१ कोरन्थी 9 - केवट नया कारारचुन्ल आर भेज्ल चेलासिके अधिकार 1 हमे आपन चहेल भोजन खैके लिए आजाद छियै। हमे चुन्ल आर भेज्ल चेला छियै। हमे आपनसिके प्रभु येशूके देख्लियै छे। तुहेंसब प्रभुके लिए कैल गेल हमर सेवाके परिणाम छैं। 2 यदि दोसर आदमीसब हमे प्रभु येशूके चुन्ल आर भेज्ल चेला छियै कहिके स्वीकार नैकरैछै ते, तुहें विश्वासी भ्यासिके यी स्वीकार करना चाही। कहिनेकी हमे उहे छियै जे तोरलगत खुश-खबरी ल्याके ऐलियौ रहे। प्रभु येशूमे तोरसिके विश्वास यी स्पष्ट करैछै कि हमे वास्तवमे ओकर चुन्ल आर भेज्ल चेला छियै। 3 हमर चुन्ल आर भेज्ल चेला हुऐके अधिकारपर दोष लगाबेवाला आदमीसिके लिए यी हमर जबाब छै। 4 हमरा आर बरनाबासके चुन्ल आर भेज्ल चेला हुऐके कारण अधिकार छै कि हमरसिके कामके लिए आर्थिक सहायता पाबियै। 5 कहिनेकी दोसर चुन्ल आर भेज्ल चेलासब, प्रभुके भ्यासब आर पत्रुस आपन विश्वासी पतनीसिके आपनसंगे ल्याजैछै जब ऊसब यात्रा करैछै, ते हमरलगत भी यी अधिकार छै। 6 हमरा आर बरनाबासके भी दोसर चुन्ल आर भेज्ल चेलासिके जुगुर आर्थिक सहायता पाबैके अधिकार छै आर आपन जीवनके लिए काम करैके जरुरत नैछै। 7 एकटा सेनाके कहियो भी आपन खर्चा खुद नैदिये पडैछै। एकटा आदमी जे अंगुरके बगान लगाबैछै ऊ आदमी बगानके कुछु फल खैके आशा करैछै। आर एकटा चरवाहा आपन भेंडासिके दूध पियैके आशा करैछै। 8 हमे यी बात आदमीसिके विचारसे नैकहैछियौ। मूसाके विधि-विधान भी यी बात कहैछै। 9 मूसाके विधि-विधानमे यी लिख्ल गेलै छे, “तुहेंसब दौनी करैके समयमे गरुके मुखमे जाबी नैलगा।” कि तोरासिके लागैछौ कि यी खाली गरुसिके विषयमे ही परमेश्वरके चिन्ता छै? हर्गिस नै! 10 यी बात खास करिके आपनसिके विषयमे छै। कहिनेकी खेत जोतेवाला आदमीसब कुछु आशासे ही खेत जोतैछै आर खम्हारमे दौनी करेवाला आदमी अनाजके कुछु हिस्सा पाबैके आशामे ही दौनी करैछै। 11 हमेसब तोरसिके बीचमे आत्मिक बिहन बुन्लियौ, सेल्याके यी आशा करना बहुते बेसी नैछै कि हमरासिके तोरसिसे भौतिक फैदाके कटनी करना चाही। 12 तोरसिके बीचमे प्रचार करेवाला दोसर आदमीसिके तुहेंसब आर्थिक सहायता करैके कारणसे जरुर ही बरनाबास आर हमे एकर लिए आरहौ बेसी योग्य छियै कहिनेकी हमेसब तोरसिके लिए चुन्ल आर भेज्ल चेला रहियै। तैय्योपर भी, हमरसिमेसे कोय भी यी बातके उप्परमे जोड नैदेलियौ कि तुहेंसब हमरासिके जरुरत पडल चीजसब दे। एक बदलामे, हमेसब कोनो भी बात सहैके लिए तैय्यार भेलियै, ताकी हमेसब ख्रीष्टके विषयमे खुश-खबरीपर विश्वास करैमे कक्रहौ भी बाधा नैदियै। 13 कि तोरासिके मालुम नैछौ, कि परमेश्वरके मन्दिरमे काम करेवाला आदमीसिके मन्दिरसे भोजन मिलैछै? हौं, जे आदमीसब वेदीमे बलिदान चढाबैछै ओकरासिके उटा बलिदानसे हिस्सा मिलैछै। 14 ओहिने करिके प्रभु भी आज्ञा देल्कै छे कि खुश-खबरी प्रचार करेवाला आदमीसिके गुजारा खुश-खबरी सुनेवाला आदमीसिके द्वारा ही होना चाही। 15 मगर हमे एकरामेसे एकटा अधिकारके भी प्रयोग नैकैलियौ। हमे यी नैलिखैछियौ कि आब तुहेंसब हमर लिए कुछु कर्हैं। एकदम नै! हमर लिए मरना बढियाँ हैतै! कहिनेकी कोय भी हमरा यी बातके घमण्ड करैसे नैरोके सकैछै कि हमे खुद ही आपन खियाल राखैछियै। 16 यदि हमे खुश-खबरी प्रचार करैछियै ते, हमरा यी बातमे घमण्ड करैके लिए कोनो कारण नैछै। कहिनेकी यी ते हमरा सौंप्ल जिम्मेदारी छै। यदि हमे खुश-खबरी प्रचार नैकरैछियै ते, हमरा बहुते भयानक हैतै! 17 यदि हमे यी काम आपन इच्छासे करैछियै ते हमे इनाम पैबै। मगर यदि परमेश्वर हमरा यी जिम्मेदारी सौंपल्कै छे ते, हमे कोनो इनामके आशा नैकरे सकैछियै। 18 तब हमर इनाम कि छै? आर कुछु भी नै मगर हमर आनन्द यी छै कि ओकरसिसे आपन गुजारा चलाबैके खर्चा पाबैके लिए हमरसंगे अधिकार भेलपर भी बिना आर्थिक सहायताके खुश-खबरी प्रचार कर्बै। सभैके सेवा 19 एकर मतलब यी छै कि हमे आदमीसिके आज्ञापालन करैके लिए मजबूर नैछियै, खाली इहे ल्याके कि ऊसब हमरा आर्थिक सहायता करैछै, तैय्योपर भी हमे सभैके दास बन्ल छियै ताकी हमे बहुतेसे बहुते आदमीसिके ख्रीष्टमे विश्वास करैके लिए आने सकियै। 20 यानिकी, जब हमे यहूदी आदमीसिके संगे छियै ते, हमे ओकरासिके ख्रीष्टमे विश्वास करैले आनैके लिए एकटा यहूदी आदमीके जुगुर रहते रहियै। जब हमे विधि-विधानके पालन करेवाला आदमीसिके संगे रहियै ते, हमे भी उटा विधि-विधानके अधिनमे रहते रहियै। हमरा विधि-विधान पालन करैके जरुरत नैरहै, तैय्योपर भी हमे विधि-विधानके अधिनमे भेल आदमीसिके ख्रीष्टमे विश्वास करैले आनैके लिए यी कैलियै। 21 ओहिने करिके जब हमे गैर-यहूदी आदमीसिके संगे काम करैछियै, हमे एकटा गैर-यहूदी आदमी जे यहूदी विधि-विधानके पालन नैकरैछै ओहिने रहैछियै, ताकी हमे ओकरासिके जिते सकियै। एकर मतलब यी नैछै कि हमे परमेश्वरके आज्ञापालन नैकरैछियै कहिनेकी हमे सभे दिन ख्रीष्टके आज्ञापालन करैछियै। 22 जब हमे कमजोर विश्वास भेल आदमीसिके संगे हैछियै ते, हमे ओकरसिके जुगुर व्यवहार करैछियै, ताकी हमे ओकरासिके ख्रीष्टमे विश्वास करैके लिए सहायता करे सकियै। हमे सभे आदमीसिके लिए सभे कुछु बन्लियै छे, ताकी कोनो नें कोनो तरहसे कुछु आदमीसिके बचाबे सकियै। 23 आर हमे सभे कुछु ख्रीष्टके बारेमे खुश-खबरीके प्रचार करैके लिए करैछियै, ताकी हमरा खुश-खबरीमे प्रतिज्ञा कैल गेल आशीर्वादके हिस्सा देल ज्या सकै। 24 जेरं दौडमे दौडेवाला सभेकोय दौडैछै, मगर इनाम ते एक्के झन पाबैछै। ओहिने करिके, अपनासिके परमेश्वरके खुश बनाबेवाला सभे काम करना चाही, ताकी अपनासब परमेश्वर भविष्यमे दिएवाला इनाम पाबे सकियै। 25 दौडमे हिस्सा लिए चाहेवाला आदमीसब पहेला अभ्यास करैछै आर खुदके अनुशासनमे राखैछै। ऊसब एरं इहे ल्याके करैछै ताकी ऊसब जिते सकै आर आदर पाबे सकै। ओकरासिके आदर करैके लिए ओकरासिके फूलके मल्ला लग्या दैछै जे बहुते समयतक नैरहैछै। मगर येशू ख्रीष्टमे विश्वास राखेवाला सभेको आदर पैतै आर अपनासिके देल आशिष सभे दिन रहतै। सेल्याके अपनासिके खुदके अनुशासनमे राखना चाही। 26 जेरंके एकटा दौडेवाला खेलाडी आपन दौडके दिशामे आगु बढैछै या एकटा मुक्केबाज आपन मुक्काके काबुमे राखैछै, ओहिने करिके हमे आपन ख्रीष्टियन जीवन एकटा निश्चित मकसदके साथ जियैछियै। 27 हमे आपन शरीरके अनुशासनमे राखैछियै ताकी हमे शरीरके अभिलाषाके मुताबिक नैचलियै कहीं एरं नैहै कि हमे जे दोसर आदमीसिके खुश-खबरी प्रचार करैछियै, हमे खुद ही इनाम नैपाबियै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation