनहारमे नैछैं मगर उजेतमे छैं। जेरंके रातके समयमे चोर आबैछै ओहिने करिके प्रभु येशू भी अचानकसे फेर वापस ऐतै ते तोरसिके लिए यी कोनो आश्चर्यके बात नैहैतै। 5 कहिनेकी तुहेंसब बढियाँ व्यवहार करेवाला आर जे सही छै उटा करेवाला सन्तान छैं। जे उजेतमे जियैके जुगुर छै आर दिनके आदमीसिके जुगुर छै। यी विश्वासीसब पाप करेवाला आर खराब तरिकासे व्यवहार करेवाला आदमीसब नैछै, जे अनहारमे रहैके जुगुर आर यी दुष्ट संसारसंगे सम्बन्धित भेल जुगुर छै। 6 सेल्याके अपनासब प्रभु येशूके फेर वापस आबेवाला दिनके तैय्यारी नैकरेवाला आदमीसिके जुगुर नैसुत। मगर सचेत र आर होशियार र। 7 कहिनेकी सुतेवाला आदमीसब रातीए सुतैछै आर नशा पिबिके मातेवाला आदमीसब रातीए मातैछै आर कि हुएवाला छै से नैजानैछै। 8 मगर अपनासब जे दिनके छियै, विश्वास आर प्रेमके धारण कर, जे अपनासिके सुरक्षा दैछै जेरंके कवच सिपाहीके सुरक्षा दैछै। आर अपनासब यी आशा राख कि अपनासब कहियो खतम नैहुएवाला सजायसे बचैल छियै, जेरंके टोपी सिपाहीके बचाबैछै। 9 कहिनेकी परमेश्वर अपनासिके आपन क्रोधमे सजाय दियैके लिए नैचुनल्कै छे, मगर अपनासिके प्रभु येशू ख्रीष्टके द्वारा उद्धार पाबैके लिए पहलहैसे चुनल्कै छे। 10 येशू ख्रीष्ट आपनसिके लिए मर्लै ताकी चाहे अपनासब जिन्दा रहियै या मर्ल रहियै, ऊ जब फेर वापस ऐतै अपनासब ओकरसंगे सभे दिन जिये सकियै। 11 सेल्याके जेरंके तुहेंसब एखन करैछैं, एक दोसरके उत्साह दहैं, आर एक दोसरके येशूमे मजगुतसे विश्वास करैके लिए सहायता कर। मण्डलीके शिक्षा 12 मगर हे विश्वासी भ्या-बहिनसब, हमेसब तोरासिके बिन्ती करैछियौ, कि तोरसिके अगुवासिके आदर कर, जे कडा मेहनत करैछै, जे प्रभुमे तोरसिके अगुवासब छै आर जे तोरासिके निर्देशन दैछौ, ओकरसिके आदर कर। 13 आर तोरसिके लिए ओकरसिके कामके खातिर ओकरासिके बहुते प्रेम कर आर ओकरासिके बहुते उच्च आदर कर। तुहेंसब एक दोसरसे शान्तिपूर्ण व्यवहार कर। 14 हे विश्वासी भ्या-बहिनसब, हमे तोरासिके आग्रह करैछियौ कि कोढियासिके चेतावनी दहैं। घबराबेवालासिके उत्साह दहैं। कमजोरसिके मदत कर। ऊ सभैके संगे धीरजके साथ व्यवहार कर। 15 यी ध्यान राख कि कोय भी खराबीके बदला खराबी नैकरक, मगर सभे दिन दोसर विश्वासी आर दोसर आदमीसिके दयालु व्यवहार करैके कोशिश कर। 16 सभे दिन आनन्दित र। 17 निरन्तर प्रार्थना कर्ते र। 18 सभे परिस्थितिमे धन्यवाद दहैं, कहिनेकी येशू ख्रीष्टमे तोरसिके लिए परमेश्वरके इच्छा इहे छै। 19 पवित्र आत्माके कामके आदमीसिके जीवनमे काम करैसे नैरोक। 20 आदमीसिके परमेश्वरके द्वारा प्रकट कैल भविष्यवाणीके तिरस्कार नैकरिहैं। 21 सभे बातके जाँच कर कि उटा बात परमेश्वरसे ऐलै छे कि नैऐलै छे। बढियाँ बातसिके स्वीकार आर ओकरा पालन कर। 22 सभे किसिमके खराबीके अस्वीकार कर। आशीर्वाद 23 शान्ति दिएवाला परमेश्वर आपनहैं पुरा रुपसे तोरासिके पवित्र बनाबौ आर तोरसिके सारा आत्मा, प्राण आर शरीर आपनसिके प्रभु येशू ख्रीष्टके फेर वापस आबैके दिनतक निर्दोष रहौ। 24 तोरासिके बोलाबेवाला विश्वासयोग्य छौ। ऊ तोरासिके पवित्र हुऐके लिए बोलाबैके कारणसे तोरासिके पवित्र हुऐले सक्षम बनैतौ। 25 हे विश्वासी भ्या-बहिनसब, हमरसिके लिए प्रार्थना कर। 26 सभे विश्वासी भ्या-बहिनसिके प्रेमसे नमस्कार कही दहैं। 27 हमे तोरासिके प्रभुमे आदेश दैछियौ कि यी चिट्ठी पढिके सभे विश्वासी भ्या-बहिनसिके सुन्या दहैं। 28 आपनसिके प्रभु येशू ख्रीष्टके अनुग्रह तोरसिके संगे रहौ। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation