Neniyo 1 - The Keyagana NT and 25 OT books

Mamiloni kini vekamoʼmo mago Yuta neya vayaʼmo Yuta kotegatiʼmo apavalelineno koʼaleʼmo apateʼnigeʼa maiʼnaya gemae

¹ Yehoiyakimiʼmo Yuta vayaʼmogi kini vekamo afole aiteno loleʼe magoʼe kafugamo Yuta vayaʼaiteʼmo yagaino apateʼnigenoʼaeʼmo Nepukanesaʼa Mamiloni kini vekamo Yulusalemu taonifiʼmo eno ami vayaʼamogi kamemo hisayafeʼmo taonileʼmo faiʼa vego huʼnae.

² Ala kava neʼmoʼa Yuta vayaʼai kini vekaʼapimo Yehoiyakimiʼmo avaleno Nepukanesa ayapi ateʼniye. Ateteno mono noʼafiʼmo haneʼniya yaʼmo amiʼnigeno mago kapugi yuvapagi huno alinino Mamiloni kotega uno gotiʼamo nopiʼmo maleʼniye.

³ Kini vekamo Nepukanesaʼa meku vayaʼaiteʼmo yagaiʼniya vekamo Asipenasifeʼmo ha painoʼaeʼmo, Mago Yuta neya vayanagi kini afamo anaga vayapati vayanagi huka apavalelika eno.

⁴ Alagepa apaugosa apakufaʼe neya vayaʼmo apakufaleʼmo mago yaʼmo ohapauno alagepa huno haneʼnisiya vayaʼageʼmo apavalo. Apakaemo alagepa huʼa sukulu huteʼa muki yapiʼe kavapiʼeʼmo alagepa huʼa afiteʼa ageʼnisaya neya vayaʼmo malage huʼa afiʼa halesaya agufa vayaʼmo apakeka apavalelika egane. Noʼnifiʼmo aliʼyaʼmo alige sukulu huteʼa Mamiloni vayaʼai apakemo afige Mamiloni mukufi gemo afige hugae, huno ha paiʼniye.

⁵ Kini vekamoʼmo ani ge huteno, muki afinaʼaeʼmo neʼyaʼe aniʼeʼmo neʼnova agufa neʼyaʼmo magoke aiyaya huʼa negae. Apakaemo loleʼe magoʼe kafugamo sukulu huteʼa aliyaʼnimo aligae, huno hu maleʼniye.

⁶ Ani Yuta neya vayapatiʼmo loleʼe loleʼe vayaʼmo apakiʼapimo Neniyoʼagi Hananaiyaʼagi Misayeliʼagi Asalaiyaʼagi huʼa maiʼnae.

⁷ Apakaemo meku vayaʼaiteʼmo yagaiʼniya vekamoʼmo saufa apakimo apateʼniye. Neniyofeʼmo Melitesasaʼae huno atege Hananaiyafeʼmo Satalakiʼae huno atege Misayelifeʼmo Misakiʼae huno atege Asalaiyafeʼmo Ameʼnagoʼae huno atege huʼniye.

⁸ Neniyoʼa kini vekamo nopatiʼmo haga neʼyaʼe aniʼeʼmo nesiyafeʼmo ohauʼnigeno aipafi agesamo afinoʼaeʼmo, oʼnegauve, huno huʼniye. Fiku yanageʼna nesuvana Goti aulagaleʼmo mono kavatefeʼmo aliʼna hosu huʼna ategauve, huno agesamo afiʼniye. Afiʼniyaʼmofeʼmo meku vayaʼaite yagaiʼniya vekaeʼmo alu neʼyaʼmo agaemo amisiyafeʼmo ge huno afi geʼniye.

⁹ Gotiʼa Neniyoʼmo ha maeʼnigeno meku vayaʼaiteʼmo yagaiʼniya vekamoʼmo Neniyofeʼmo alagepa huno hauʼnigeno ha maesiya kavaʼmo huʼniye.

¹⁰ Meku vayaʼaiteʼmo yagaiʼniya vekamoʼmo Neniyofeʼmo ani ge huno ha paiʼniye. Kini vekamoʼmo ani agufa neʼyaʼmo nesayafeʼmo ago lekana pai maleʼniyaʼmofeʼmo agaefeʼmo koli nehuve. Lapakaemo lapakufamoʼmo hosisigeno alu neya vayaʼmogi apakufamoʼmo kanale hisigenoʼaeʼmo inagi kini vekamoʼmo nagaemo kamitimo namagisifi huʼna nagesamo afuve.

¹¹ Meku vayaʼaiteʼmo yagaiʼniya vekamoʼmo mago vekamo Neniyotenagi Hananaiyatenagi Misayelitenagi Asalaiyatenagi huno yagaino apatesiyafeʼmo lekana paino ateʼniye. Neniyoʼa lekana paino ateʼniya vekaeʼmo hunoʼaeʼmo,

¹² Kahaoke hovanagi, huno, lagaetegamo ani kavaʼmo amalageka huka agegane. Naya loleʼa agufa afinaʼmo hoyalega neʼyaʼagenagi anilafanagi huka lamisanageta negaune.

¹³ Inagi kagaemo ani afinaʼmo alu neya vayaʼmo kini vekamo nopatiʼmo haga neʼyaʼageʼmo neʼnaya vayaʼai apakufalegaʼe lagae lagufalegaʼeʼmo agegane. Inagi agetekaeʼmo kagaemo lagaetegamo na agufa kavaʼmo huguve, huka hisapi kanalenageka afaʼa hugane, huno ha paiʼniye.

¹⁴ Inagi neʼyate yagaiʼniya vekamoʼmo, kanalene, huno huteno naya loleʼa afinaʼmo amalageka huno hoyalega neʼyanagi anilafanagi huno apamiʼniye.

¹⁵ Inagi naya loleʼa afinaʼmo ago hano hutegenoʼaeʼmo apakeyana apakufamoʼmo kanale huteno magoʼe huno lokiya vaiʼnigeno alu neya vayaʼmo kini vekamo haga neʼyaʼamo neʼnaya vayaʼmo ago aeʼa apaka seʼnae.

¹⁶ Inagi neʼyate neʼyagaiya vekamoʼmo neʼyaʼmo haga neʼyaʼe nofi alagafati aniʼeʼmo oʼapamino hoyalega neʼyageʼmo apamime apamime uʼniye.

¹⁷ Gotiʼa ani loleʼe loleʼe neya vayaʼmo afisaya kavaʼe afiteʼa agesaya kavaʼe mukufiʼmo ageteʼa afisaya apakesaʼeʼmo apamiʼniye. Neniyoʼa alagamuna agegekana huno muki kavaʼmo aepaʼamo agege alagamunamo aepaʼamo agege huʼniye.

¹⁸ Apakaemo loleʼe magoʼe kafugamo ago sukulu hutagenoʼaeʼmo kini vekamoʼmo apakesiyafeʼmo lekana pai maleʼniya afinaʼmo afole aiʼnigeno meku vayaʼaiteʼmo yagaiʼniya vekamoʼmo apavalelino uno kini vekamo aulagaleʼmo apateʼniye.

¹⁹ Kini vekamoʼmo apakaeʼeʼmo gege hutenoʼaeʼmo ageʼniyana Neniyoʼagi Hananaiyaʼagi Misayaliʼagi Asalaiyaʼagi huʼa alu neya vayaʼmo ago aeʼa apaka seʼnageno apakeʼniyaʼmofeʼmo kini vekamo aliʼyaʼamo aliʼnae.

²⁰ Kini vekamoʼmo apakaefeʼmo asole yafeʼmo ge huno apafi ageʼniyana apakaemo afiteʼa ageʼnaya kavaʼmoʼa Mamiloni apaune vayaʼe afole aisiya kavaʼmo agesayafeʼmo kanefiʼmo ageʼa aiyaka neʼaliya vayaʼeʼmo afiteʼa ageʼnaya kavaʼmo ago aeno apaka seʼniye.

²¹ Neniyoʼmo ani kini vekamo aliʼyaʼmo alime alime neʼvigeno alu kini vekamo Sailasiʼmo afole aiʼniye.