१ कोरन्थी 3 - केवट नया कारार

आदमीसिके अनुसरण करना उचित नैछै

¹ हे विश्वासी भ्या-बहिनसब, जब हमे तोरसिके संगमे रहियौ, हमे तोरासिके आत्मिक आदमीसिके सिखाबैके जुगुर गहरा शिक्षा दिए नैसक्लियै। तुहेंसब यी संसारके आदमी भेल जुगुर या तुहेंसब ख्रीष्टियन जीवनमे दुधखौका बच्चा भेल जुगुर हमे तोरासिके शिक्षा देलियौ।

² उटा समयमे हमे तोरासिके एकटा आदमी बच्चासिके दूध पियैले दियैके जुगुर परमेश्वरके सन्देशसे खाली साधारण शिक्षासब ही सिखैलियौ। हमे तोरासिके ठोस खानासिके जुगुर परमेश्वरके वचनके गहरा सच्चाईसब नै सिखैलियौ, कहिनेकी ओकर लिए तुहेंसब तैय्यार नैरहैं, आर आरहौ भी तुहेंसब तैय्यार नैछैं।

³ कहिनेकी तुहेंसब एखनतक भी पापमय स्वभावके वशमे छैं। जब कि तोरसिके बीचमे जर्नी आर झगडा छौ ते, कि यी साबित नैकरैछै कि तुहेंसब आपन पापमय स्वभावके वशमे छैं? तुहेंसब ओरंको आदमीसिके जुगुर जियैछैं जेसब प्रभुके नैछै।

⁴ कहिनेकी जब तोरसिमेसे कोय कहैछै, “हमे पावलके चेला छियै” आर कोय आदमीसब कहैछै “हमे अपोल्लोसके चेला छियै” ते, तुहेंसब ओरंको आदमीसिके जुगुर जियैछैं जेसब प्रभुके नैछै।

⁵ पावल के छै? अपोल्लोस के छै? हमेसब खाली सेवकसब छियै, जकरद्वारा तुहेंसब ख्रीष्टमे विश्वास कैल्हैं। हमरसिमेसे सभेको उहे काम कैलियै जे काम परमेश्वर हमरासिके करैके लिए देल्कै।

⁶ जेरंके एकटा आदमी जमिनमे बिहन बुनैछै, ओहिने करिके हमे तोरासिके परमेश्वरके सन्देश सुनाबेवाला पहेला आदमी रहियौ। तकरबाद, जेरंके दोसर आदमी बढेवाला गाछमे पानी पटाबैछै, ओहिने करिके अपोल्लोस तोरासिके विश्वासमे मजगुत बनाबैके लिए सहायता कैल्कौ। मगर जेरंके परमेश्वर गाछके बढाबैछै, ओहिने करिके परमेश्वर तोरासिके नया जीवन देल्कौ आर तोरासिके आत्मिक रुपमे बढाबैछौ।

⁷ सेल्याके रोपेवाला आदमी आर पानी पटाबेवाला आदमीके कोनो महत्व नैछै। खाली परमेश्वर महत्त्वपूर्ण छै, कहिनेकी उहे एकझन छै जे गाछके बढाबैछै।

⁸ बिहन बुनेवाला आर पानी पटाबेवाला एक्के समान छै। आर यी दोनो झनके ओकरसिके कैल कामके मुताबिक परमेश्वर ओकरासिके इनाम देतै।

⁹ कहिनेकी हमेसब परमेश्वरके सहकर्मी छियै, आर तुहेंसब, कोरन्थी सहरके विश्वासीसब परमेश्वरके खेतसब छैं। संगहै संग, हमे तोरासिके उटा भवनसंगे तुलना करैछियै जकरा परमेश्वर निर्माण करि रहलै छे।

¹⁰ परमेश्वर हमरा जे काम करैके लिए देल्कै उटा काम हमे बुद्धिमानीके साथ कैलियै। हमे तोरसिके सहरमे खुश-खबरीके प्रचार कैलियौ आर तोरसिमेसे शुरुके आदमीसिके येशू ख्रीष्टमे विश्वास करैले सहायता कैलियौ। तकरबाद, दोसर ख्रीष्टियन सेवकसब हमर शुरु कैल कामके आगु बढैल्कै। मगर हमरसिमेसे हरेक सेवकसब परमेश्वरके काम केरंके करे पडैछै कहिके ध्यानसे विचार करे पडैछै।

¹¹ यी निर्माण भ्या रहल भवनमे येशू ख्रीष्ट जगके जुगुर छै। उहे खाली एक्केटा जग छै। एकर मतलब यी छै, आदमीसब परमेश्वरके चिन्हेवाला एक्केटा रस्ता खाली येशू ख्रीष्ट छै।

¹² यदि ख्रीष्टियन सेवकसब परमेश्वर ओकरासिके देल सच्चा शिक्षा सिखाबैछै ते, ऊसब उटा घर बनाबेवाला आदमीसिके जुगुर छै जे बढियाँ चीजसब, जेरं कि सोना, चानी, किमती पत्थल प्रयोग करिके जगमे घर बनाबैछै। मगर यदि ऊसब झुट्ठा शिक्षासब सिखाबैछै ते, ऊसब उटा घर बनाबेवाला आदमीसिके जुगुर छै जे घटिया चीजसब, जेरं कि लकडी, घास आर पुवार प्रयोग करिके जगमे घर बनाबैछै,

¹³ एक दिन हरेक आदमी आपन कैल काम केरंको छै से देख्तै। कहिनेकी जब येशू ख्रीष्ट फेर वापस ऐतै, ऊ यी सभे बातसब खुल्लम खुल्ला प्रकट कर्तै। ऊ हरेक सेवकके कैल काम देख्तै आर ऊ यी काम बढियाँ छै या खराब छै कहिके कहतै, ठीक ओहिने करिके जेरंके एकटा आदमी धातुसिके जाँच करैके लिए आगिनके प्रयोग करैछै, यी देखैके लिए कि उटा धातुसब लम्बा समयतक रहैछै कि जल्दी जरि जैछै।

¹⁴ यदि एकटा सेवकके जगमे कैल काम नैजरैछै ते, ऊ इनाम पैतै।

¹⁵ मगर यदि ख्रीष्ट कहैछै कि एकटा सेवकके कैल काम बढियाँ नैछै ते, ऊ उटा सेवकके इनाम नैदेतै। तैय्योपर, ऊ सेवक परमेश्वरके देल कहियो खतम नैहुएवाला जीवन नैहेरैतै।

¹⁶ तोरासिके जरुर मालुम छौ कि तुहेंसब परमेश्वरके मन्दिर छैं, आर परमेश्वरके पवित्र आत्मा तोरासिमे बास करैछौ।

¹⁷ जे कोय आदमी भी परमेश्वरके आदमीसिके बीचमे भेल मेल-मिलापके नाश करैछै ते परमेश्वर ओकरा भी सजाय देतै। कहिनेकी परमेश्वरके मन्दिर पवित्र छै, आर ऊ मन्दिर तुहींसब ही छैं।

संसारके ज्ञानसे बच

¹⁸ कोय आदमी अपने आपके धोखा नैदक। यदि तोरसिमेसे कोय यी संसारके आदमीसिके नजरमे खुदके बुद्धिमान सम्झैछै ते, तुहेंसब ओकरसिके नजरमे खुदके मूर्ख बनाबे पडैछै, ताकी परमेश्वरके नजरमे तुहेंसब बुद्धिमान बने सक्हैं।

¹⁹ कहिनेकी उटा बातसब जे यी संसारके आदमीसब सम्झैछै कि चलाक छै, उटा बातसब परमेश्वरके समनामे मूर्खता छै। यी ओहिने ही छै जेरं धरमशास्त्रमे लिख्ल छै, “कुछु आदमीसब सोचैछै कि ऊसब बुद्धिमान छै, मगर परमेश्वर ओकरसिके चलाक विचारसिके ओकरासिके हराबैके लिए प्रयोग करैछै।”

²⁰ आर धरमशास्त्र यी भी कहैछै, “प्रभु बुद्धिमान आदमीसिके विचारसिके जानैछै कि ऊसब बेकार छै।”

²¹ सेल्याके एकटा विशेष अगुवाके अनुसरण करैके विषयमे घमण्ड करैले बन्द कर, कहिनेकी परमेश्वर तोरासिके सभे कुछु तोरसिके भलाइके लिए देल्कौ छे।

²² सेल्याके कोनो भी आदमीके द्वारा कैल कामके विषयमे घमण्ड करैले बन्द कर। हमे, पावल आर अपोल्लोस आर पत्रुस सभेको तोरेसिके छियै। वास्तवमे संसार, जीवन, मौत, वर्तमान, आर भविष्य सभे चीज तोरसिके छौ।

²³ तुहेंसब ख्रीष्टके अधिकारके अधिनमे छैं आर ख्रीष्ट परमेश्वरके अधिकारके अधिनमे छै।