१ पत्रुस 4 - केवट नया कारार

बदल्ल जीवन

¹ सेल्याके ख्रीष्ट यी संसार रहैके समयमे दुःख भोगल्कै आर तुहेंसब भी ओकर जुगुर विचार राखिके दुःख भोगैले तैय्यार हुए पडैछै। कहिनेकी यदि तुहेंसब ख्रीष्टके लिए दुःख भोगैके लिए इच्छा करैछैं ते, तुहेंसब पाप करैले छोडैके फैसला कैल्हैं छे।

² नतिजा स्वरुप, ऊ आदमी यी धर्तीपर आपन पुरा जीवन आपन पापमय मानवीय इच्छासब पुरा कर्ते नैजितै, मगर ऊ परमेश्वरके चहेल काम कर्तै।

³ बित्ल समयमे तुहेंसब उटा सभे करैमे बहुते समय बर्बाद करि देल्हैं जकरा करिके अविश्वासी आदमीसब आनन्द लैछै। तोरसिके जीवन अनैतिकता आर वासना, ओकरसिके भोज आर पियक्कडपन आर मौज-मजासब आर ओकरसिके मूर्तिसिके पूजामे बितते रहौ जकरासे परमेश्वर घृणा करैछै।

⁴ इहे कारणसे तोरसिके पुरना दोस्तसब आश्चर्यचकित भ्याजैछै, जब तुहेंसब ओकरसिके संगे उटा खराब चीजसिमे सामिल नैहैछैं जे ऊसब करैछै। इहे ल्याके ऊसब तोरसिके बदनामी करैछौ।

⁵ मगर एक दिन ऊसब जरुर परमेश्वरके समनामे फैसलाके लिए खडा हैतै आर परमेश्वर ओकरासिमेसे हरेकसे ओकरसिके द्वारा धर्तीपर कैल गेल कामसिके विषयमे पुछतै। परमेश्वर जिन्दा आर मुर्दा आदमीसिके न्याय कर्तै।

⁶ सेल्याके मर्ल आदमीसब भी ख्रीष्टके विषयमे खुश-खबरी सुनल्कै। ओकरसिके शरीर दोसर आदमीसिके जुगुर मरे पड्लै मगर आब ऊसब सभे दिन परमेश्वरसंगे आत्मामे जिन्दा छै।

⁷ सभे चीजके अन्त नज्दिक ऐल छै, सेल्याके तुहेंसब सचेत र आर अपने आपके वशमे राख ताकी तुहेंसब प्रार्थना करे सक्हैं।

⁸ सभैसे बेसी महत्वपूर्ण बात यी छै कि एक दोसरके इमानदारीसे प्रेम कर। कहिनेकी यदि तुहेंसब आदमीसिके प्रेम कर्भैं ते, तुहेंसब सभे दिन ओकरसिके द्वारा कैल गेल कोनो भी गलत कामके माफी दियैके लिए तैय्यार रहभैं।

⁹ आदमीसिके आपन घरसिमे स्वागत कर आर एरंको बिना कोनो सिकायत करिके कर।

¹⁰ हरेक आदमीके परमेश्वरके तरफसे वरदान मिल्लै छे आर ओकरासिके उटा वरदानके प्रयोग दोसर आदमीसिके सहायता करैके लिए करना चाही। ओकरासिके उटा विभिन्न वरदानसिके प्रयोग बढियाँसे करना चाही जे परमेश्वर ओकरासिके अनुग्रह करिके देल्कै छै।

¹¹ उदाहरणके लिए, यदि तोरलगत प्रचार करैके वरदान छौ ते, तोरा परमेश्वरके सन्देशसिके प्रचार करना चाही। यदि तोरलगत दोसर आदमीसिके सहायता करैके वरदान छौ ते, यी उटा सामर्थ्यके साथ कर जे परमेश्वर तोरा दैछौ। तब फेर जे कुछु भी तुहेंसब कर्भैं उटा येशू ख्रीष्टके द्वारा परमेश्वरके महिमा दिलैतै। सभे महिमा आर सामर्थ्य सभे दिनके लिए ओकर छै! आमेन।

परमेश्वरके महिमाके लिए दुःख उठाना

¹² हे प्रिय विश्वासी भ्या-बहिनसब, उटा दुःखदायी चीजसिके विषयमे आश्चर्यचकित नैहु जकर कारणसे तुहेंसब दुःख उठाबैछैं कहिनेकी तुहेंसब ख्रीष्टके छैं। मगर यी चीजसब यी देखाबैके लिए हैछै कि तुहें सचमे परमेश्वरमे विश्वास करैछैं। इहे ल्याके यी नैसोच कि तोरसिके संगे कुछु विचित्र हैछौ।

¹³ खाली एकर विषयमे खुश र, कहिनेकी तोरासिके उटा दुःखसिमे एकटा हिस्सा मिल्लौ छे जे ख्रीष्टके मिल्लै रहे। इहे कारणसे, जब ख्रीष्ट सभे आदमीसिके आपन महिमा प्रकट करैके लिए फेर वापस ऐतै ते तोरसिके आनन्द सचमे बडका हैतौ।

¹⁴ यदि ख्रीष्टके नाममे तुहेंसब निन्दित हैभैं ते तुहेंसब धन्यके छैं। कहिनेकी महिमित परमेश्वरके आत्मा तोरासिमे बास करैछौ।

¹⁵ तोरसिमेसे कोय भी आदमी हत्यारा या चोर या अपराधी या दोसरके काममे हात डालैके कारण दुःख नैपाबक।

¹⁶ मगर कोय आदमी ख्रीष्टियन हुऐके कारणसे दुःख भोगैछै ते ऊ लाज नैमानक। बल्की, परमेश्वरके प्रशंसा कर कि तुहें इहे ल्याके दुःख सहैछैं कहिनेकी तुहें ख्रीष्टके छैं।

¹⁷ कहिनेकी न्याय करैके समय आबी गेलै छे कि पहेला परमेश्वरके आदमीसिके न्याय कैल जै, आर जब कि ऊ पहेला अपनासब विश्वासीसिके न्याय कर्तै, इहे ल्याके उटा भयानक चीजसिके विषयमे सोच जे ऊ आदमीसिके संगे हैतै जेसब उटा खुश-खबरीके नैमानैछै जे परमेश्वरके तरफसे आबैछै।

¹⁸ जेरं कि धरमशास्त्रमे लिख्ल छै, “यदि एकटा बढियाँ आदमीके बचैल जाना एतनें कठिन छै ते, दुष्ट आदमी आर पापी आदमीसब जरुर ही हेर्या जैतै।”

¹⁹ इहे ल्याके, जे आदमीसब ओरं दुःख सहैछै जेरं परमेश्वर चाहैछै, ओकरासिके निरन्तर परमेश्वरपर भरोसा राखना चाही, जे ओकरसिके सृष्टि कैल्कै छे। परमेश्वर सभे दिन उहे करैछै जकरा करैके ऊ प्रतिज्ञा कैल्कै रहे आर इहे ल्याके जे बढियाँ छै उटा काम कर्ते र।