१ कोरन्थी 4 - केवट नया कारारख्रीष्टके विश्वासयोग्य भण्डारी 1 आदमीसब अपनासिके ख्रीष्टके सेवक आर परमेश्वरके खुश-खबरीके गुप्त सच्चाईसिके व्याख्या करेवाला आदमी कहिके समझना चाही। 2 एकटा आदमी जकरा आपन मालिकके द्वारा काम करैके लिए देल गेलै छे, ओकरा वास्तवमे विश्वासयोग्य होना चाही ताकी ऊ उटा कामके करै, जे काम करैके लिए ओकरा आज्ञा देल गेलै रहे। 3 हमर लिए, हमरा कोनो चिन्ता नैछै कि तुहेंसब या कोनो दोसर आदमी हमे विश्वासयोग्य छियै या नैछियै कहैछै। हमे विश्वासयोग्य छियै या नैछियै हमे खुद भी नैकहैछियै। 4 कहिनेकी हमर विवेक हमरा कोनो बातमे दोषी नैठहराबैछै, मगर एकरासे हमे निर्दोष नैठहरैछियै, कहिनेकी हमर न्याय करेवाला प्रभु छै। 5 सेल्याके प्रभुके वापस आबैतक कोय ककरो जाँच नैकर। ऊ कक्रहौ मालुम नैभेल आदमीसिके विचारसिके साफसे कही देतै। ओकरसिके हृदयके मकसद प्रकट करि देतै, तब परमेश्वरके तरफसे सभे आदमीसिके प्रशंसा मिल्तै। ख्रीष्टके लिए मूर्ख 6 हे विश्वासी भ्या-बहिनसब, हमे जे बात कहैछियौ उटा बात बुझाबैके लिए अपोल्लोस आर खुदके उदाहरणके रुपमे प्रयोग कैलियै। तुहेंसब हमरसिसे धरमशास्त्रमे लिख्ल बातसे बाहार नैजाना चाही कहिके सिखना चाही। तब तुहेंसब घमण्डी भ्याके हमरासिके एक दोसरके विरुद्धमे नैराख्भैं। 7 कोय भी तोरासिके दोसर आदमीसिसे बेसी महत्वपूर्ण नैबनैल्कौ छे। तोरसिके संगे जे छौ उटा सभे चीज परमेश्वर तोरासिके दियैके कारणसे तोरसिके संगे घमण्ड करैके कोनो अधिकार नैछौ। 8 तोरासिके लागैछौ कि तोरासिके आत्मिक रुपमे जरुरत पडल सभे चीज तोरसिकेलगत छौ। तुहेंसब सोचैछैं पवित्र आत्मा आदमीसिके दिएवाला सभे वरदानसब तुहेंसब पाबि लेल्हैं छे। तोरासिके लागैछौ कि तुहेंसब हमरसिके बिना राजासिके जुगुर शासन करैले शुरु करि लेल्हैं छे। यदि तुहेंसब सच्कोरे राजासिके जुगुर शासन करैले शुरु कर्तिहैं ते हमे खुश हैतियै, ताकी हमेसब भी तोरसिके संगे शासन करे सक्तियै। 9 मगर यी एरंको दिखाई पडैछै कि परमेश्वर हमेसब चुन्ल आर भेज्ल चेलासिके विजयके परेडमे कैदीसिके राख्ल जुगुर प्रदर्शनमे राखल्कै छे। हमेसब ऊ आदमीसिके जुगुर छियै जकरा मौतके सजाय देल छै, जकरा अखाडामे राख्ल छै जते सभे आदमीसब हमरासिके जंगली जानवरसिके द्वारा जान मार्ल जैके तमासा देखैछै। आर खाली आदमीसब नै मगर सारा संसारके उप्पर रहेवाला स्वर्गदूतसब रंगमन्चमे नाटक करेवाला आदमीसिके देखैके जुगुर देखैछै। 10 आदमीसब हमरासिके मूर्ख सोचैछै कहिनेकी हमेसब ख्रीष्टके बारेमे प्रचार करैछियै। मगर तुहेंसब गल्तीसे सोचैछैं कि तुहेंसब बुद्धिमान ख्रीष्टियन छैं। बहुते आदमीसब हमरासिके अधिकार नैभेल सोचैछै। मगर तुहेंसब गर्वके साथ कहैछैं कि तोरसिके संगे परमेश्वरके देल शक्ति छौ। आदमीसब हमरसिके प्रशंसा नैकरैछै मगर ऊसब तोरसिके प्रशंसा करैछौ। 11 ऐजके दिनतक हमेसब भुख्ल आर प्यास्ल छियै, भंगा कपडा पिन्हैछियै, आर मार खैछियै, आर हमरसिके लगत घर-द्वार भी नैछै। 12 हमेसब आपन हातसे काम करिके मेहनत करैछियै। आदमीसब हमरासिके अपमान करैछै, हमेसब ओकरासिके आशिष दैछियै। ऊसब हमरासिके सताबैछै आर हमेसब सहैछियै। 13 ऊसब हमरसिके बदनाम करैछै, हमेसब ओकरसिसे नम्रतासे बात करैछियै। एत्तेतक कि एखनतक भी आदमीसब हमरसिके आदर नैकरैछै, ऊसब कहैछै कि हमरसिके कोनो मोल नैछै। पावलके अनुसरण करैके सल्लाह 14 हमे तोरासिके लज्जित करैके लिए यी बात नैलिखैछियौ, मगर हमर मकसद तोरासिके अनुशासित करना छै, कहिनेकी तुहेंसब हमर बाल-बच्चासिके जुगुर छैं जकरा हमे सचमे प्रेम करैछियै। 15 कहिनेकी चाहे तोरसिकेलगत ख्रीष्टके अनुयायी बनैके लिए अगुवाई करेवाला हजारो शिक्षकसब हैतौ, मगर खाली हमे तोरासिके बाबुके जुगुर छियौ। कहिनेकी हमे ऊ पहेला आदमी छियै जे तोरसिकेलगत खुश-खबरी ल्याके ऐलियौ, नतिजा स्वरुप तुहेंसब येशू ख्रीष्टमे विश्वास कैल्हैं। 16 सेल्याके हमे तोरासिके बिन्ती करैछियौ कि हमर उदाहरणके अनुसरण कर। 17 सेल्याके हमे तोरसिकेलगत तिमोथीके भेजैछियौ। ऊ प्रभुमे हमर प्यारा आर विश्वासयोग्य बेटा छै। आर ऊ तोरासिके यी बात फेर याद दिलैतौ कि हमे येशू ख्रीष्टके अनुयायीके रुपमे केरं व्यवहार करैछियै, जेरंके हमे जते भी जैछियै ओत्करो मण्डलीमे सिखाबैछियै। 18 तोरसिके बीचमे कुछु आदमीसब सोचैछै कि हमे तोरासिसे भेट करैले नैऐबौ, आर सेल्याके ऊसब घमण्डी भ्यागेलै छे। 19 मगर प्रभुके इच्छा हैतै ते हमे जल्दी तोरसिकेलगत ऐबौ, तब खाली ऊसब घमण्डी आदमीसिके शिक्षाके नै, मगर ओकरसिके शक्तिके भी जानी लेबै। 20 कहिनेकी परमेश्वरके राज्य आदमीसब आपन जीवनमे जे बोलैछै ओकरासे नै मगर ओकरसिके कैल शक्तिशाली कामसे प्रकट हैछै। 21 जब हमे ऐबौ, तुहेंसब कि चाहैछैं कि हमे कि करियौ? हमे ऐल बखत यदि तुहेंसब आरहौ भी आपन खराब रस्ता नैत्याग्लहैं छे ते, हमे तोरासिके कडा तरिकासे धोप्बौ। मगर यदि तुहेंसब आपन खराब रस्ता त्यागी देल्हैं छे ते, हमे तोरसिके प्रति नम्र आर प्रेमी हैबौ। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation