१ कोरन्थी 14 - केवट नया कारारपरमेश्वरके सन्देश आर अनजान भाषासिके वरदानसब 1 एक-दोसरसे प्रेम करैके हर सम्भव कोशिश कर आर आत्मिक वरदानसब पाबैके लिए इमानदारीसे इच्छा कर, खास करिके परमेश्वरके सन्देश घोषणा करैके लिए। 2 कहिनेकी जे आदमी अनजान भाषासिमे बोलैछै, ऊ आदमीसिसे नै मगर परमेश्वरके संगे बोलैछै। इहे ल्याके ओकर बात कोय नैबुझे सकैछै, कहिनेकी ऊ आदमी पवित्र आत्माके शक्तिके द्वारा गुप्त बातसिके कहैछै। 3 मगर जे आदमी परमेश्वरके सन्देशके घोषणा करैछै, ऊ आदमी विश्वासीसिके ओकरसिके विश्वासमे मजगुत करैके लिए, उत्साह दियैके लिए आर ओकरसिके दिलमे तसल्ली आनैके लिए सहायता करैछै। 4 जे आदमी अनजान भाषासिमे बोलैछै, ऊ आदमी खुदके विश्वासके मजगुत करैछै, मगर जे आदमी परमेश्वरके सन्देशके घोषणा करैछै, ऊ आदमी मण्डलीके सभे विश्वासी आदमीसिके विश्वासके मजगुत बनाबैछै। 5 हमे चाहैछियै, कि तुहेंसब सभेको अनजान भाषासिमे बोल, मगर एकरासे भी बेसी हमे चाहैछियै कि तुहेंसब परमेश्वरके सन्देशके घोषणा कर, कहिनेकी यदि अनजान भाषासब बोलेवाला आदमी यी बातके मतलब व्याख्या नैकरैछै कि ऊ मण्डलीके विश्वासीसिके विश्वासके मजगुत करैके लिए कि कहैछै, ते जे आदमी परमेश्वरके सन्देश घोषणा करैछै, ते ऊ बेसी महत्वपूर्ण काम करैछै। अनजान भाषासिके व्याख्या होना चाही 6 सेल्याके हे विश्वासी भ्या-बहिनसब, यदि हमे तोरसिकेलगत आबिके अनजान भाषासिमे बोलैछियै ते, हमरासे तोरा कोन फैदा हैतौ? यी तोरासिके सहायता तखनिहैं कर्तौ जब हमे तोरसिके लिए एकटा सन्देश आन्बौ जे परमेश्वर हमरा देल्कै छे या सचके ज्ञान या परमेश्वरके सन्देश या शिक्षा। 7 अहिने करिके जब तुहेंसब बसली या वीणा जेरं बाजाके बजाबैछैं, ते अगर तुहें ठीकसे धुन नैबजाबैछैं या फेर आवाजमे कोनो अन्तर नैछै ते फेर दोसर आदमीसब केरंके पहचान्तै कि उटा आवाज बसलीके छै या बीणाके छै। 8 आर युद्धमे यदि बिगुलके आवाज साफसे सुनाई नैदेतै ते, सेनासब युद्धके लिए तैय्यार नैहुए सकैछै। 9 ओहिने करिके, जब तुहेंसब एरंको शब्द बोलैछैं जे शब्द आदमीसब नैबुझे सकैछै ते, तुहेंसब जे बोलैछैं ओकर कोनो मतलब नैहैतौ। 10 यी संसारमे बहुते किसिमके अलग-अलग भाषासब छै, आर ऊ सभे भाषासिके मतलब छै। 11 मगर यदि अपनासब ऊ भाषाके नैबुझैछियै जे भाषा दोसर आदमीसब बोलैछै ते, यी एरं हैतै जेरं कि ऊ आदमीसब आपनसिके लिए विदेशीके जुगुर हैतै आर अपनासब ओकरसिके लिए विदेशीके जुगुर हैबै। 12 कहिनेकी तुहेंसब पवित्र आत्माद्वारा देल ज्यावाला विशेष क्षमताके लिए एतनें इच्छुक छैं, सेल्याके उटा क्षमतासिके पाबैके इच्छा कर जे मण्डलीमे विश्वासीसिके विश्वासके मजगुत करे सकैछै। 13 इहे ल्याके जे आदमी अनजान भाषासब बोलैछै, ऊ आदमी यी प्रार्थना करक कि ऊ जे बोल्लै छे ओकर मतलब ऊ खुद बुझाबे सकै। 14 इहे ल्याके यदि हमे अनजान भाषासिमे प्रार्थना करैछियै ते, हमर आत्मा प्रार्थना करैछै। मगर एकरासे हमर सोचके लिए कोनो फैदा नैछै, कहिनेकी हमे एकरा नैबुझे सकैछियै। 15 इहे कारणसे, हमे पवित्र आत्माके अगुवाईमे प्रार्थना करैले चाहैछियै, मगर हमे यी भी चाहैछियै कि दोसर आदमीसब यी बुझे सकै कि हमे कि कहैछियै। आर जब हमे गीत गाबैछियै ते हमे चाहैछियै कि हमर गीत पवित्र आत्मासे प्रेरित है, मगर यी भी जरुरी छै कि जे हमे गाबैछियै, ओकरा दोसर आदमीसब बुझे सकै। 16 मान कि कोनो साधारण आदमी तोरसिके संगतिमे छौ, जब तुहें आत्मामे परमेश्वरके प्रशंसा करैछैं। यदि ऊ आदमी तोर बातसिके बुझे नैसकैछै ते, तुहें परमेश्वरके धन्यवाद देलके बाद, ओकरा केरंके मालुम हैतै कि कखनी “आमेन” कहबै जे विषयके लिए तुहें प्रार्थना कैल्हैं छे। 17 परमेश्वरके लिए तोर देल धन्यवाद बहुते बढियाँ हुए सकैछै, मगर एकरासे दोसर आदमीसिके ओकरसिके विश्वासमे मजगुती नैमिल्तै। 18 हमे परमेश्वरके धन्यवाद चढाबैछियै, कि हमे तुहेंसब सभैके तुलनामे बेसी अनजान भाषासब बोलैछियै। 19 मगर एकर बावजुद हमे विश्वासीसिके एकटा मण्डलीके सभामे छियै ते, हमे एकर इस्तमाल नैकरैछियै कहिनेकी हमर लिए यी बढियाँ हैतै कि ओत्ते पाँचेटा शब्द बोलीके दोसर आदमीसिके सिखाबे सकियै जे शब्द बुझ्ल ज्या सकैछै, एकर सिवाय कि हजारो शब्द बोलियै जे नै बुझ्ल ज्या सकैछै। अनजान भाषा अविश्वासी आदमीसिके लिए एकटा चिन्ह 20 हे विश्वासी भ्या-बहिनसब, एकटा बच्चाके जुगुर नैसोच, मगर बच्चासिके जुगुर निर्दोष बन, जब खराबीके बात आबैछै, मगर एरंको बातसिके बुझैमे परिपक्क बन। 21 धरमशास्त्रमे एरं लिख्ल छै, “हमे विदेशीसिके माध्यमसे बात कर्बै जेसब हमर आपन आदमीसिके संगे अनजान भाषासब बोल्तै, तैय्योपर भी हमर आदमीसब हमर बात नैसुन्तै।” 22 सेल्याके अनजान भाषासब बोलैके वरदान अविश्वासी आदमीसिके लिए एकटा सबूत छै, कि ऊसब जाने सकै कि यी वरदान परमेश्वरसे आबैछै, यी विश्वासीसिके लिए नैछै। जब कि परमेश्वरके सन्देशके घोषणा करैके वरदान विश्वासी आदमीसिके लिए सबूत छै, ताकी विश्वासीसिके मजगुत कैल ज्या सकै, यी वरदान अविश्वासीके लिए नैछै। 23 ते यदि मण्डली एक जगहमे जमा भ्याके हरेक आदमी अनजान भाषामे बोल्तै आर यदि यी भाषा नैबुझेवाला आर अविश्वासी आदमी मण्डलीमे ऐतै ते ऊसब जरुर सोच्त्तै कि तुहेंसब पागल छैं। 24 मगर यदि सभे आदमी परमेश्वरके सन्देशके घोषणा करे लाग्तै, आर यदि कोय अविश्वासी या फेर एरंको आदमी जे यी भाषा नैबुझैछै, ऊ आदमी ओत्ते ऐतै ते, तोरसिके बोल्ल बातसे ओकरा महसुस हैतै कि ऊ आदमी पापी छै। उटा कारणसे ऊ आपन जीवन जियैके तरिका बदलैले चहतै। 