१ कोरन्थी 15 - केवट नया कारार

पावलके खुश-खबरी आर ख्रीष्ट मुर्दासे जिन्दा

¹ हे विश्वासी भ्या-बहिनसब, हमे तोरासिके उहे खुश-खबरी याद दिलाबैले चाहैछियौ, जे तुहेंसब पहेला सुनी लेल्हैं छे, जे सन्देशमे तुहेंसब विश्वास भी कैल्हैं रहे आर ओकरामे तुहेंसब आरहौ भी मजगुत भी भेले गेल्हैं।

² परमेश्वर तोरासिके उटा खुश-खबरीके द्वारा बचाबैछौ, यदि तुहेंसब उटा खुश-खबरीपर विश्वास करैले नैछोडैछैं, जकरा हमे तोरसिके बीचमे प्रचार कैलियौ, यदि तुहेंसब विश्वास करैले बन्द करिदैछैं ते तोरसिके विश्वासके कोनो मोल नैछौ, यी बेकार छै।

³ इहे कारणसे हमे तोरासिके उटा सभैसे जरुरी खुश-खबरी बतैलियौ, जे हमरा प्रभु येशूसे मिल्लै रहे। उटा खुश-खबरी यी छै: कि धरमशास्त्रके मुताबिक येशू ख्रीष्ट आपनसिके पापके लिए मर्लै,

⁴ आर ऊ गाड्ल गेलै आर धरमशास्त्रके मुताबिक तेसर दिन परमेश्वर ओकरा मुर्दासे जिन्दा बनैल्कै।

⁵ आर येशू पत्रुसके आर बार चेलासिके दिखाई देल्कै।

⁶ फेर पाँच स से बेसी विश्वासी भ्या-बहिनसिके एक्केबेर दिखाई देल्कै, जकरामेसे बहुते आदमीसब एखनतक जिन्दा छै आर कुछु आदमीसब मरि गेलै छे।

⁷ फेर याकूबके दिखाई देल्कै आर एकरबाद सभे चुन्ल आर भेज्ल चेलासिके दिखाई देल्कै।

⁸ आर सभैके दिखाई देलके बाद येशू प्रभु हमरा भी दिखाई देल्कै आर हमे अचानक ही प्रभु येशूके चुन्ल आर भेज्ल चेला बनी गेलियै, जकर उम्मीद नैकैल गेलै रहे, एकटा एरंको बच्चाके जुगुर जे समय पुरा हुऐसे पहेला ही जनमी जैछै।

⁹ कहिनेकी चुन्ल आर भेज्ल चेलासिमेसे हमे कम महत्वपूर्ण छियै, एत्तेतक कि चुन्ल आर भेज्ल चेला कहलाबैके भी योग्यके नैछियै, कहिनेकी हमे परमेश्वरके मण्डलीसिके सतैलियै रहे।

¹⁰ मगर परमेश्वरके अनुग्रहसे हमे चुन्ल आर भेज्ल चेला छियै। हमरापर ओकर अनुग्रहके परिणाम महान भेलै। मगर यदि हमे दोसर चुन्ल आर भेज्ल चेलासिसे बेसी भी मेहनत कैलियै ते, यी भी हमर तरफसे नैभेलै मगर परमेश्वरके अनुग्रह हमरा ओकर काम करैके लिए योग्य बनैल्कै छे।

¹¹ सेल्याके चाहे हमे हैयै चाहे दोसर चुन्ल आर भेज्ल चेलासब है, हमेसब सभेको ख्रीष्टके विषयमे एक्केटा सन्देशके प्रचार कैलियै, आर इहे सन्देशपर तुहेंसब विश्वास भी कैल्हैं।

मर्ल आदमीसब मुर्दासे जिन्दा होना

¹² आब हमे तोरासिके यी कहैले चाहैछियौ कि जेरं हमेसब सभेको तोरसिके बीचमे प्रचार कैलियौ कि जब ख्रीष्ट मर्लै ते परमेश्वर ओकरा मुर्दासे जिन्दा बनैल्कै, ते तोरसिमेसे कोय भी यी नैक कि परमेश्वर विश्वासीसिके मर्लके बाद फेरसे ओकरासिके जिन्दा नैबनैतै।

¹³ यदि मर्ल आदमीसिके फेरसे मुर्दासे जिन्दा होना असम्भव छै ते, ख्रीष्ट भी फेर मुर्दासे जिन्दा नैभेलै।

¹⁴ आर यदि ख्रीष्ट मुर्दासे जिन्दा नैबनैल गेलै ते, जे सन्देशके हमेसब प्रचार करैछियै ओकर आर ख्रीष्टमे तोरसिके विश्वासके दोनोके कोनो मतलब नैछौ।

¹⁵ यदि मुर्दासिके फेरसे जिन्दा नैबनैल जैछै ते, हमेसब यी बात कहिके परमेश्वरके बारेमे तोरासिके झुठ कहैलियौ छे। यदि सचमे मुर्दासे जिन्दा नैहैछै ते परमेश्वर भी ख्रीष्टके मुर्दासे जिन्दा नैबनैल्कै छे।

¹⁶ यदि मर्ल आदमीसब मुर्दासे जिन्दा नैहैछै ते, ख्रीष्ट भी मुर्दासे जिन्दा नैभेलै छे।

¹⁷ आर यदि ख्रीष्ट मुर्दासे जिन्दा नैभेलै छे ते, तोरसिके विश्वासके कोनो मतलब नैछौ आर तुहेंसब एखन भी आपन पापमे जियैछैं।

¹⁸ अगर एरं छै ते ख्रीष्टमे जे विश्वासीसब मरि गेलै छे, ऊसब बचैल नैगेलै छे, बरु ऊसब हेर्या गेलै छे यानिकी सभे दिनके लिए परमेश्वरसे अलग भ्यागेलै छे।

¹⁹ यदि ख्रीष्टमे आपनसिके आशा खाली इहे जीवनके लिए छै ते, दोसर आदमीसिके तुलनामे सबसे बेसी खतम हालत आपनसिके छै।

²⁰ मगर सच यी छै कि वास्तवमे परमेश्वर ख्रीष्टके मुर्दासे जिन्दा बनैल्कै छे। ऊ पहेला व्यक्ति छै जकरा मुर्दासे जिन्दा बनैल गेलै आर उहे ही सबूत छै कि परमेश्वर ऊ आदमीसिके भी जिन्दा बनैतै, जे मरि गेलै छे।

²¹ सभे आदमीसिके मौतके कारण यी छै, जे पहेला आदमी आदम कैल्कै। आर अहिने करिके मुर्दासे जिन्दा होना भी एकटा दोसर आदमीसे आबैछै आर ऊ दोसर आदमी ख्रीष्ट छै।

²² एकटा आदमी यानिकी आदमके पापके कारण सभे मानव जातिके मरे पडैछै। ओहिने करिके एकटा आदमी यानिकी येशू ख्रीष्ट जे कैल्कै छे ओकर कारण सभे मुर्दा आदमीसिके जिन्दा बनैल जैतै।

²³ मगर हरेक आदमी एकटा उचित क्रममे जिन्दा बनैल जैतै, पहेला ख्रीष्टके जिन्दा बनैल गेलै रहे आर आब जब ख्रीष्ट फेर वापस ऐतै ते, ऊ सभे आदमीसब जे ओकरसंगे नज्दिकके सम्बन्ध राखैछै, ऊसब फेरसे जिन्दा बनैल जैतै।

²⁴ फेर जब ख्रीष्ट, परमेश्वरके विरोध करेवाला सभे खराब शक्तिसे नाश करि देतै, तकरबाद संसारके अन्त भ्याजैतै। तब ख्रीष्ट आपन परमेश्वर पिताके आपन राज्य सौंपी देतै कि ऊ ओकरापर पुरा राज्य करै।

²⁵ ख्रीष्टके उटा राज्यपर शासन कर्है पड्तै जबतक कि परमेश्वर ओकर सभे दुश्मनसिके पुरा तरहसे परास्त नै क्यादै।

²⁶ सबसे पाछु नाश कैल ज्यावाला दुश्मन मौत छै।

²⁷ जब धरमशास्त्र कहैछै कि परमेश्वर सभे कुछु ख्रीष्टके शक्तिके अधिनमे देतै ते एकरामे परमेश्वर सामिल नैछै, कहिनेकी यी परमेश्वर ही रहै, जे सभे कुछु ख्रीष्टके शक्तिके अधिनमे देल्कै रहे।

²⁸ जब सभे कुछु परमेश्वरके बेटाके अधिकारके अधिनमे भ्याजैतै, ते ख्रीष्ट खुदके पुरा तरहसे पिता परमेश्वरके अधिकारके अधिनमे करि देतै, जे ओकरा ऊ अधिकार देल्कै। ताकी परमेश्वर ही सभैके लिए सभे कुछु है।

²⁹ यदि मुर्दा आदमीसिके फेरसे जिन्दा नैकैल जैछै ते, मर्ल आदमीसिके तरफसे बप्तिस्मा लिएवाला कुछु आदमीसिके रिवाजके कि मतलब छै। यदि परमेश्वर ऊ मुर्दा आदमीसिके फेरसे जिन्दा नैबनाबैछै ते ऊसब एखन भी यी रिवाजके पालन कहिने करैछै?

³⁰ जते तक कि आपनसिके बात छै, यदि मुर्दासिके जिन्दा नैबनैल जैछै ते, अपनासिके खुदके खतरामे राखना मूर्खता छै।

³¹ हे विश्वासी भ्या-बहिनसब, जेरंके यी बात पक्का छै कि हमरा तोरासिपर घमण्ड छै कि तुहेंसब आपनसिके प्रभु येशू ख्रीष्टके संगे एकजुट छैं, ओहिने करिके यी भी पक्का छै कि हमरा सभे दिन जान मार्ल जैके खतरा छै।

³² एफिसस सहरमे, हमर दुश्मनसब जंगली जानवरके जुगुर छै, जे हमरा हानी पहुँचाबैले चाहैछै। हमे एखन भी यी सभे सहन कहिने करैछियै, यदि हमर प्रतिफल इहे संसारमे ही छै। यदि यी सच हैतियै कि हमरा अन्तिम दिनमे जिन्दा नैबनैल जैतै ते, बढियाँ हैतियै कि हमे मौज कर्तियै, जेरं कि एकटा कहावत छै, “या अपनासब खो आर पी, कहिनेकी शायद क्याल अपनासब मरि जैबै आर उटा आपनसिके अन्त हैतै।”

³³ जे आदमीसब एरंको बातसब करैछै, ओकरसिके द्वारा मूर्ख नैबन, “खराब संगत बढियाँ चरित्रके बिगाडी दैछै।”

³⁴ तोरासिके फेरसे कि सही छै कहिके सोचना चाही आर पाप करैले छोडी देना चाही, कहिनेकी तोरसिमेसे कुछु आदमीसिके परमेश्वरके संगे सही सम्बन्ध नैछौ, इहे ल्याके हमे तोरासिके लाज लगाबैके लिए यी बात कहैछियौ।

³⁵ आर यदि उदाहरणके लिए कोय पुछैछै कि परमेश्वर मुर्दा आदमीसिके केरंके जिन्दा बनैतै या ओकरसिके शरीर केरं हैतै,

³⁶ केरं मूर्ख सवाल! ते हमर जबाब छै: बिहनसिके देख। पहेला बिहन रोपे पडैछै फेर ऊ टुसाबैछै आर जब ऊ टुस्या जैछै ते ओत्ते बिहन नैरहैछै।

³⁷ आर जे कुछु भी तुहें बुनैछैं, चाहे ऊ गहुम है या आर कोनो किसिमके अनाज है। यी खाली एकटा बिहन छै। एकर ऊ रुप नैछै जे गाछके हैतै।

³⁸ परमेश्वर गाछके ऊ रुप दैछै जे ऊ उटा गाछके लिए चाहैछै। हरेक प्रकारके बिहन आपन खुदके रुपमे बढैछै।

³⁹ आर संसारमे सभे अलग-अलग प्रकारके जिन्दा प्राणीसिके शरीर एक्के समान नैछै। आदमीके शरीर जानवरके शरीरके समान नैछै। चिडियासिके शरीर भी माछसिके शरीरसे अलग प्रकारके हैछै।

⁴⁰ आर जेरंके धर्तीपर अलग-अलग प्रकारके शरीर छै, ओहिने करिके आकाशमे भी छै, आर आकाशके चीजसिमे भी जे सुन्दरता हैछै, ऊ धर्तीके चीजसिके सुन्दरतासे अलग हैछै।

⁴¹ सुरुजके सुन्दरता कुछु अलग छै, आर चानके आपने सुन्दरता छै, आर तारासिके सुन्दरता कुछु अलग छै, कहिनेकी एकटा ताराके सुन्दरता दोसर ताराके सुन्दरतासे अलग छै।

⁴² ते अहिने करिके मुर्दा आदमीसिके फेरसे जिन्दा हुऐके समयमे भी हैतै। जे शरीरके ऊसब गाडैछै, ऊ एरंको शरीर छै, जे सडी जैछै, मगर जब यी फेरसे जिन्दा भ्याके उठैछै ते, यी एरंको शरीर हैतै जे नैसडे सकैछै।

⁴³ जब आपनसिके शरीरके गाड्ल जैछै, तब ऊ कुरुप आर कमजोर हैछै। मगर जब आपनसिके शरीर फेर जिन्दा हैछै तब ऊ सुन्दर आर शक्तिशाली हैछै।

⁴⁴ एकटा आदमीके शरीर जकरा गाड्ल जैछै, ऊ खाली यी संसारमे कोनो भी आदमीके जीवनके लिए लायक छै। मगर जब परमेश्वर ओकरा फेर मुर्दासे जिन्दा बनाबैछै ते ओकर नया शरीर स्वर्गमे जीवनके लिए लायक हैतै। यदि एकटा एरंको शरीर छै जे खाली संसारमे रहैके लायक छै ते, एकटा एरंको शरीर भी हैतै जे स्वर्गमे रहैके लायक छै।

⁴⁵ धरमशास्त्रमे लिख्ल छै, “पहेला आदमी आदम जिन्दा प्राणी भेलै।” आर अन्तिम आदम जे ख्रीष्ट छै ऊ कहियो खतम नैहुएवाला जीवन दैछै।

⁴⁶ उटा जीवन जे स्वर्गमे सभे दिनके लिए छै, ऊ पहेला नैआबैछै, बरु एकर सिवाय जे जीवन पहेला आबैछै ऊ छै आपनसिके धर्तीपरके जीवन। आर ओकरबाद स्वर्गके जीवन आबैछै।

⁴⁷ पहेला आदमी माटीसे बन्ल रहै। ख्रीष्ट जे दोसर आदमी छै, ऊ स्वर्गसे ऐलै छे।

⁴⁸ जे आदमीसब धर्तीसे सम्बन्धित छै, ऊसब धर्तीके पहेला आदमी आदमके जुगुर छै। मगर ऊ आदमीसब जे स्वर्गसे सम्बन्ध राखैछै, ऊ स्वर्गमे रहेवाला ख्रीष्टके जुगुर छै।

⁴⁹ आर जेरंके परमेश्वर अपनासिके ओरंको शरीर देल्कै, जेरं धर्तीके पहेला आदमीके रहै, ओहिने करिके विश्वासीसिके लगत ख्रीष्टके जुगुर शरीर हैतै, जे विश्वासीसब एखन स्वर्गमे छै।

⁵⁰ हे विश्वासी भ्या-बहिनसब, यी धर्तीपर आपनसिके शरीर मास आर खूनसे बन्ल छै, आर अपनासब आपन नाश हुएवाला शरीरके संगे स्वर्गमे परमेश्वरके राज्यमे रहैले नैपैबै। कहिनेकी ओत्ते कोनो मौत नैछै।

^51-52 यी गुप्त सच्चाईके सुन: अपनासब सभेको नैमर्बै, मगर जब अन्तिम बिगुल फुक्ल जैतै ते, अपनासब सभैके एक्के पलमे तुरन्ते पलक झपकते ही बदली देल जैतै। जब बिगुल फुक्ल जैतै ते, मुर्दा आदमीसिके जिन्दा बनैल जैतै आर फेर ऊसब कहियो नैमर्तै, आर उटा समयमे अपनासब जेसब जिन्दा छियै, आपनसिके शरीरके सभे दिनके लिए बदली देल जैतै।

⁵³ कहिनेकी आपनसिके यी शरीर जे आसानीसे मरि जैछै आर सडी जैछै, एकरा एकटा एरंको शरीरमे बदली देल जैतै, जे शरीर नैते कहियो मर्तै आर नैते कहियो सड्तै।

⁵⁴ जब एरं हैतै ते उटा वचन पुरा भ्याजैतै जे बात धरमशास्त्रमे लिख्ल छै, जे एरं कहैछै, “मौत पुरा तरहसे परास्त भ्याजैतै आर ओकर नाम निशान तक खतम भ्याजैतै।”

⁵⁵ “हे मौत तोर विजय कते रहलौ? हे मौत, आब तोरलगत हमरासिके चोट पहुँचाबैके कोनो शक्ति नैछौ। एरंके धरमशास्त्रमे जे लिख्ल गेलै छे उटा पुरा हैतै।”

⁵⁶ पापके कारण मानव जातिके मरे पड्तै। आर मानव जातिके पापके सजाय देल जाना चाही, कहिनेकी आदमीसब मूसाके विधि-विधानके उलंघन कैल्कै छे।

⁵⁷ मगर परमेश्वरके धन्यवाद है, कहिनेकी प्रभु येशू ख्रीष्ट जे आपनसिके लिए कैल्कै छे, ओकरद्वारा परमेश्वर अपनासिके पाप आर मौतपर विजय देल्कै छे।

⁵⁸ सेल्याके हे हमर प्यारा भ्या-बहिनसब, आपन विश्वासमे मजगुत र आर गलत शिक्षासिके द्वारा नैभटक, प्रभुके लिए जे काम तुहेंसब करैछैं ओकरामे विजय हासिल कर, कहिनेकी प्रभुके लिए तुहेंसब जे कुछु भी कर्भैं, ओकर फल तोरा जरुर मिल्तौ।