१ थेसलोनिकी 4 - केवट नया कारार

पवित्रताके लिए बुलाहट

¹ अन्तमे हे विश्वासी भ्या-बहिनसब, हमेसब तोरासिके प्रभु येशूके नाममे आग्रह करैछियौ कि जेरंके हमेसब तोरासिके सिखैलियौ छे, परमेश्वरके खुश करेवाला जीवन जी। तुहेंसब पहलहैसे एरंके जीवन जियैछैं, आर हमेसब तोरासिके एरंके जियैके लिए आरहौ बेसी उत्साह दैछियौ।

² कहिनेकी तोरासिके मालुम छौ कि प्रभु येशू हमरासिके देल अधिकारद्वारा हमेसब तोरासिके निर्देशनसब देलियौ छे।

³ कहिनेकी परमेश्वरके इच्छा यी छै कि तुहेंसब पवित्र बन, यानिकी शारीरिक इच्छाके मुताबिक कोनो पाप नैकर।

⁴ आर तुहेंसब हरेक आपन शरीरके पवित्रता आर आदरके साथ नियन्त्रण करैले सिख।

⁵ आर तोरासिके परमेश्वरके नैचिन्हेवाला अविश्वासीसिके जुगुर कामुकताके कुवासनावाला काम नैकरना चाही।

⁶ एरं करिके, कोय भी आपन विश्वासी भ्या-बहिनके विरुद्धमे पाप नैकरक आर ओकर फैदा नैउठाबक कहिनेकी प्रभु येशू एरंको सभे काम करेवाला आदमीसिके सजाय देतै। हमेसब तोरासिके एकर बारेमे पहलहै साफसे कहैलियौ रहे आर गम्भीर चेतावनी देलियौ रहे।

⁷ कहिनेकी परमेश्वर अपनासिके अनैतिक जीवन जियैके लिए नै, मगर पवित्र जीवन जियैके लिए बोलैल्कै छे।

⁸ सेल्याके जे यी आदेशसिके इन्कार करैछै, ऊ आदमीके नै मगर परमेश्वरके इन्कार करैछै, जे परमेश्वर तोरासिके आपन पवित्र आत्मा दैछौ।

प्रेम आर काम

⁹ मगर आपन विश्वासी भ्या-बहिनसिके प्रति प्रेमके विषयमे कक्रहौ तोरासिके लिखैके जरुरत नैछै, कहिनेकी एक दोसरके प्रेम करिहैं कहिके तुहेंसब आपनहैं परमेश्वरसे शिक्षा पैल्हैं छे।

¹⁰ आर माकेडोनिया प्रदेशमे सभे महर भेल आपन संगी विश्वासीसिके प्रति तुहेंसब पहलहै ही प्रेम देखैलहैं छे। मगर विश्वासी भ्यासब, हमेसब तोरासिके आग्रह करैछियौ कि तुहेंसब प्रेममे आरहौ बढते जो।

¹¹ आर हमेसब जेरंको तोरासिके आज्ञा देलियौ छे ओहिने करिके शान्तिपूर्ण जीवन जी, आर दोसर आदमीके मामलामे दखल नैदहैं आर आपन-आपन परिवारके पालैके लिए काम कर।

¹² ताकी अविश्वासी आदमीसब तोरसिके सभे दिनके जीवनमे केरंको व्यवहार करैछैं से देखिके तोरासिके आदर कर्तौ आर तोरासिके जरुरत पडल चीजके लिए ककरोपर भी भर नैपडे पड्तौ।

मुर्दासे फेर जिन्दा हुऐके आशा

¹³ हे हमर विश्वासी भ्या-बहिनसब, तुहेंसब यी जान कहिके हमेसब चाहैछियै कि ऊ विश्वासीसिके कि हैतै जे पहेला ही मर्ल छै। एरं नैहै कि तुहें दोसर आदमीसिके जुगुर शोक कर कहिनेकी ऊसब मर्लके बाद फेर जिन्दा हैतै कहिके ओकरासिके आशा नैहैछै।

¹⁴ कहिनेकी अपनासब विश्वास करैछियै, येशू मर्लै आर फेर जिन्दा भी भेलै आर ओहिने करिके परमेश्वर येशूमे विश्वास करिके मरेवाला आदमीसिके भी येशूके संगे फेर वापस आन्तै।

¹⁵ कहिनेकी प्रभु येशूके वचन मुताबिक हमेसब तोरासिके यी कहैछियौ कि अपनासब जे जिन्दा छियै, आर प्रभु येशू फेर वापस आबैतक जिन्दा रहबै ते पहेला मर्ल आदमीसब येशूके भेट नैकरैतक आपनसिके ओकरसे भेट नैहैतै।

¹⁶ कहिनेकी प्रभु येशू आपनहैं स्वर्गसे निच्चा ऐतै, उटा समयमे प्रभु येशू बडका आवाजसे आदेश देतै, प्रधान स्वर्गदूत बडका आवाजसे बोल्तै आर परमेश्वरके धुतहुक फुक्ल जैतै, आर ख्रीष्टमे मर्ल विश्वासीसब पहेला जिन्दा हैतै।

¹⁷ तब अपनासब जे जिन्दा छियै आर धर्तीमे जेसब बाँकी रहबै, ओकरसिके संगे बादलमे उठ्याके लजैल जैबै, आर येशूसंगे बादलमे भेट कर्बै, उटा समयसे अपनासब सभे दिन प्रभु येशूके संगे रहबै।

¹⁸ सेल्याके यी बातसिके द्वारा एक दोसरके उत्साह दहैं।