१ यूहन्ना 1 - केवट नया कारारजीवनके वचनके घोषणा 1 हमे यी चिट्ठी तोरासिके ओकर विषयमे लिखैछियौ जे आदमीसिके लिए परमेश्वरके सन्देश छै आर आदमीसिके वास्तविक जीवन दैछै। ऊ संसारके सृष्टि हुऐसे पहेलासे ही रहै, मगर आब हमेसब आपनहैंसे ओकरा सुन्लियै छे आर हमेसब ओकरा आपन आँखसे देख्लियै छे, हमेसब ओकरा बडा ध्यानसे देख्लियै छे आर हमरसिके हातसे ओकरा छुलियै छे। 2 परमेश्वर आदमीसिके, उटा आदमीके देखैल्कै छे जे वास्तविक जीवन दैछै आर हमेसब ओकरा देख्लियै। सेल्याके हमेसब तोरासिके सच्चा बात बताबैछियौ। हमेसब तोरासिके कहैछियौ कि जे कहियो खतम नैहुएवाला जीवन दैछै ऊ सभे दिनके लिए रहैछै। बहुते समय पहेलासे ऊ परमेश्वर पिताके संगमे रहै मगर आब परमेश्वर ओकरा अपनासिके देखैल्कै छे। 3 सेल्याके यी आदमी जकरा हमेसब देख्लियै आर सुन्लियै छे, ऊ उहे व्यक्ति छै जकर बारेमे हमेसब तोरासिके कहैछियौ, ताकी तुहेंसब भी ओकरापर भरोसा राखैके लिए हमरसिके संगे जुडे सक्हैं। कहिनेकी अपनासब खुद भी परमेश्वर आपनसिके पिता आर ओकर बेटा येशू ख्रीष्टके संगे जुड्ल छियै। 4 यी बात हमेसब इहे कारणसे लिखैछियौ कि आपनसिके आनन्द पुरा भ्याजै। परमेश्वर उजेत छै 5 मगर जे संदेश अपनासिके येशू ख्रीष्ट कहैल्कै आर जे तोरासिके प्रचार करैछियौ, ऊ इहे छै कि परमेश्वर उजेतके जुगुर बढियाँ आर शुद्ध छै आर ओकरामे अनहारके जुगुर एक्कोरति दुष्टता नैछै। 6 सेल्याके यदि अपनासब यी कहैछियै कि अपनासब परमेश्वरके संगे संगतिमे जुड्ल छियै छै मगर आरहौ भी दुष्ट काम करैछियै ते, अपनासब झुठ बोलैछियै आर सच्चाईके मुताबिक नैजियैछियै। 7 मगर जब अपनासब परमेश्वरके उजेतके द्वारा देखैल सही काम करैछियै, ओकर शुद्धताके मुताबिक जेरंके परमेश्वर सभे दिन सही काम करैछै, तब आपनसिके संगति एक दोसरके संगे हैछै आर ओकर बेटा, येशू ख्रीष्टके खून आपनसिके सभे पापसब शुद्ध करैछै। 8 यदि अपनासब कहैछियै कि अपनासिमे कोनो पाप नैछै ते अपनासब अपने आपके धोखा दैछियै आर अपनासिके उटा सच्चा बात मालुम नैछै जे परमेश्वर प्रकट कैल्कै छे। 9 यदि अपनासब परमेश्वरके समनामे आपन पाप स्वीकार करि लैछियै ते ऊ आपनसिके पाप माफ कर्तै आर सभे अधर्मसे अपनासिके शुद्ध करैछै, कहिनेकी ऊ सभे दिन जे कहैछै उहे करैछै आर ऊ सभे दिन उहे करैछै जे सही छै। 10 यदि अपनासब कहैछियै कि अपनासब पाप नैकैलियै छे ते अपनासब परमेश्वरके झुट्ठा बनाबैछियै आर यी देखाबैछै कि अपनासब एखनतक ओकर वचनके स्वीकारे नैकैलियै छे। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation