१ कोरन्थी 1 - केवट नया कारारनमस्कार 1 हमे, पावल, यी चिट्ठी लिखैछियै। हमे ख्रीष्ट येशूके चुन्ल आर भेज्ल चेला हुऐले परमेश्वरके इच्छाद्वारा बोलैल छियै। हमे एत्ते आपनसिके विश्वासी भ्या सोस्थेनेससंगे छियै जे हमरा सहायता करैछै। 2 हमे यी चिट्ठी कोरन्थी सहरमे भेल परमेश्वरके मण्डलीके लिखैछियै जकरा ख्रीष्ट येशूमे एक बन्याके आपन आदमी हुऐके लिए परमेश्वर अलग कैल्कौ छे आर ऊ तोरासिके आपन पवित्र आदमी हुऐके लिए बोलैल्कौ छे। आपनसिके प्रभु येशू ख्रीष्टके प्रार्थना करैके लिए सभे आदमीसिके पवित्र बनैल जुगुर ऊ तोरासिके भी पवित्र बनैल्कौ छे, कहिनेकी ऊ आपनसिके सभैके प्रभु छै। 3 हमे प्रार्थना करैछियै आपनसिके परमेश्वर पिता आर प्रभु येशू ख्रीष्ट तोरासिके अनुग्रह आर शान्ति दौ। पावलके द्वारा परमेश्वरके धन्यवाद 4 हमे तोरसिके खातिर आपन परमेश्वरके सभे दिन धन्यवाद दैछियै, कहिनेकी येशू ख्रीष्टमे तोरासिके एक बन्याके परमेश्वर आपन अनुग्रहद्वारा तोरासिके बहुते आशिष देल्कौ छे। 5 कहिनेकी तुहेंसब ख्रीष्ट येशूमे एक हुऐके कारणसे हर तरहसे तुहेंसब आशिष पैल्हैं छे। यानिकी, ऊ तोरासिके ओकर वचन बोलैके आर बुझैके लिए सभे किसिमके विशेष योग्यतासब देल्कौ छे। 6 एरंके परमेश्वर तोरासिके ख्रीष्टके बारेमे भेल सन्देशके सच्चा साबित कैल्कौ छे। 7 इहे कारणसे तुहेंसब आपनसिके प्रभु येशू ख्रीष्टके फेर वापस आबैके इन्तजार करैबेरियाँ पवित्र आत्मा तोरासिके सभे किसिमके खूबी देल्कौ छे। 8 आपनसिके प्रभु येशू ख्रीष्टके यी संसारमे वापस आबैके दिनमे तोरासिके दोषरहित राखैले परमेश्वर तोरासिके अन्ततक विश्वासमे मजगुत राख्तौ। 9 परमेश्वर यी काम कर्तौ कहिनेकी परमेश्वर जे बोलैछै उटा बात करैमे ऊ विश्वासयोग्य छै आर ऊ तोरासिके आपन बेटा, आपनसिके प्रभु येशू ख्रीष्टके संगे सम्बन्धमे बोलैल्कौ छे। कोरन्थी सहरके मण्डलीमे फुट 10 हे विश्वासी भ्या-बहिनसब, आपनसिके प्रभु येशू ख्रीष्टके देल अधिकारसे हमे तोरासिके अनुरोध करैछियौ कि तुहेंसब एक-दोसरसे सहमत हु ताकी तोरसिके बीचमे कोनो फुट नैहौ, बरु एक दोसरसे समान विचार राखिके आर समान मकसद राखिके मेल-मिलापमे र। 11 कहिनेकी विश्वासी भ्या-बहिनसब, तोरसिके बीचमे वाद-विवाद छै कहिके क्लोएके परिवारसब हमरा खबर देल्कै छे। 12 हमर कहैके मतलब इहे छै कि तुहेंसब कोय कहैछैं, “हमे पावलके चेला छियै” कोय कहैछैं, “हमे अपोल्लोसके चेला छियै” कोय, “हमे पत्रुसके चेला छियै” आर कोय, “हमे ख्रीष्टके चेला छियै” कहिके कहैछैं। 13 तुहेंसब जे करैछैं उटा बात बढियाँ नैछै कहिनेकी ख्रीष्ट दीटा समूहमे बाँट्ल नैछै। हमे, पावल तोरसिके लिए क्रूसमे जान मार्ल नैगेलियौ। तुहेंसब हमर नाममे बप्तिस्मा नैलेल्हैं छे। 14 हमे परमेश्वरके धन्यवाद दैछियै, कि हमे तोरसिके मध्येमे विश्वासी भ्यासब क्रिस्पस आर गायसके सिवाय आर कक्रहौ भी बप्तिस्मा नैदेलियै छे। 15 सेल्याके कोय भी यी नैकहे सकैछै कि तुहेंसब हमर चेलाके रुपमे बप्तिस्मा लेल्हैं। 16 हौं, हमे स्तिफनसके परिवारके भी बप्तिस्मा देलियै छे, एकरसिके सिवाय हमे आर दोसर आदमीसिके बप्तिस्मा देल बात हमरा मालुम नैछै। 17 कहिनेकी बप्तिस्मा दियैले नै मगर खुश-खबरी प्रचार करैले ख्रीष्ट हमरा भेजल्कै छे। जब हमे आदमीसिके परमेश्वरके सन्देश सुनाबैछियै, आदमीसिके हमर बातमे विश्वास दिलाबैके लिए हमे आदमीसिके आपन चलाक विचारसब प्रयोग नैकरैछियै। यदि हमे ओरं कर्बै ते आदमीसब हमरा खाली विश्वास कर्तै कहिनेकी हमे चलाकीवाला बात कैलियै रहे आर ख्रीष्ट क्रूसमे मर्ल सन्देश आदमीसिके जीवनमे शक्तिशाली काम करे नैसक्तै। ख्रीष्टके शक्ति आर परमेश्वरके ज्ञान 18 कहिनेकी सजाय पाबैके लिए परमेश्वरसे अलग भेल आदमीसब ख्रीष्ट क्रूसमे मर्ल शिक्षाके महत्वहीन समझतै, मगर अपनासब जेसब बचैल छियै, अपनासिके मालुम छै कि यी परमेश्वरके शक्तिके सबूत छै। 19 कहिनेकी धरमशास्त्रमे परमेश्वर एरं कहैल्कै छे, “हमे देखैबै कि यी संसारके आदमीसब जकरा बुद्धिमान छै कहिके सोचैछै ऊ आदमीसिके विचारसब सचमे ही मूर्ख विचार छै। हमे देखैबै कि ऊसब सचमे बुद्धिमान नैछै।” 20 आर एकरासे हमेसब बुझैछियै कि बुद्धिमान आदमीसिके बुद्धिके कोनो महत्व नैछै, पढाई करेवाला आदमीसिके आर यी संसारमे केरंके बोले पडैछै कहिके जानेवाला आदमीसिके समझके भी कोनो महत्व नैछै। कहिनेकी परमेश्वर अपनासिके यी देखैल्कै छे कि यी धर्तीमे भेल ज्ञानके कोनो महत्व नैछै। 21 हमे यी कहैछियै कहिनेकी परमेश्वर बुद्धिमानीसाथ फैसला कैल्कै कि यी संसारके आदमीसब ओकरा आपन बुद्धिके माध्यमसे नैचिन्हे सक्तै। सेल्याके विश्वास नैकरेवाला आदमीसब हमरसिके खुश-खबरीके मूर्खता कहेल पर भी आपनसिके प्रचार कैल खुश-खबरीमे विश्वास करेवालासिके बचाबैके परमेश्वरके योजना रहै। 22 यी बात यहूदी आदमीसिके लिए मूर्ख बात जुगुर लागैछै कहिनेकी ऊसब स्वर्गसे एकटा चमत्कार माँगैछैं आर यी बात गैर-यहूदी आदमीसिके लिए भी मूर्ख बात जुगुर लागैछै जेसब मानव बुद्धि खोजैछै। 23 मगर हमेसब यी प्रचार करैछियै कि अपनासिके आपनसिके पापसिसे छुटकारा दिलाबैके लिए ख्रीष्ट क्रूसमे मर्लै। यहूदी आदमीसिके लिए यी ठोकर लागैके बात भेलै आर गैर-यहूदी आदमीसिके लिए यी मूर्ख बात ठहर्लै। 24 मगर जकरा परमेश्वर ओकर आदमी हुऐके लिए बोलैल्कै, चाहे यहूदी आदमीसब है, या गैर-यहूदी आदमीसब है, इहे ख्रीष्ट परमेश्वरके शक्ति आर बुद्धि छै। 25 कहिनेकी जे परमेश्वरके मूर्खता जुगुर दिखाई दैछै उटा बात मानव बुद्धिसे बेसी बुद्धिमान छै आर जे बात परमेश्वरके कमजोरीके जुगुर दिखाई दैछै उटा बात मानव शक्तिसे बेसी शक्तिशाली छै। खाली प्रभुमे घमण्ड 26 हे विश्वासी भ्या-बहिनसब, विचार कर कि जब परमेश्वर तोरासिके बोलैल्कौ रहे तखन तुहेंसब केरं रहैं। मानव विचारसे तोरसिमेसे बहुते झन बुद्धिमान नैरहैं, आर तोरसिमेसे बहुते झन शासकसब नैरहैं, आर सचमे तोरसिमेसे बहुते झनके मयाँ-बाबु शासक नैरहौ। 27 मगर बुद्धिमान आदमीसिके लज्जित बनाबैके लिए परमेश्वर ओकरासिके चुनल्कै, जे संसारके नजरमे मूर्खता छै आर शक्तिशालीसिके लज्जित बनाबैके लिए ओकरासिके जे संसारके नजरमे कमजोरी छै। 28 आर परमेश्वर एरंको आदमीसिके चुनल्कै, जकरा संसारके द्वारा तिरस्कार कैल गेलै छे, एरंको आदमीसब जकरासिके कोनो मोलके नैसमझ्ल जैछै आर ओकरसिके उपयोग ओकरा नाश करैके लिए कैल गेलै जकरा संसार महत्वपूर्ण सम्झैछै। 29 परमेश्वर यी कैल्कै ताकी कोय भी आदमी परमेश्वरके समनामे घमण्ड नैकरे सकै। 30 मगर परमेश्वर तोरासिके येशू ख्रीष्टमे एक बन्या देल्कौ छे, आर ख्रीष्टके द्वारा ऊ अपनासिके आपन बुद्धि दैछै। परमेश्वर अपनासिके धर्मी घोषित कैल्कै छे। ख्रीष्टके द्वारा अपनासब पवित्र बनैल छियै, आर ऊ अपनासिके पापसिसे छुटकारा देल्कै छे। 31 ख्रीष्ट आपनसिके सभे चीज हुऐके कारण धरमशास्त्रके कहेल जुगुर कर, “घमण्ड करेवाला आदमीसब प्रभु जे कैल्कै छे उटा बातमे ही घमण्ड करक।” |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation