१ कोरन्थी 7 - केवट नया कारार

बिहाके सिद्धान्त

¹ आब ऊ सवालसिके विषयमे जे तुहेंसब आपन चिट्ठीमे पुछलहैं रहे, “कि हमरसिके लिए यी बढियाँ हैतै कि बिहा नैकरियै?”

² मगर परीक्षामे पडिके अनैतिक कामसिके करना आदमीसिके लिए बहुत ही आसान बात छै। हमे यी सल्लाह दैछियै कि हरेक आदमी बिहा करक आर आपन पतनीके संगे वफादार रहक। आर हरेक जनानी बिहा करक आर आपन पतिके संगे वफादार रहक।

³ एकटा आदमीके पति हुऐके कर्तव्य पुरा करना चाही आर एकटा जनानीके पतनी हुऐके कर्तव्य पुरा करना चाही आर दोनोके एक दोसरके जरुरतके पुरा करना चाही।

⁴ पतनीके आपन शरीरपर अधिकार नैछै मगर ओकर पतिके अधिकार छै, ओहिने करिके पतिके भी आपन शरीरपर अधिकार नैछै मगर ओकर पतनीके अधिकार छै।

⁵ तुहेंसब एक दोसरसे अलग नै र, मगर एक दोसरके सहमतिसे कुछु समय प्रार्थनामे बिताबैके लिए अलग रहे सकैछैं; आर फेर पति पतनीके जुगुर तुहेंसब एक साथ र। ताकी शैतान अनैतिक जीवन जियैके लिए तोरसिके परीक्षा नैकरौ नैते तुहेंसब आपन इच्छासिके काबुमे नैकरे सक्भैं।

⁶ मगर जे हमे कहैछियौ ऊ खाली सल्लाह छै नै कि आज्ञा।

⁷ हमे यी चाहैछियै, कि जेरं हमे अविवाहित छियै ओहिने करिके सभे आदमी अविवाहित रहै, मगर हरेकके परमेश्वरके विशेष वरदान मिल्लै छे, कक्रहौ-कक्रहौ परमेश्वर बिहा करैके वरदान दैछै आर कक्रहौ-कक्रहौ अविवाहित रहैके वरदान दैछै।

अविवाहितसिके लिए सल्लाह

⁸ आब अविवाहित आर मोसामातसिके लिए हमर सल्लाह यी छै कि ऊसब हमर जुगुर अविवाहित रहना उत्तम छै।

⁹ मगर ऊसब आपन इच्छाके काबुमे नैराखे सकैछै ते ऊसब बिहा करक, कहिनेकी बिहा करना असन्तुष्ट इच्छा आर चाहनाके राखैसे बढियाँ छै।

¹⁰ जकरसिके बिहा भ्यागेलै छे, ओकरासिके हमे नै मगर प्रभु येशू आज्ञा दैछै कि पति आपन पतनीके छुटापत्र नैदक।

¹¹ आर यदि छुटापत्र भ्या भी जै ते बिहा नैकरिके जीवन बिताबक या फेर आपन पतिसे मेल-मिलाप करि लक आर पति आपन पतनीके छुटापत्र नैदक।

¹² आब हमे बाँकी विश्वासीसिसे बात करैछियै जेसब एरंको व्यक्तिसिसे बिहा कैल्कै छे जेसब विश्वासी नैछै। यदि कोनो विश्वासी भ्याके एरंको जनानीसे बिहा कैल्कै छे जे अविश्वासी छै मगर ऊ जनानी ऊ आदमीके संगे लगातार जीवन बिताबैके लिए इच्छुक छै ते ऊ आदमी आपन पतनीके छुटापत्र नैदक। यी प्रभुके आज्ञा नैछै। यी हमर सल्लाह छै।

¹³ आर आब यदि कोनो जनानीके पति अविश्वासी छै, मगर ऊ आदमी आपन पतनीके संगे लगातार जीवन बिताबैके लिए इच्छुक छै ते ऊ जनानी आपन पतिके छुटापत्र नैदक।

¹⁴ कहिनेकी यदि तुहें एकटा विश्वासी पतनी छैं जे अविश्वासी पतिके संगे रहैछैं ते, तोर पति भी तुहें विश्वासी हुऐके कारण प्रभुके छै। आर यदि तुहें एरंको विश्वासी पुरुष छैं जे अविश्वासी पतनीके संगे रहैछैं ते, तोर पतनी भी तुहें विश्वासी हुऐके कारण प्रभुके छै। अगर यी बात सच नैहैतियै कि तोर अविश्वासी पति या पतनी परमेश्वरके छै, ते तोरसिके बच्चासब भी परमेश्वरके नैहैतियै। मगर आब तोरसिके बच्चासब भी परमेश्वरके छै।

¹⁵ जब अविश्वासी पति या पतनी छुटापत्र दियैले चाहैछै ते, विश्वासीके विवाहित रहैके कोनो जरुरत नैछै। यदि तोर अविश्वासी पति या पतनी तोरा छुटापत्र दियैले चाहैछै ते ओकरा तोरा छुटापत्र दियैले दहैं, कहिनेकी परमेश्वर अपनासिके शान्तिमे रहैले कहैल्कै छे।

¹⁶ हे विश्वासी पतनीसब तुहेंसब यी बातमे केरंके निश्चित हुए सकैछैं कि तुहेंसब आपन पतिके नैबचाबे सक्भैं? या हे विश्वासी पतिसब तुहेंसब यी बात पर केरंके निश्चित हुए सकैछैं कि तुहेंसब आपन पतनीके बचाबे नैसक्भैं?

¹⁷ एखनतक जे हमे बतैले ऐलियौ छे ओकर सार बात यी छै: कि हरेक आदमीके आपन दैनिक जीवन उहे स्थितिमे जिना चाही जे स्थितिमे ऊ जिते रहै जब परमेश्वर ओकरा आपन आदमी हुऐके लिए बोलैल्कै रहे। आर इहे नियम हमे सभे मण्डलीसिमे सिखाबैछियै।

¹⁸ उदाहरणके लिए जब एकटा यहूदी आदमी प्रभु येशूपर विश्वास करैछै ते, ओकरा आपन यहूदी आदमी हुऐके पहचानके त्यागैके जरुरत नैछै। आर अहिने करिके कोनो आदमी जे गैर-यहूदी छै ऊ प्रभुमे विश्वास करैछै ते, ओकरा यहूदी आदमी बनैके लिए खतना करैके जरुरत नैछै।

¹⁹ ककरो खतना भेल छै या नैछै, एकरासे कोनो फरक नैपडैछै मगर परमेश्वरके आज्ञापालन करना बहुते महत्वपूर्ण छै।

²⁰ हरेक आदमीके आपन दैनिक जीवन उहे स्थितिमे जिना चाही जे स्थितिमे ऊ जिते रहै जब प्रभु ओकरा आपन आदमी हुऐके लिए बोलैल्कै रहे।

²¹ यदि तुहें दासके स्थितिमे बोलैल गेल्हैं छे ते, तोरा यी बात खराब नैलागना चाही, मगर तोर मालिक कहैछौ कि तुहें मुक्त भ्याके ज्या सकैछैं ते मुक्त भ्याके जो।

²² कहिनेकी जे आदमीके प्रभु दासके स्थितिमे आपन आदमी हुऐके लिए बोलैल्कै, ऊ एकटा आजाद आदमीके जुगुर छै कहिनेकी प्रभु येशू ओकरा ओकर पापसे उद्धार देल्कै छे। आर ओहिने करिके जे आदमी आजादीके स्थितिमे बोलैल गेलै छे ऊ आदमी ख्रीष्टके दास छै।

²³ परमेश्वर तोर लिए बडका मोल चुकैल्कौ छे, सेल्याके आदमीसिके दास नैबन, मगर प्रभुके दास बन।

²⁴ हे विश्वासी भ्या-बहिनसब, हरेक आदमीके आपन दैनिक जीवन परमेश्वरके संगे उहे स्थितिमे जिना चाही जे स्थितिमे ऊ जिते रहै जब प्रभु ओकरा आपन आदमी हुऐके लिए बोलैल्कै रहे।

बिहा सम्बन्धित सवाल

²⁵ आब कुमारीसिके विषयमे प्रभुसे हमरा कोनो आज्ञा नैमिल्लै छे, “मगर प्रभु आपन दयासे हमरा बुद्धि देल्कै छे जकरापर भरोसा कैल ज्या सकैछै आर ओकरे मुताबिक हमे सल्लाह दैछियै।”

²⁶ कहिनेकी यी समयमे सभे जगहमे विश्वासीसिके लिए कठिन बातसब हैछै, सेल्याके अविवाहित आदमीसिके हमे यी सल्लाह दैछियै कि ऊसब अविवाहित ही रहक।

²⁷ अगर तोरसिकेलगत पतनी छौ ते बिहाके सम्बन्ध नैतोड आर अगर तोरसिकेलगत पतनी नैछौ ते बिहा नैकर।

²⁸ मगर यदि तुहें बिहा करि भी लैछैं ते यी पाप नैछै, आर यदि कोनो कुमारी लड्की बिहा करैछै ते कोनो पाप नैकरैछै। तैय्योपर विवाहित आदमीसब यी संसारमे आपन जीवनमे दर्दनाक चीजसिके अनुभव कर्तै आर हमे चाहैछियै कि तुहेंसब एरंको परेशानीके सामना करैसे मुक्त रहैं।

²⁹ हे विश्वासी भ्या-बहिनसब, हमे कहैछियौ कि ख्रीष्टके वापस आबैके लिए आब बेसी समय नैछै, इहे ल्याके यी विषयमे बेसी चिन्ता नैकर कि तोरलगत पतनी छै या नैछै। मगर परमेश्वरके सेवा करैके बारेमे सोच्ते र।

³⁰ आर जेसब कानैछै या जे आदमीसब खुश छै आर जे आदमीसब खुदके लिए चीज किनैछै ओकरासिके यी सभे चीजसिके बारेमे बेसी चिन्ता नैकरना चाही। कहिनेकी यी सभे चीजसे तुहेंसब प्रभुके सेवा करैके लिए भूली जैभैं।

³¹ आर यी संसारमे जे कुछु भी आपनसिके लगत छै, अपनासिके ओकरा महत्वपूर्ण नैसमझना चाही कहिनेकी यी संसारके सभे कुछु खतम भ्याजैतै।

³² हमर इच्छा छै कि तोरासिके दैनिक जीवनके बातसिके विषयमे चिन्ता नैकरे पडौ। अविवाहित पुरुष परमेश्वरके केरंके सेवा करिके खुश बनाबियै कहिके चिन्ता करैछै।

³³ सेल्याके विवाहित पुरुष दीटा बातसिके बारेमे सोचैछै, एकटा, केरंके परमेश्वरके खुश बनाबियै आर दोसर, केरंके आपन पतनीके खुश राखियै।

³⁴ ओकरा दीटा बातके विषयमे सोचे पडैछै: आपन पतनीके खुश करना आर शरीरमे आर आत्मामे परमेश्वरके खुश करना। ओहिने करिके, विवाहित जनानी आर अविवाहित जनानीमे भी फरक छै। अविवाहित जनानी परमेश्वरके केरंके सेवा करिके खुश बनाबियै कहिके चिन्ता करैछै। मगर विवाहित जनानी संसारके बातसिके चिन्तामे रहैछै कि आपन पतिके कोन तरिकासे खुश राखियै।

³⁵ यी बात तोरासिके बन्देज लगाबैले नै मगर तोरसिके फैदाके लिए कहैछियौ। यी कारणसे कि तुहेंसब एक मनके भ्याके प्रभुके सेवामे लाग्ल रहैं।

³⁶ यदि तोरसिमेसे कोय आपन बेटीके अविवाहित राख्ले छै, मगर आब ऊ सोचैछै कि यी बात उचित नैछै, आर ओकर बिहा करैके उमेर खतम भेले जैछै, आर आब ऊ बाबु सोचैछै कि ओकर बेटीके बिहा करे पडैछै ते, ओकर बिहा कराबैके लिए बन्दोबस्त करे पडैछै।

³⁷ मगर यदि यी बाबु आपन मनमे ठानी लेल्कै छे कि ओकर बेटीके बिहा नैकरना सही छै, आर कोय भी ओकरा एरं करैके लिए मजबूर नैकैल्कै छे ते, ओकरलगत ओरं करैके अधिकार छै जे ऊ तय कैल्कै छे। आर सेल्याके यदि ऊ आपन बेटीके अविवाहित राखैके फैसला करैछै ते, ऊ परमेश्वरके नजरमे बढियाँ काम करैछै।

³⁸ एरंके, जे अविवाहित लडकीके बिहा कराबैछै ऊ ठीके करैछै, मगर जे बिहा नै कराबैछै, ऊ आरहौ बढियाँ करैछै।

³⁹ जबतक कोनो जनानीके पति जिन्दा रहैछै, तबतक ओकरा ओकर पतिके संगे ही रहना चाही। मगर जब ओकर पति मरि जैछै ते ऊ ओकर इच्छा कैल आदमीके संगे बिहा करे सकैछै, मगर ओकरा विश्वासी आदमीके संगे बिहा करना चाही।

⁴⁰ मगर यदि ऊ अविवाहित रहैछै ते, हमर विचारमे आरहौ भी बढियाँ छै, आर हमरा लागैछै कि जब हमे तोरासिके यी बात कहैछियौ ते हमे परमेश्वरके आत्माके द्वारा तोरासिके सल्लाह दैछियौ।