Salomoni Yokemae 1 - The Keyagana NT and 25 OT books

¹ Mani yokemo Salomoniʼa avoʼmo kae maleʼniya yokemoʼmo muki yokeʼamo ago aeno agaseʼniye.

² Nagaefeʼmo kahau kayamopafiʼmo kahauʼniya kavaʼmoʼa alagepa nofi alagafati aniʼmoʼa nehiya agufa hagaʼamo ago aeno agaseʼniyaʼmofeʼmo yafayaʼmo huka natesanafeʼmo neʼnahaiye.

³ Asole alagepa atumo neʼaiya uveliletiʼmo kagufaleʼmo fale maleʼnanageno kagufalegatiʼmo alagepa atumo neʼaiye. Kagikamoʼmo alagepa atuʼmo neʼaiya aniʼmo aino lakiʼniya anikana huno haneʼneno alagepa atumo neʼaiyaʼmofeʼmo veʼeʼmo magokepi lokaeʼa ohavaeʼnaya aʼmafaʼne anagaʼmogimo kagaefeʼmo hapau apayamopafiʼmo nehapaiye.

⁴ Kagaemo nayate heka navayu hulika neʼegetao lagaemo nagu nagu huta eta kakame huta ugune. Kini vekamoʼmo navalelinuno noʼafiʼmo maisuvafeʼmo nateʼniye. Kao vayaʼmogitamo kagaefekeʼmo lamogaga aiteta amuse hugune. Apakaemo alagepa nofi alagafati anifeʼmo apakesamo afiteʼa apamogaga neʼaiyaʼmonanafa lagaefeʼmo kahau kayamopafiʼmo kahauʼniya kavafekeʼmo lagesa afifi huta lamogaga aigune. Fatago vayaʼmogi kagaefekeʼmo hapau apayamopafiʼmo nehapaiye.

⁵ Yulusalemu aʼmafaʼne anagaʼmogitapae, huno, nagufaʼamo anupa nagufamo haneʼniyaʼmonanafa kanale nagufaʼe a kanomo maiʼnove. Nagaemo Keta vayaʼai seli noʼapigana huʼna maiʼnovaʼmonanafa Salomoniʼa alagepa kenamo asai maleʼniya kenagana huʼna maiʼnove.

⁶ Anupa nagufamo haneʼniyaʼmofeʼmo afa a kanoe, hutapa oʼnageyo. Yegemoʼmo naleno alino ani agufa nagufamo kalino nateʼniye. Itaʼnimoʼmo ve mafaʼne anagaʼamogimo apaipamo leʼa nateteʼapaeʼmo, uka nofi hoyatileʼmo yagaiyo, huʼa naha paiʼnae. Vaehae, nagaiʼni hoyaleʼmo alagepa huʼna oʼyagaiʼnove.

⁷ Nagupi mafaʼnemoʼmo lusi kava huno hau ayamopafiʼmo hauʼniya vekaʼnimogae, huʼna, sipisipi anagakamo haiyategamo apavalelikuka neʼyaʼmo neʼapamine. Yegemo haineno namotule neʼaeya afinaʼmo haiyategamo apavalelikuka neʼapatanageʼa maiʼa falu nehae. Naha paigeʼnao hosu kavanageʼna kaʼmo ataleʼna kavagi nehaya vayaʼmogi sipisipiʼeʼmo magokepi lokaeʼna maino.

⁸ Kanale alagepa a kanomogae, huʼna, muki aʼne anagaʼmo ago aeka apakaseʼnane. Ani kotegamo oʼageʼnisanaʼmoʼmo sipisipi anagaʼai apaiyakamo alinika aise meme anagakamo apavalelikuka sipisipileʼmo neʼyagaiya vayaʼai seli no haopaleʼmo uka neʼyaʼmo apamiyo.

⁹ Nahau nayamopafiʼmo neʼnahaiya aʼnimogae, huʼna, Kagaemo Kini vekamo Felo hosi anagaʼamogi kame hisayafeʼmo talalamo halauliʼa neʼvaya hosigana huka maiʼnane.

¹⁰ Muki kayokateʼmo haneʼniya konali yakamoʼa kaugosafiʼmo aeno ha nele. Kagaemo kanale sesumo lugokafiʼmo huka aliʼnanageno alagepa huno aeno ha nele.

¹¹ Lagaemo konali yakamo goli yafatetiʼmo alo huge siluva yafatetiʼmo alo huge huteta kamigune.

¹² Kini vekaʼnimo hiʼyalamuʼaleʼmo siyateʼmo fai maiʼnigenoʼaeʼmo fale maleʼnova aniʼmoʼa alagepa atuʼamoʼmo aino atagu nefae.

¹³ Nahau nayamopafiʼmo neʼnahaiya vekaʼnimoʼa meya hayafatiʼmo alagepa atumo neʼaiya anikana huno maiʼneno muki haniʼilagamo nuʼnilaʼmogani folagapiʼmo havaegaiye.

¹⁴ Nahau nayamopafiʼmo neʼnahaiya vekaʼnimoʼa Enigeti kotegatiʼmo nofi hoyafatiʼmo yosa ausemoʼmo alagepa atumo neʼaiya yosa ausegana huno maiʼniye.

¹⁵ Nahau nayamopafiʼmo neʼnahaiya aʼnimogae, huʼna, vaeʼkanale alagepa a kanomo maiʼnane. Heʼkanale alagepa a kanomo maiʼnane. Kaulagamoʼmo kaugoʼyavemo aulagagana huno haneʼniye.

¹⁶ Nahau nayamopafiʼmo neʼnahaiya vekaʼnimogae, huʼna, Vaeʼkanale alagepa vekamo maiʼnane. He kanale alagepa vekamo maiʼnane. Hipatiʼamo alino hegafa hu maleʼniye.

¹⁷ Nokotiʼaleʼmo kanale yosamo haneʼniye. Yofo yosamo sita yosamo haneʼnigeno hanae yosamo paini yosamo haneʼniye.