१ पत्रुस 1 - केवट नया कारार

¹ हमे, पत्रुस, जे येशू ख्रीष्टके चुन्ल आर भेज्ल चेला छियै, यी चिट्ठी लिखैछियै। हमे यी चिट्ठी परमेश्वरके चुन्ल ऊ आदमीसिके लिखैछियै जे पोन्टस, गलातिया, कापाडोकिया, एशिया प्रदेश आर बेथानियाँ प्रदेशके अलग-अलग सहरमे परदेशीसिके जुगुर रहैछै।

² परमेश्वर पिता बहुते पहेला ही तोरासिके आपन आदमी बनाबैके लिए आर पवित्र आत्माके कामके द्वारा तोरासिके पवित्र बनाबैले चुनैके फैसला कैल्कै रहे। ऊ एरं इहे ल्याके कैल्कै ताकी तुहेंसब येशू ख्रीष्टके आज्ञापालन करहैं आर ओकर खूनके द्वारा शुद्ध हुए सक्हैं। हमे प्रार्थना करैछियौ कि परमेश्वर तोरासिके बहुते अनुग्रह आर शान्ति दौ।

जिन्दा आशा

³ आपनसिके प्रभु येशू ख्रीष्टके पिता आर परमेश्वरके धन्यवाद है। परमेश्वर आपनसिके प्रति आपन बडका दयासे अपनासिके एकटा नया जीवन देल्कै छे। कहिनेकी परमेश्वर येशू ख्रीष्टके मुर्दासे जिन्दा बनैल्कै, ऊ अपनासिके बहुते आत्मविश्वासके साथ जियैके योग्य बनैल्कै छे, यानिकी अपनासब उटा चीजसिके प्राप्त करैके पुरा आशा करे सकैछियै जे ऊ अपनासिके दियैके प्रतिज्ञा कैल्कै छे।

⁴ अपनासब उटा महान आशिषसिके प्राप्त करैके लिए आगु महर देखैछियै जे आशिष परमेश्वर आपन आदमीसिके लिए राखैछै। परमेश्वर उटा आशिषसब तोरसिके लिए स्वर्गमे राख्ले छौ, जते ऊ नैसडैछै या खराब नैहैछै या नैहेराबैछै।

⁵ आर तोर विश्वासके द्वारा, परमेश्वर आपन शक्तिसे तोरसिके रक्षा करैछौ जबतक कि तुहें शैतानके शक्तिसे पुरा उद्धार पाबि नैलैछहैं जे कि ख्रीष्टके वापस आबैके दिनमे देखैल जैके लिए तैय्यार छै।

⁶ तुहेंसब यी सभे चीजसिके बारेमे खुशी हुए पडैछै, एखन कुछु समयके लिए तोरासिके विभिन्न किसिमके तकलीफ भोगे पडैछौ।

⁷ यी तकलीफसिके मकसद यी देखाबैके लिए छै कि तुहेंसब सचमे परमेश्वरमे भरोसा राखैछैं या नैराखैछैं। येशू ख्रीष्टमे भेल तोरसिके विश्वास सोनासे भी मूल्यवान छौ। जेरंके नाश हुएवाला सोनाके आगिनसे जाँच्ल जैछै आर शुद्ध बनैल जैछै, ओहिने करिके यदि तोरसिके विश्वास अग्निमय परीक्षासिके द्वारा जाँच्ल गेलके बाद भी मजगुत रहैछौ ते, यी येशू ख्रीष्ट फेर वापस आबैके दिनमे तोरासिके बहुते प्रशंसा, महिमा आर सम्मान दिलैतौ।

⁸ तुहेंसब येशूके कहियो नैदेख्लहैं छे, तैय्योपर तुहेंसब ओकरासे प्रेम करैछैं। सेल्याके तुहेंसब आनन्द आर प्रशंसाके साथ बहुते खुश छैं जकरा शब्दमे बयान नैकैल ज्या सकैछै।

⁹ कहिनेकी परमेश्वर तोरसिके आत्माके पूर्ण रुपसे पापके सजायसे बच्या रहलौ छे। यी येशू ख्रीष्टमे तोरसिके विश्वासके इनाम छौ।

¹⁰ यी उद्धारके बारेमे परमेश्वरके वक्तासब आरहौ बेसी जानैले चहते रहै। ऊसब भविष्यवाणी कैल्कै कि परमेश्वर तोरासिके बचाबैके लिए तोरसिके पक्षमे केरंके अनुग्रहके साथ व्यवहार कर्तौ, जकर योग्य तुहेंसब नैरहैं। ऊसब जबाब खोजैके लिए सावधानीपूर्वक अध्ययन कैल्कै।

¹¹ ख्रीष्टके आत्मा ओकरासिमे रहै आर ओकरासिके बतैते रहै कि ख्रीष्ट केरंके दुःख सहतै आर फेर ओकरा बडका सम्मान देल जैतै। इहे ल्याके ऊसब यी पता लगाबैके कोशिश कैल्कै कि वास्तवमे ख्रीष्ट के हैतै आर यी सभे बात कहिया हैतै।

¹² मगर परमेश्वर यी आपन वक्तासिके बतैल्कै कि ओकरसिके सन्देश ओकरसिके लिए नै मगर तोरसिके लिए रहै। उटा सन्देश येशू ख्रीष्टके विषयमे खुश-खबरी छै जे एखन तुहेंसब सुन्लहैं छे। परमेश्वर स्वर्गसे आपन पवित्र आत्मा भेजल्कै ताकी तोरासिके खुश-खबरी प्रचार करैमे आदमीसिके सहायता करै। यी सभे बात एतनें अदभुद छै कि एत्तेतक कि स्वर्गदूतसब भी उत्सुकतासे यी चीजसिके हैते हुए देखैछै।

पवित्र रहन-सहन

¹³ सेल्याके सचेत र कि तुहेंसब कि करेवाला छैं आर होशियार र। उद्धार पाबैके आशा कर, जे अनुग्रहसे आबैछै, जे तोरासिके येशू ख्रीष्ट यी संसारमे फेर वापस आबैके दिनमे देल जैतौ।

¹⁴ परमेश्वरके आज्ञापालन कर जेरंके बढियाँ बच्चा आपन बाबुके आज्ञापालन करैछै। आपन खराब इच्छासिके संतुष्ट बनाबैके लिए आपन जीवन जियैके पुरना तौर-तरिकाके महर वापस नैजो।

¹⁵ तुहेंसब करेवाला सभे बातमे खुदके खराब बातसे अलग कर, कहिनेकी परमेश्वर, जे तोरासिके चुनल्कौ ऊ पवित्र छै।

¹⁶ कहिनेकी धरमशास्त्रमे एरं लिख्ल छै, “तोरासिके पवित्र होना चाही कहिनेकी हमे पवित्र छियै।”

¹⁷ जब तुहेंसब प्रार्थना करैछैं ते तुहेंसब परमेश्वरके आपन पिता कहैछैं। मगर याद राख कि ऊ पक्षपात नैकरिके हरेक आदमीके ओकर कामके मुताबिक फैसला करैछै। इहे ल्याके जब कि तुहेंसब यी धर्तीपर एकटा परदेशी बनिके रहैछैं ते तोरा ओकर प्रति बहुते सम्मानके साथ जिना चाही।

^18-19 तुहेंसब जानैछैं कि परमेश्वर तोरासिके तोरसिके बेकारके रिती-रिवाजसिसे छुटाबैके लिए जे तुहेंसब आपन बाप-पुर्खासिसे सिख्लहैं रहैं। ऊ तोरासिके छुटकारा दिलाबैके लिए एरंको दौलतके प्रयोग नैकैल्कै जकरा चानी या सोनाके जुगुर नाश कैल ज्या सकैछै। एकर बदलामे, परमेश्वर तोरासिके ख्रीष्टके बहुमूल्य खूनसे किनल्कौ जे आपनसिके पापके लिए बलिके रुपमे मरि गेलै। ओकर मौत आपनसिके लिए परमेश्वरके छागरके रुपमे एकटा सिद्ध बलिदान रहै, जेरं कि यहूदी पुजारीसिके द्वारा बलि चढैल ज्यावाला छागर सिद्ध आर बिना कोनो दाग आर खोटके रहै।

²⁰ यी संसारके सृष्टि कैल जैसे पहेला, परमेश्वर समयसे पहेला यी निर्धारित करि लेल्कै रहे कि येशू ख्रीष्ट उद्धारकर्ता हैतै। मगर ऊ तोरासिके सहायता करैके लिए यी अन्तिम दिनसिमे यी संसारमे प्रकट भेलै छे।

²¹ ख्रीष्टके कैल कामद्वारा परमेश्वरपर तोरसिके भरोसा छौ, जे ख्रीष्टके मुर्दासे जिन्दा बन्याके महिमा देल्कै, ताकी तोरसिके आशा आर विश्वास परमेश्वरमे रहौ।

²² कहिनेकी तुहेंसब सचके पालन करिके शुद्ध भेल छैं, आब तोरासिके आपन विश्वासी भ्या-बहिनसिके निष्कपट प्रेम करे पडैछै। तुहेंसब एक दोसरके पुरा हृदयसे बहुते गहरा प्रेम कर।

²³ कहिनेकी तुहेंसब परमेश्वरसे नया जीवन पैल्हैं छे। तुहेंसब यी जीवन नाश हुएवाला चीजसे नैपैल्हैं छे मगर सभे दिन रहेवाला चीजसे पैल्हैं छे। अपनासब यी नया जीवन जिन्दा आर कहियो खतम नैहुएवाला परमेश्वरके वचनसे पैल्हैं छे।

²⁴ धरमशास्त्र एरं कहैछै, “सभे आदमीसब घासके जुगुर छै आर ओकरसिके सभे सुन्दरता जंगली फूलसिके जुगुर छै। घास सुखी जैतै आर फूल झडी जैतै।

²⁵ मगर परमेश्वरके वचन सभे दिन रहतै।” यी वचन ख्रीष्टके विषयमे खुश-खबरी छै जे तोरसिके बीचमे प्रचार कैल गेलै रहे।