25 ऊ आदमी जे बात सुनैछै, उटा सुन्ल बातसे ऊ बुझी जैतै कि परमेश्वर ओकर खराब सोचके बारेमे कि सोचैछै। आर ओकरा महसुस हैतै कि ऊ पापी छै आर ऊ पाप करैले छोडिके परमेश्वरके तरफ मन लगैतै। आर फेर झुकिके परमेश्वरके आराधना कर्तै आर ऊ आदमी मानी लेतै कि सचमे परमेश्वर तोरसिके बीचमे छौ। आराधनामे अनुशासन 26 हे विश्वासी भ्या-बहिनसब, सुन, कामसब केरंके कैल जाना चाही, जब तुहेंसब आराधनाके लिए जमा हैछैं ते तोरसिमेसे कोय गीत गाबै, कोय उपदेश दै, प्रभुके द्वारा देल गेल ज्ञान बाँटै, अगर कोय अनजान भाषामे बात करैछै ते दोसर आदमी ओकर मतलब बताबै। यी सभे बातसिके मकसद विश्वासीसिके विश्वासमे मजगुत बनाबैके लिए सहायता करना छै। 27 यदि कोय अनजान भाषामे बोलैले चाहैछै ते बेसीसे बेसीमे दी या तीन आदमी एक-एक करिके बोलै आर कोय आदमी अनजान भाषासिके मतलब बताबैके लिए ओत्ते जरुर होना चाही। 28 मगर मतलब बताबेवाला कोनो आदमी नैछै ते, अनजान भाषा बोलेवाला आदमी मण्डलीमे शान्त रहक आर व्यक्तिगत रुपसे पिता परमेश्वरसे बात करक। 29 परमेश्वरके वक्तामेसे दी या तीन आदमी खाली बोलक, आर यी जरुरी छै कि बाँकी सभे आदमी सुनै, बुझै आर जाँच करै कि ऊ आदमी जे बात बोल्लै छे सही छै कि नैछै। 30 मगर अगर संगतिमे बैठ्ल कोनो दोसर आदमीके परमेश्वरके सन्देश मिलैछै ते जे आदमी बोलैछै ओकरा रुकना चाही आर दोसर आदमीके बोलैले मौका देना चाही। 31 एरंके तुहेंसब सभेको पिता परमेश्वरके सन्देशके घोषणा करे सकैछैं, मगर एक-एक करिके ताकी सभेको सिखे सकै आर उत्साहित है। 32 आर एकटा परमेश्वरके वक्ता जे परमेश्वरके वचन बोलैछै ऊ खुदके नियन्त्रित करे सकैछै। 33 कहिनेकी परमेश्वर गडबडी मचाबेवाला परमेश्वर नैछै मगर शान्ति दिएवाला परमेश्वर छै। आर यी ऊ नियम छै जे परमेश्वरके सन्तसिके सभे मण्डलीसिमे पालन कैल जैछै। 34 जनानीसब मण्डलीके संगतिमे चुपचाप रहक, कहिनेकी ओकरासिके बोलैके अनुमति नैछै। ओकरासिके अधिनमे रहैके आज्ञा छै, जेरं मूसाके विधि-विधानमे भी लिख्ल छै। 35 अगर ऊ कुछु सिखैले चाहैछै ते, ओकरासिके संगतिमे नै पुछना चाही मगर घरमे आपन-आपन पतिके पुछक, कहिनेकी मण्डलीमे जनानीसिके बोलना शरमके बात छै। 36 परमेश्वरके वचन तोरासिसे पैदा नैभेलौ रहे। तुहेंसब ऊ नैछैं जकर लिए परमेश्वरके वचन ऐलै रहे। 37 यदि कोनो आदमी खुदके परमेश्वरके वक्ता या फेर पवित्र आत्माके द्वारा वरदान पैल सम्झैछै ते, ऊ जानी लै, कि जे बातसब हमे तोरासिके लिखैछियौ उटा प्रभुके आज्ञा छै। 38 मगर ऊसब हमर यी बातसिमे विश्वास नैकर्तै ते, तुहेंसब भी ओकरासिपर विश्वास नैकरिहैं। 39 सेल्याके हे विश्वासी भ्या-बहिनसब, परमेश्वरके सन्देश घोषणा करैके पुरा मनसे इच्छा कर आर अनजान भाषासिमे बोलेवालाके मना नैकर। 40 जे कुछु भी तुहेंसब मण्डलीमे करैछैं, उटा सभेटा उचित आर व्यवस्थित ढंगसे कैल जाना चाही। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation