१ कोरन्थी 5 - केवट नया कारार

मण्डलीमे अनैतिक सदस्य

¹ तोरसिके मण्डलीमे कुछु आदमीसब व्यबिचार करैछै कहिके बहुते आदमीसब हमरा कहैल्कै छे, एरंको व्यबिचार जे परमेश्वरके नैचिन्हेवाला आदमीसिके बीचमे भी नैहैछै। तोरसिमेसे कोय एकझन आपन सौतिन मयाँके संगे अनैतिक सम्बन्ध राख्ले छै कहिके हमे सुन्लियै छे।

² यी बातमे तोरासिके दुखित आर शोकित होना रहौ आर तोरासिके ऊ आदमीके मण्डलीसे निकाली देना रहौ। मगर ओकर बदलामे तुहेंसब घमण्ड करैछैं।

³ हमे तोरसिसे दूर भेलपर भी यी एरं छै जेरं कि हमे ओत्ते तोरसिसे भेट करैछियै आर ओरंको खराब काम करेवाला एकटा आदमीके विरुद्धमे फैसला करि देलियै छे।

⁴ यी ऊ छै जे तोरासिके करना जरुरी छै। आपनसिके संगे प्रभु येशू ख्रीष्टके अधिकार छै कहिके जानीके तुहेंसब सभेको विश्वासीसिके रुपमे जमा हु। आर यी एरं छै कि आपन मनमे हमे भी उटा जगहमे हाजिर छियै। आर फेर येशू ख्रीष्टके शक्तिके द्वारा,

⁵ ऊ आदमी जे पापमय व्यवहार करैछै, ओकरा आपन मण्डलीसे निकाल आर उटा आदमीके शैतानके शक्तिमे वापस दहैं, ताकी यी आशा कैल ज्या सकैछै कि ऊ आदमी पाप करैले छोडिके परमेश्वरके तरफ मन लगैतै। कहिनेकी यदि ऊ यी करैछै ते, ऊ वास्तवमे उटा दिन बचैल जैतै जे दिन प्रभु न्याय कर्तै।

⁶ तुहेंसब घमण्ड करैले बन्द कर। तोरासिके मालुमे छौ कि कनेजरा खमीर सभेटा सान्ल अट्टाके फुल्या दैछै। ओहिने करिके, यदि एकटा आदमीके पाप करैके लिए अनुमति देल जैछै ते, जल्दी ही सभे आदमीसब उहे करैके लिए प्रभावित हैतै।

⁷ जेरंके निस्तार पावन मनाबैसे पहेला यहूदी आदमीसब आपन घरसे सभेटा खमीरके निकालैछै, ओहिने करिके तोरासिके यी अनैतिक काम करेवाला आदमीके भी आपन मण्डलीसे बाहार निकाली देना चाही। फेर तुहेंसब उटा रोटीके जुगुर भ्या जैभैं जकरामे कोनो खमीर नैहैछै। जकर मतलब छै कि तुहेंसब एकटा विश्वासीके समूह हैभैं जे समूहमे एरंको कोय आदमी नैहैतै जे जानी-जानीके पाप करैछै कहिनेकी जब तुहेंसब ख्रीष्टमे विश्वास कैल्हैं, तब परमेश्वर तोरासिके भितरसे शुद्ध बनैल्कौ। कहिनेकी ख्रीष्ट अपनासिके आपनसिके पापसे छुटकारा देल्कै छे आर ऊ एकटा भेंडाके जुगुर छै जकरा यहूदी आदमीसब निस्तार पावनके समयमे बलिदान कैल्कै।

⁸ सेल्याके या अपनासब निस्तार पावन मनाबैछियै। निस्तार पावनके समयमे यहूदी आदमीसब आपन घरसे सभे खमीरके फेकि दैछै। ओहिने करिके विश्वासी बनैसे पहेला अपनासब जेरंको व्यवहार कर्ते रहियै ओरं व्यवहार करना बन्द करि देना चाही। उटा निस्तारके समयमे यहूदी आदमीसब रोटी खैल्कै, जकरामे खमीर नैरहै। ओहिने करिके अपनासिके व्यवहार करना चाही कहिनेकी परमेश्वरके आदमीसिके ओकरसिके जीवनमे कोनो किसिमके खराब व्यवहार नैभेल जुगुर व्यवहार करना चाही। जकर मतलब, अपनासिके धोखासे आपन मनमे खराबीके नुकाना नैचाही, बरु इमानदारीसे ख्रीष्टके अनुसरण करना चाही।

अनैतिक व्यवहारके लिए न्याय

⁹ हमे हमर पहेला चिट्ठीमे तोरासिके व्यबिचारीके संगत नैकरिहैं कहिके लिख्ले रहियौ।

¹⁰ ओकर मतलब यी नैछै कि तुहेंसब यी संसारके व्यबिचारीसब, लोभीसब, या दोसर आदमीसिके धोखा दिएवालासब, या मूर्तिपूजकसिके संगे संगत नैकरना छौ। एरं हैतियै ते तोरासिके यी संसारसे ही निक्ले पड्तियौ।

¹¹ हमर कहैके मतलब यी छै कि यदि कोय आदमी खुदके ख्रीष्टमे विश्वास करेवाला आदमी कहैछै मगर ऊ आदमी व्यबिचारी, या लोभी, या मूर्तिपुजक या निन्दा करेवाला या मतवाला या दोसर आदमीसिके धोखा दिएवाला छै, ते ओकर संगत नैकरिहैं, एत्तेतक कि एरंको आदमीसिके संगे ते खाना भी नैखैहैं।

¹² कहिनेकी जे आदमीसब विश्वासी नैछै ओकरासिके दोष लगाना आपनसिके जिम्मेदारी नैछै। मगर तोरासिके ऊ आदमीसिके जरुर ही अनुशासित करना चाही जेसब तोरसिके मण्डलीके हिस्सा छै।

¹³ मगर जे आदमीसब विश्वासी नैछै ओकरासिके परमेश्वर दोष लगाबैछै। आर परमेश्वर धरमशास्त्रमे एरं कहैल्कै छे: “अनैतिक आदमीसिके आपन मण्डलीमे जुडैके अनुमति नैदहैं।”