१ कोरन्थी 6 - केवट नया कारारमण्डलीमे विश्वासी भ्या-बहिनसिके बीचमे मुकदमा 1 यदि तोरसिमेसे कोनो एकटा आदमीके दोसर विश्वासीके विरुद्धमे बेमेल हैछौ ते, तोरासिके अदालतमे नैजाना चाही। तुहेंसब आपन मण्डलीके दोसर सन्तसिके संगे आपन मामलाके फैसला करैके लिए कहना चाही कि तोरासिमेसे के सही छै। 2 जरुर ही तुहेंसब जानैछैं कि भविष्यमे सन्तसब यी संसारके आदमीसिके फैसला कर्तै। सेल्याके, जरुर ही तुहेंसब यी तय करे सकैछैं कि तोरासिमेसे के तोरसिके छोटका बेमेल बातसिमे सही छैं। 3 तोरासिके मालुम छौ कि भविष्यमे अपनासब दूतसिके न्याय कर्बै, ते जरुर ही अपनासब यी जीवनके साधारण बातसिके न्याय करे सकैछियै। 4 यदि एरंको मामला समनामे आबैछै ते, तुहेंसब उटा बातसिके ऊ आदमीसिके द्वारा फैसला नै करवाना चाही जकरासिके मण्डलीके विश्वासी आदमीसब आदरयोग्य नैसम्झैछै। 5 हमे तोरासिके लाज लगाबैके लिए यी कहैछियौ। जरुर ही, तोरसिके बीचमे कम्तीमे एकटा बुद्धिमान आदमी छै जे संगी विश्वासीसिके बीचके विवादके फैसला करे सकैछै। 6 मगर एकटा विश्वासी आदमी दोसर विश्वासी आदमीके विरुद्धमे अदालतमे मामला ल्याजैछै, आर ऊ भी अविश्वासी आदमी उटा मामलाके फैसला करैछै। 7 जब तोरासिमेसे एकटा विश्वासी आदमी दोसर विश्वासी आदमीके अदालतमे ल्याजैछै ते, तुहेंसब एक दोसरके संगे बढियाँसे जियैले नैसकैछै। यी बढियाँ हैतै यदि तुहेंसब दोसर विश्वासी आदमीसिके आपनसंगे गलत करैले दहैं आर कोनो अदालतमे नैजो आर ओकरासिपर दोष नैलगा। यदि दोसर विश्वासी आदमी धोखा द्याके तोरासिसे कुछु छिनी लेल्कौ ते, ओकरा कुछु नैकर। 8 मगर तुहेंसब गलत करैछैं आर धोखा दैछैं, आर तुहेंसब यी कामसब आपन विश्वासी भ्या-बहिनसिके संगे करैछैं। 9 तुहेंसब जरुर ही जानैछैं कि दुष्ट आदमीसब परमेश्वरके राज्यके हकदार नैहैछै। कोय भी आदमी तोरासिके धोखा नैदौ। जे आदमीसब अनैतिक, मूर्तिपुजक, व्यबिचारी, समलिंगी, पुरुषगामी, 10 चोर, मतवाला, लोभी, निन्दा करेवाला आर लुटाहा छै, ऊ आदमीसब परमेश्वरके राज्यके हकदार नैहैतै। 11 पहेला तोरासिमेसे कुछु आदमीसब एरं व्यवहार कर्ते रहै, मगर परमेश्वर तोरसिके पापसिके धोय देल्कै छे आर तोरासिके पवित्र बनैल्कौ छे आर प्रभु येशू ख्रीष्टके नामके पुकारा करिके आर आपनसिके परमेश्वरके आत्माद्वारा तुहेंसब परमेश्वरके नजरमे धर्मी घोषित कैल गेल्हैं छे। शरीर आर आत्मामे परमेश्वरके महिमा 12 तोरसिमेसे कोय आदमी कहभैं, “हमे विश्वासी हुऐके कारणसे सभे बात करैके लिए हमरासिके अनुमति ते छै।” मगर सभे बात तोरसिके लिए फैदाके नैछै। हमे भी कहे सक्तियै, “हमे विश्वासी हुऐके कारणसे सभे बात करैके लिए हमरासिके अनुमति ते छै।” मगर हमे नैचाहैछियै कि कोनो भी बात हमरा काबु करै। 13 तोरसिमेसे कोय आदमी कहभैं “भोजन शरीरके लिए छै आर शरीर भोजनके लिए छै” यी बात सच छै मगर परमेश्वर आपनसिके शरीर आर भोजन दोनोके नाश कर्तै, शरीर व्यबिचारके लिए नैछै मगर आपनसिके शरीर प्रभुके लिए छै आर ओकर सेवा करैके लिए छै। 14 एकर अलावा, आपनसिके शरीर महत्वपूर्ण छै, कहिनेकी जेरंके परमेश्वर प्रभु येशूके मुर्दासे जिन्दा बनाबैके लिए आपन शक्तिके उपयोग कैल्कै रहे, सेल्याके ऊ अपनासिके भी मुर्दासे जिन्दा बनैतै। 15 तुहेंसब जरुर जानैछैं, कि तोरसिके शरीर येशू ख्रीष्टके अंग छौ। एकटा आदमीके आपन शरीरके ल्याके, जे ख्रीष्टके छै, एकरा वेश्याके संगे नैजोडना चाही। एरं हर्गिस नैकरना चाही। 16 धरमशास्त्रमे लिख्ल छै, “दोनो एकटा शरीर बन्तै।” ते तोरासिके मालुम होना चाही कि जे कोय भी वेश्याके संगे जोडल जैछै, ऊ वेश्याके संगे एकटा शरीर बनी जैछै। 17 आर जे प्रभुके संगे एकजुट भेल छै, ओकर आत्मा आर येशूके आत्मा एक साथ जुटी गेलै छे। 18 व्यबिचारसे पुरा तरहसे दूर र, यी बात साफ जाहीर छै कि दोसर पाप शरीरके एतनें प्रभावित नैकरैछै जतनें यी पाप प्रभावित करैछै। व्यबिचार करेवाला आदमी आपन शरीरके विरुद्धमे पाप करैछै। 19 तुहेंसब जरुर जानैछैं, कि तोरसिके शरीर मन्दिर छौ जकरामे पवित्र आत्मा रहैछै। तुहेंसब परमेश्वरसे पवित्र आत्मा पैल्हैं छे आर परमेश्वर आपनसिके शरीरके मालिक छै। 20 परमेश्वर तोरसिके लिए बडका मोल चुकैल्कौ छे जब ऊ ख्रीष्टके क्रूसपर बलिदान कैल्कै, सेल्याके आपन शरीरके द्वारा परमेश्वरके महिमा कर। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation