१ यूहन्ना 2 - केवट नया कारारयेशू आपनसिके सहायक 1 तुहेंसब जे हमर प्यारा बच्चासिके जुगुर छैं, तुहेंसब कोनो भी प्रकारके खराब काम नैकर कहिके हमे तोरासिके यी लिखैछियौ। अगर कोय आदमी कोनो भी प्रकारके खराब काम कर्बो कर्तै ते, परमेश्वर पिताके संगे आपनसिके खराब कामके माफीके लिए बिन्ती करि दिएवाला एकटा सहायक छै, ऊ आदमी येशू ख्रीष्ट छै, जे पूर्ण रुपसे परमेश्वरके समनामे सही छै। 2 ऊ आपनसिके पापके लिए प्रायश्चित-बलि छै आर खाली आपनसिके लिए नै, मगर संसारके सभे आदमीसिके पापके लिए भी प्रायश्चित-बलि छै। परमेश्वरके आज्ञाके पालन करना 3 यदि अपनासब परमेश्वरके आज्ञापालन करैछियै ते, एक्रहैसे अपनासब मालुम करे सकैछियै कि अपनासब ओकरा चिन्हैछियै। 4 यदि कोय आदमी कहैछै कि हमे परमेश्वरके चिन्हैछियै मगर ऊ आदमी परमेश्वरके आज्ञापालन नैकरैछै ते, ऊ आदमी झुट्ठा छै आर ऊ आदमी परमेश्वरके आज्ञाके मुताबिक नैजियैछै। 5 मगर जे आदमी परमेश्वरके वचन पालन करैछै, ओकरामे परमेश्वरप्रतिके प्रेम सच्चेके सिद्ध भेल छै। अपनासिके एक्रहैसे मालुम हैछै कि अपनासब ओकरामे एक भेल छियै, 6 यदि कोनो आदमी दावा करैछै कि हमे येशूमे एक भेल छियै, ते ऊ आदमीके, येशू जेरंको जीवन जिलै ओहिने जीवन जिना चाही। प्रेम करैके आज्ञा 7 हे प्यारा विश्वासी भ्या-बहिनसब, यी एरंको बात नैछै जे तुहेंसब पहेला कहियो नैसुन्लहैं छे, मगर यी एरंको बात छै जे तोरासिके शुरुसे ही मालुम छौ आर अनुसरण भी कैल्हैं छे। यी पुरना आज्ञा उटा वचन छै, जे तुहेंसब ख्रीष्टमे विश्वास करैके समयमे सुन्लहैं रहे। 8 तैय्योपर हमे तोरासिके एकटा नया आज्ञा लिखैछियौ आर यी सच्चाई ख्रीष्टमे आर तोरासिमे भी दिखाई पडैछै। कहिनेकी दुष्टता खतम हैले जैछै मगर आदमीसब परमेश्वरके सच्चाई उजेतके जुगुर ख्रीष्टके जीवनमे देखैछै। 9 जे कोय कहैछै कि ऊ उजेतमे जियैछै मगर आपन विश्वासी भ्यासे घृणा करैछै ते ऊ एखनतक दुष्टताके अनहारमे ही जियैछै। 10 जे कोय आपन विश्वासी भ्यासे प्रेम करैछै, ऊ उजेतमे जियैछै जे परमेश्वरके सही बातमे जिना छै आर ओकरामे दोसरके पाप करैले लगाबेवाला कोनो बात नैहैछै। 11 मगर जे कोय आपन विश्वासी भ्यासे घृणा करैछै, ऊ दुष्टताके अनहारमे जियैछै आर दुष्टताके अनहारमे चलैछै, आर ऊ कते जैछै, से नैजानैछै, कहिनेकी ऊ दुष्टताके अनहार ओकर आँखके अनराह बन्या देल्कै छे। चिट्ठी लिखैके कारण 12 तुहेंसब जे हमर प्यारा बच्चासिके जुगुर छैं, हमे तोरासिके इहे ल्याके लिखैछियौ, कहिनेकी येशू ख्रीष्ट जे काम कैल्कै छे ओकर कारणसे परमेश्वर तोरसिके पापसिके माफ करि देल्कौ छौ। 13 तुहेंसब जे हमर बाबुके जुगुर छह, हमे तोरासिके इहे ल्याके लिखैछिहौं, कि जे शुरुहैसे छै तुहेंसब ओकरा चिन्हैछह। हे जवानसब, हमे तोरासिके इहे ल्याके लिखैछियौ, कि तुहेंसब शैतानके जित्ले छैं। तुहेंसब जे हमर प्यारा बच्चासिके जुगुर छैं, हमे तोरासिके इहे ल्याके लिखैछियौ, कि तुहेंसब परमेश्वर पिताके चिन्हले छैं। 14 तुहेंसब जे हमर बाबुके जुगुर छह, हमेसब तोरासिके इहे ल्याके लिखैछिहौं, कि जे शुरुहैसे छै ओकरा तुहेंसब चिन्हैछह। हे जवानसब, हमे तोरासिके इहे ल्याके लिखैछियौ, कि तुहेंसब विश्वासमे मजगुत छैं, आर परमेश्वरके वचन तोरासिमे रहैछौ आर तुहेंसब शैतानके जित्ले छैं। संसारके विषयमे चेतावनी 15 तुहेंसब संसार आर संसारमे भेल कोनो चीजके प्रेम नैकर। यदि कोय आदमी संसारके प्रेम करैछै ते, परमेश्वर पिताके प्रेम ओकरामे नैछै। 16 कहिनेकी शरीरके आनन्द पुरा करैके इच्छा करना, देख्ल चीजसिके आपनसंगे हुऐके इच्छा करना, आपन संगमे भेल चीजपर आर आपन कैल कामपर घमण्ड करना, यी सभे चीज संसार दैछै। यी बातसब परमेश्वर पिताके तरफसे नैऐलै छे मगर संसारके तरफसे ऐलै छे। 17 संसार आर एकरामे भेल सभे चीजसब खतम भ्याके जैछै, मगर परमेश्वरके चहेल काम करेवाला आदमी सभे दिनके लिए जियैछै। अन्तिम समयके धोखा 18 तुहेंसब जे हमर प्यारा बच्चासिके जुगुर छैं, यी संसारके अन्तिम दिनसब छै, आर ख्रीष्ट विरोधीसब आबैछै कहिके तुहेंसब सुन्लहैं छे। ओकर मुताबिक आब बहुते ख्रीष्ट विरोधीसब ऐल छै। एकरासे हमेसब जानैछियै कि यी अन्तिम समय छै। 19 ख्रीष्ट विरोधीसब आपनसिके संगे रहै मगर एखन ऊसब आपनसिके संगति छोडिके चल गेलै छे। यदि ऊसब आपनसिके जुगुर सच्चा विश्वासीसब हैतियै ते, ऊसब आपनसिके साथमे ही रहतियै। ऊसब चल गेलै, जकरासे यी स्पष्ट हैछै कि ओकरासिमेसे कोय भी आपनसिके जुगुर सच्चा विश्वासी नैरहै। 20 मगर ख्रीष्ट तोरासिके पवित्र आत्मा देल्कौ छे, आर तुहेंसब सभे सच्चाई जानैछैं जे परमेश्वर प्रकट कैल्कै छे। 21 हमे तोरासिके इहे ल्याके नैलिखैछियौ, कि तुहेंसब सच्चाईके नैजानैछैं, मगर सेल्याके कि तुहेंसब परमेश्वरके प्रकट कैल सच्चाईके जानैछैं आर सेल्याके कि कोनो भी झुठ सच्चाईके तरफसे नैआबैछै। 22 झुट्ठा के छै? एकदम झुट्ठा ऊ छै जे येशू ही ख्रीष्ट छै कहिके इन्कार करैछै आर ख्रीष्ट विरोधीसब उहे छै, जे परमेश्वर पिता आर ओकर बेटाके इन्कार करैछै। 23 जे कोय परमेश्वरके बेटाके इन्कार करैछै ऊ परमेश्वर पिताके संगे एक भेल नैछै। जे कोय परमेश्वरके बेटाके स्वीकार करैछै ऊ परमेश्वर पिताके संगे एक भेल छै। 24 सच्चा सन्देश जे तुहेंसब ख्रीष्टके विश्वास करैके समयसे ही सुन्लहैं छे, उटा तोरासिमे राख्ले र। यदि उटा बात तोरासिमे रहतौ ते तुहेंसब भी सभे दिन परमेश्वर पितामे आर परमेश्वरके बेटामे एक भ्याके रहभैं। 25 आर परमेश्वर अपनासिके यी वादा कैल्कै छे कि ऊ अपनासिके कहियो खतम नैहुएवाला जीवन देतै। 26 हमे तोरासिके ऊ आदमीसब जेसब आपनसिके संगतिके छोडी देल्कै छे ओकरसिके बारेमे चेतावनी दैछियौ जेसब तोरासिके झुट्ठा शिक्षाके द्वारा छल करैके कोशिश करैछौ। 27 आर तोरसिके लिए, पवित्र आत्मा, जकरा तुहें ख्रीष्टसे प्राप्त कैल्हैं छे, तोरासिमे बास करैछौ। सेल्याके कक्रहौसे तोरासिके सच्चाई सिखैके जरुरत नैछै। मगर पवित्र आत्मा तोरासिके सभे बातके विषयमे सच्चाई जानैके लिए सहायता कर्तौ, कहिनेकी ओकर अभिषेक तोरा जरुरत पडल सभे बात सिखाबैछौ। आर जे बात पवित्र आत्मा तोरासिके सिखाबैछौ ऊ पुरा रुपसे सच्चा छै बिना कोनो झुठके। सेल्याके पवित्र आत्माके कहेल जुगुर ख्रीष्टमे एक भ्याके र। परमेश्वरके सन्तान 28 तुहेंसब जे हमर प्यारा बच्चासिके जुगुर छैं, निरन्तर ख्रीष्टमे एक भ्याके र। ताकी जब ऊ फेर यी संसारमे वापस ऐतै, अपनासिके साहास है आर ओकर फेर वापस आबैके समयमे अपनासिके ओकर आगुमे शर्माबे नैपडै। 29 यदि तुहेंसब जानैछै कि ख्रीष्ट परमेश्वरके नजरमे जे सही छै उहे काम करैछै ते यी बात भी जानैछैं कि जे कोय परमेश्वरके नजरमे जे सही छै उहे काम करैछै ऊसब परमेश्वरके बेटा-बेटीसब छै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation