१ कोरन्थी 16 - केवट नया कारारयरूशलेमके मण्डलीसिके लिए दान 1 आब यरूशलेम सहरमे विश्वासीसिके लिए जमा कैल ज्यावाला दानके विषयमे जे सवाल तुहेंसब पुछलहैं रहे, ओकर विषयमे जे बात हमे गलातिया प्रदेशके मण्डलीके बतैलियै रहे, ओहिने तहुँसब भी कर। 2 हरेक ऐतबारके दिन तोरासिमेसे सभेको आपन-आपन कमाइके मुताबिक कुछु दान अलग करिके राखिहैं, ताकी जब हमे ऐबै ते तोरासिके दान जमा करैले नैपडौ। 3 फेर, जब हमे ओत्ते रहबै ते, हमे ऊ आदमीसिके भेज्बौ, जकरा तुहेंसब भरोसामन्द आदमीके रुपमे चुन्लहैं रहे ताकी उटा दान यरूशलेम सहरमे ल्याके जै। हमे ओकरसिके संगे एकटा चिट्ठी भी भेजी देबौ कि ओत्करो विश्वासीसिसे ओकर पहचान करवाबे सकियै। 4 आर यदि तोरासिके लागैछौ कि हमरा जाना चाही ते ऊसब हमरसंगे जैतै। व्यक्तिगत निवेदन 5-7 यदि प्रभुके इच्छा हैतै ते हमे तोरसिके संगे बहुते दिनतक रहैके आशा करैछियै। सेल्याके हमे आब कम समयके लिए तोरसिकेलगत रहैके लिए नैरुक्बौ, जब हमे माकेडोनिया प्रदेशमहर जैछियै। ओत्ते पहुँचलके बाद हमे तोरसिकेलगत ऐबौ। तब हमे पुरा ठण्डीके समय तोरसिकेलगत रहबौ। तकरबाद तुहें हमर अगला यात्राके के लिए हमर जरुरत पुरा करे सकैछैं, चाहे ऊ जे भी है। 8 मगर पेन्तिकोसके पावनके समयतक हमे एफिसस सहरमे रहबै। 9 हमरलगत एत्ते प्रभावशाली रुपसे काम करैके एकटा बडका अवसर छै, भला ही बहुते आदमीसब छै जे हमर विरोध करैछै। 10 यदि तिमोथी तोरसिकेलगत कोरन्थी सहरमे ऐतौ ते, तोरसिके बीचमे ओकर स्वागत करिहैं, कहिनेकी ऊ हमरे जुगुर प्रभुके काम करैछै। 11 सेल्याके तोरसिमेसे कोय भी ओकर अनादर नैकरिहैं। मगर ओकरा यात्राके लिए जरुरत पडल चीजसब द्याके ओकरा कुशलसे बिदा करिहैं ताकी ऊ हमरलगत वापस लौटिके आबै, कहिनेकी हमे दोसर विश्वासी भ्यासिके संगे ओकर इन्तजार करैछियै। 12 आर विश्वासी भ्या अपोल्लोससे हमे बहुते बिन्ती कैलियै छे कि ऊ तोरसिकेलगत दोसर विश्वासीसिके संगे जौ, जे तोरासिसे भेट करैले ऐलौ रहे, मगर ऊ यी समयमे यात्राके लिए तैय्यार नैछै, मगर जब सही समय हैतै तब ऊ ऐतै। अन्तिम सन्देश 13 होशियार र, विश्वासमे स्थिर र, साहासी आदमी बन आर विश्वासमे मजगुत बन। 14 जे कुछु भी तुहेंसब करैछैं ऊ सभे कुछु प्रेमसे कर। 15 हे विश्वासी भ्या-बहिनसब, तुहेंसब स्तिफनस आर ओकर परिवारके जानैछैं कि ऊ अखैया प्रदेशमे विश्वास करेवाला पहेला आदमी रहै। आर ऊसब सन्तसिके सहायता करैके लिए समर्पित छै। 16 सेल्याके हमे तोरासिसे बिन्ती करैछियौ कि एरंको आदमीसिके आज्ञाके पालन कर। आर हरेक आदमीके जे ओकरसिके जुगुर मेहनत करैछै आर एरंको समर्पणके साथ सेवा करैछै। 17 आर स्तिफनस, फोर्टूनाटस, आर अखाइकसके आबैसे हमे आनन्दित छियै, कहिनेकी यी आदमीसब एरंको सहायता कैल्कै छे, जे सहायता दियैके लिए तुहेंसब एत्ते नैरहैं। 18 आर ऊसब हमरा उत्साहित बनैल्कै छे, आर ऊ तोरासिके भी उत्साहित बनैतौ जब ऊ तोरसिकेलगत वापस ऐतौ। सेल्याके तोरासिके एरंको आदमीसिके आदर करना चाही। निष्कर्ष 19 एत्ते एशिया प्रदेशके मण्डलीसिके विश्वासीसिके तरफसे तोरासिके नमस्कार करैछौ, अकिलास आर ओकर पतनी प्रिस्कीला आर मण्डलीके तरफसे भी जेसब ओकर घरमे जमा हैछै, प्रभुमे तोरासिके नमस्कार कहैछौ। 20 एत्करो सभे विश्वासी भ्या-बहिनसब तोरासिके नमस्कार कहैछौ। तोरासिके एक दोसरके नमस्कार करना चाही यी चिन्हके रुपमे कि तुहेंसब एक दोसरसे प्रेम करैछैं। 21 हमे, पावल यी नमस्कार आपन हातसे लिखैछियै। 22 यदि कोय प्रभुसे प्रेम नैकरैछै ते ऊ आदमी श्रापित छै, हे हमरसिके प्रभु आब! 23 प्रभु येशू ख्रीष्टके अनुग्रह तोरसिके संगमे रहौ। 24 तुहें जेसब ख्रीष्ट येशूके संगे घनिष्ठ सम्बन्ध राखैछैं, हमे तोरसिके सभैसे प्रेम करैछियौ। आमेन। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation