१ पत्रुस 2 - केवट नया कारार

जिन्दा पत्थल आर चुन्ल आदमीसब

¹ सेल्याके, हरेक प्रकारके खराब व्यवहार करैसे इन्कार कर। दोसर आदमीसिके धोखा नैदहैं, छल-कपटी नैबन। दोसर आदमीसिसे जर्नी नैकर। ककरो बदनामी नैकर।

² जेरंके नवजात शिशु आपन मयाँके शुद्ध दुधके ललसा करैछै, ओहिने करिके तोरा परमेश्वरके वचन सिखैके इच्छा राखना चाही ताकी तुहेंसब आत्मिक रुपसे परिपक्क बने सक्हैं। तब अन्तमे, परमेश्वर तोरा यी संसारके खराब चीजसिसे पूर्ण रुपसे बच्या लेतौ।

³ कहिनेकी जेरं कि धरमशास्त्र कहैछै, “तुहेंसब अनुभव कैल्हैं छे कि प्रभु भला छै।”

^4-5 प्रभु येशूके तुलना एकटा जिन्दा पत्थलसे कैल गेलै छे। उटा पत्थलके आदमीसिके द्वारा फेकि देल गेलै रहे, कहिनेकी ऊसब कहैल्कै कि ऊ बेकार रहै। मगर परमेश्वरके नजरमे ऊ बहुते अनमोल छै आर परमेश्वर ओकरा जगके मूल पत्थलके रुपमे चुनल्कै। आर हे संगी विश्वासीसब तुहेंसब भी प्रभु येशूके नज्दिक या ताकी तोरासिके भी ओकरद्वारा उटा जिन्दा पत्थलके जुगुर बनैल जै जे परमेश्वरके आराधनाके घर बनाबैके लिए उपयोग कैल जैछै। ऊ तोरासिके भी पवित्र पुजारी बनैल्कौ छे। कहिनेकी जेरंके पुजारी परमेश्वरके बलिदान चढाबैछै, ओहिने करिके तुहेंसब भी बलिदानके रुपमे आपन हृदय परमेश्वरके चढैल्हैं छे। आर उटा बलिदान परमेश्वरके खुश बनाबैछै कहिनेकी तुहेंसब येशू ख्रीष्टके छैं।

⁶ यी धरमशास्त्रमे परमेश्वरके कहेल जुगुर छै, “देख्! हमे एकटा किमती पत्थलके चुन्लियै छे, जे यरूशलेम सहरमे घरके मजगुत बनाबैके लिए उपयोग कैल जैछै। जे कोय भी ओकरापर भरोसा करैछै, ऊ लाजमे नैपड्तै।”

⁷ यी पत्थल तोरसिके लिए बहुते किमती छौ जे येशू ख्रीष्टमे विश्वास करैछैं। मगर जे आदमीसब ओकरापर विश्वास नैकरैछै ओकरसिके विषयमे धरमशास्त्र कहैछै कि, “राज मिसतिरीसब जेटा पत्थलके प्रयोग करैसे इन्कार करिदेल्कै, उटा पत्थल इमारतके जगके सभैसे महत्वपूर्ण पत्थल बनी गेलै छे।”

⁸ आर फेर धरमशास्त्र यी भी कहैछै, “यी पत्थल आदमीसिके ठोकर खैके कारण हैतै। यी एकटा चट्टान छै जे ओकरसिके गिरैके कारण हैतै।” ऊसब एरंके गिरैछै कहिनेकी ऊसब परमेश्वरके सन्देशके मानैसे इन्कार करैछै। परमेश्वर ओकरसिके संगे इहे हुऐके योजना बनैल्कै छे।

⁹ मगर तुहेंसब ओरं नैछैं, कहिनेकी तुहेंसब परमेश्वरके चुन्ल आदमीसब छैं, तुहेंसब परमेश्वरके पुजारीसब छैं, जे राजा छै। तुहेंसब परमेश्वरके सेवा करैले समर्पित भेल आदमीसब आर परमेश्वरके निजी प्रजा छैं। ऊ तोरासिके अनहारसे आपन अदभुद उजेतमे आन्लकौ छे, ताकी तुहेंसब परमेश्वरके आश्चर्यपूर्ण कामसिके घोषणा करे सक्हैं।

¹⁰ परमेश्वरके वक्ता होशे जे लिखल्कै छे, ऊ तोरसिके विषयमे सच छै। “पहेला तुहेंसब परमेश्वरके आदमीसब नैरहैं, मगर आब तुहेंसब परमेश्वरके आदमीसब भेल छैं। पहेला तुहेंसब परमेश्वरके दयाके नै जान्ते रहैं, मगर आब तुहेंसब एकरा जानैछैं। कहिनेकी ऊ पहेलासे ही तोरासिपर आपन दया देखैल्कौ छे।”

परमेश्वरके लिए जिना

¹¹ हे प्रिय विश्वासी भ्या-बहिनसब तुहेंसब यी संसारमे परदेशीसब आर यात्रीसिके जुगुर रहैछैं। हमे तोरासिके बिन्ती करैछियौ कि ऊ सभे पापमय इच्छासिसे दूर र, कहिनेकी एरंको इच्छासब आत्माके विरोधमे हमेशा लडैछै।

¹² कतनें बेर एरं आदमीसब हैछै जेसब प्रभुके नैजानैछै आर ऊसब तोरासिपर यी कहिके गलत आरोप लगाबे सकैछौ कि तोरसिके काम खराब छौ। इहे ल्याके तोरासिके आपन व्यवहारके विषयमे होशियार रहना चाही, ताकी ऊसब तोरसिके बढियाँ व्यवहार देखे सकौ। अन्तमे ऊसब स्वीकार कर्तै कि तोरसिके व्यवहार बढियाँ छै आर जे दिन परमेश्वर संसारके न्याय करैके लिए फेर यी संसारमे वापस ऐतै उटा दिन ऊसब परमेश्वरके महिमा कर्तै।

शासकसिके अधिनमे र

¹³ अपनासिके ऊ सभे शासकसिके अधिनमे रहना चाही जकरा आदमीसिके द्वारा नियुक्त कैल जैछै, कहिनेकी इहे प्रभुके इच्छा छै। राजाके अधिनमे र, जे सभैके उप्परमे शासन करैछै।

¹⁴ आर राज्यपालके भी अधिनमे र, कहिनेकी उहे ही छै जकर उपयोग राजा ऊ आदमीसिके सजाय दियैके लिए करैछै जकर काम खराब छै आर ऊ आदमीसिके प्रशंसा करैके लिए जकर काम बढियाँ छै।

¹⁵ कहिनेकी परमेश्वर चाहैछै कि तुहेंसब भला काम कर ताकी तुहें ऊ मूर्ख आदमीसिके तोरसिके विरुद्ध गलत आरोप लगाबैसे रोके सक्हैं जेसब परमेश्वरके नैचिन्हैछै।

¹⁶ आब तुहेंसब पापके दास नैछैं, कहिनेकी तुहेंसब आपनसिके प्रभु येशू ख्रीष्टके द्वारा पहेला ही आजाद करि देल गेल्हैं छे। मगर खराब काम करैके लिए एकरा एकटा बहाना नैबना। मगर तोरासिके आपन कामसिके द्वारा देखाना चाही कि तुहेंसब सचमे परमेश्वरके सेवक छैं।

¹⁷ सभे आदमीसिके आदर कर। आपन सभे संगी विश्वासीसिसे प्रेम राख। परमेश्वरके डर मान। राजाके आदर कर।

ख्रीष्टके दुःखके उदाहरण

¹⁸ हे नोकरसब, जेसब घरसिमे काम करैछैं, जेसब विश्वासी छैं, तोरासिके आपन मालिकके आज्ञापालन करना चाही आर हमेशा ओकरसिके सम्मान करना चाही। एरंको सभे किसिमके मालिकके संगे कर चाहे ऊसब दयालु आर बढियाँ व्यवहार देखाबेवाला है या चाहे क्रूर है।

¹⁹ कहिनेकी यदि आपनसिके गल्ती नैभेल पर भी अपनासब बिना कारण दुःख सहैछियै आर परमेश्वर सभे बात जानैछै कहिके अपनासब सोचैछियै ते परमेश्वर अपनासिसे खुश हैछै।

²⁰ मगर यदि तुहेंसब गलत काम करिके मार खैछैं ते, सजाय मिल्ल पर धीरज राखैमे तोरसिके प्रशंसा करैके कोनो कारण नैछौ। मगर यदि भलाइ करैके कारण तुहेंसब दुःख सहैछैं आर धीरज राखैछैं ते, परमेश्वर खुश हैछै।

²¹ परमेश्वर तोरासिके बोलाबैके एकटा कारण यी छै कि तुहेंसब ओकर खातिर दुःख सही लेभैं। ख्रीष्ट, जे तोरसिके खातिर कष्ट भोगल्कै, ऊ तोरसिके उदाहरण छौ। इहे ल्याके तोरासिके ओकर कैल कामसिके अनुकरण करना चाही।

²² धरमशास्त्र कहैछै, “ऊ कहियो पाप नैकैल्कै। ऊ कहियो कोनो झुठ नैबोल्लै।”

²³ जब आदमीसब येशूके अपमान कैल्कै ते, ऊ उन्ट्याके ओकरसिके अपमान नैकैल्कै। जब आदमीसब ओकरा दुःख देल्कै ते, ऊ बदला लियैके कोशिश नैकैल्कै। बल्की, ऊ आपन सहायताके लिए परमेश्वरपर भरोसा कैल्कै। ऊ जान्ते रहै कि परमेश्वर सभे दिन न्यायपूर्ण तरिकासे आदमीसिके न्याय करैछै।

²⁴ जब ख्रीष्ट मर्लै ते आपनसिके पापके कारण क्रूसपर ओकर शरीरके सजाय देल गेलै। ऊ एरंको इहे ल्याके कैल्कै, ताकी अपनासब पाप करैले बन्द करि दियै आर धार्मिकतासे जियैले शुरु करि दियै। आर उटा घासिके कारण जे ऊ सहन कैल्कै, अपनासब ठीक भ्या गेलियै छे।

²⁵ पहेला तुहेंसब भेंडासिके जुगुर रहैं जे गलत रस्तापर जैते रहैं। मगर आब तुहेंसब ख्रीष्टके लगत वापस लौटिके ऐल्हैं छे, जे तोरसिके आत्माके देख-रेख करैछौ आर रक्षा करैछौ।