१ थेसलोनिकी 2 - केवट नया कारारपावलके आचरण 1 हे विश्वासी भ्या-बहिनसब, तोरसिकेलगत हमरसिके आना उपयोगी भेलै कहिके तोरासिके आपनहैं मालुम छौ। 2 मगर जेरं तुहेंसब खुद भी जानैछैं, कि हमेसब पहेला फिलिप्पी सहरमे कष्ट भोग्लियै आर उपद्रव सहेलके बाद हमरासिके तोरसिके सहरके आदमीसिके द्वारा घोर विरोध भेलपर भी तोरासिके परमेश्वरके खुश-खबरी सुनाबैके लिए हमरासिके परमेश्वरद्वारा साहास मिल्लै। 3 कहिनेकी हमरसिके उपदेश धोखा या खराब विचारसे नैछै, नैते यी छलकपटसे छै। 4 परमेश्वर हमरासिके योग्य सम्झिके खुश-खबरी सौंपल्कै छे। सेल्याके हमेसब आदमीसिके नै, मगर हमरसिके ह्रदय जाँचेवाला परमेश्वरके खुश करैके लिए उपदेश दैछियै। 5 तुहेंसब जानैछैं कि हमेसब कहियो चापलूसीके बात नैकैलियै। हमेसब लालची हुऐके कारणसे यी बात नैकैलियै छे आर हमरसिके लालच तोरसिसे आर कक्रहौसे नुकाबैके कोशिश भी नैकैलियै छे। परमेश्वर ही यी बातके गवाही दैछै कि हमेसब ओरंको नैरहियै। 6 हमेसब तोरसिसे या दोसर कक्रहौसे आदर पाबैके कोशिश नैकैलियै छे। हमेसब ख्रीष्टके चुन्ल आर भेज्ल चेला हुऐके कारणसे तोरासिके हमरासिके महत्वपूर्ण आदमीके रुपमे व्यवहार कराबे सक्तियौ। 7 मगर जेरंके मयाँ आपन बाल-बच्चाके पालन-पोषण करैछै, ओहिने करिके हमेसब भी तोरसिके संगे कोमल भेलियौ छे। 8 हमेसब तोरासिके बहुते प्रेम कैलियौ। हमेसब तोरासिके एतनें प्रेम कैलियौ कि हमेसब खाली परमेश्वरके खुश-खबरी नै, मगर आपन-आपन जान भी तोरासिके दियैके लिए तैय्यार रहियै। 9 कहिनेकी हे विश्वासी भ्या-बहिनसब तोरासिके याद छौ कि हमेसब कतनें कडा मेहनत कैलियै। हमेसब रात-दिन काम धन्धा कैलियै ताकी तोरसिके बीचमे परमेश्वरके खुश-खबरी प्रचार करैबेरियाँ हमेसब आपन जरुरत आपनहैं पुरा करे सकियै। 10 तुहेंसब खुद ही गवाह छैं आर परमेश्वर भी गवाह छै कि हमेसब परमेश्वरके पसन्द हुएवाला जीवन जिलियै, हमेसब परमेश्वरके समनामे सही रहियै आर कोय भी हमरसिके विरुद्धमे कोनो दोष नैपैल्कै। 11 तुहेंसब जानैछैं, जेरंके बाबु आपन बाल-बच्चासिके संगे व्यवहार करैछै, ओहिने करिके हमेसब भी तोरसिके संगे व्यवहार कैलियौ। हमेसब तोरासिमेसे हरेकके उत्साह देलियौ आर सान्त्वना देलियौ आर सम्झैलियौ। 12 तुहेंसब परमेश्वरके खुश करेवाला जीवन जी, जे तोरासिके आपन राज्य आर महानतामे बोलाबैछौ। 13 सेल्याके हमेसब भी परमेश्वरके धन्यवाद निरन्तर करैछियै, कि जब तुहेंसब परमेश्वरके खुश-खबरीके सन्देश सुन्लहैं, जे हमेसब तोरासिके प्रचार कैलियौ ते, तुहेंसब ओकरा आदमीसिके नै, मगर परमेश्वरके वचन सम्झलहैं आर यी सन्देश परमेश्वरके तरफसे छै कहिके स्वीकार कैल्हैं। आर यी सन्देश जे परमेश्वरके तरफसे छै आब तोरासिमे काम करैछौ, जेसब ख्रीष्टमे विश्वास करैछैं। 14 सेल्याके, हे विश्वासी भ्या-बहिनसब, तुहेंसब यहूदिया प्रदेशमे भेल परमेश्वरके मण्डलीसिके सहेल जुगुर सतावट सहलहैं जेसब येशू ख्रीष्टमे विश्वास करैछै। कहिनेकी तोरासिके आपने क्षेत्रके आदमीसब दुर्व्यवहार कैल्कौ आर ओकरासिके ओकरेसिके आपने यहूदी आदमीसब दुर्व्यवहार कैल्कै। 15 ऊसब जेसब प्रभु येशूके आर परमेश्वरके वक्तासिके भी जान मारि देल्कै, आर हमरासिके सतैल्कै, आर परमेश्वर ओकरासिसे खुश नैछै आर ऊ सभे आदमीसिके विरोध करैछै। 16 आर ऊसब गैर-यहूदी आदमीसिसे ओकरसिके उद्धारके लिए बात करैसे हमरासिके रोकैछै। जबतक अन्तमे परमेश्वर ओकरासिके सजाय नैदेतै, ऊसब पापपर पाप करैछै। आर एखन अन्तमे परमेश्वर ओकरासिपर गोसैल छै आर ओकरासिके जल्दी ही सजाय दिएवाला छै। मण्डलीसे मिलैके आशा 17 हे विश्वासी भ्या-बहिनसब, जब हमेसब कुछु समयके लिए मनमे नै, मगर शारीरिक रुपसे तोरसिसे अलग भ्या गेलियै रहे ते, हमेसब बडा ललसाके साथ तोरासिके देखैके लिए आरहौ बेसी कोशिश कैलियै। 18 सेल्याके हमेसब, विशेष करिके हमे पावल, खाली एकबेर नै, मगर बहुतेबेर तोरसिकेलगत आबैले चहते रहियै, मगर शैतान हमरासिके तोरसिकेलगत जैसे रोकिके राखल्कै। 19 जब हमरसिके प्रभु येशू ख्रीष्ट फेर वापस ऐतै, तब हमरसिके आशा या आनन्द या गर्वके मकुट तुहेंसब ही हैभैं। 20 निश्चय ही हमरसिके आनन्द आर गौरव तुहींसब छैं। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation