Mai'naya kavane 1 - The Keyagana NT and 25 OT books

Neya vayaʼmo alino apaya maleʼniya gemae

¹ Isaleli kini vekamo Salomoniʼa Nevini mafaʼnemoʼmo mani aupa aupa gemo avoʼmo kae maleʼniye.

^2-3 Ani alagepa gemoʼmo alino lapaya malesigetapa afitetapaeʼmo gemo aepaʼamo alita fako hutapa afigae. Mani mukufi alagepa gemoʼmo alino lapaya malesigetapa afitetapa agege api kavaʼmo huge alagepa hutapa alita fako huge vayaʼaitegamo fatago kavaʼmo huge hisayafeʼmo alino lapave ligiye.

⁴ Ani gemoʼmo oʼafiʼnaya vayaʼmogi afiteʼa alagepa kavaʼmo hisayafeʼmo alino apave ligiye. Neya vayaʼmo afiteʼa agesayafeʼmo alino apave ligiye. Afiteno ageʼnisiya vekamoʼmo ani gemo afitenoʼaeʼmo magoʼe huno afiteno agegaiye.

⁵ Alagepa huno afiʼnisiya vekamo kaʼmo alino ho huno ategaiye.

⁶ Apakaemo aupa aupa gemo aepaʼamo alagepa huʼa afige kalafefa gemo aepaʼamo alagepa huʼa afige afiʼnaya vayaʼmogi hisaya gemo alagepa huʼa afige fala kino haneʼniya gemo alagepa huʼa afige hugae.

⁷ Inagi Ala kava nefeʼmo koli nehaya kavaʼmoʼa afiteʼa agesaya kavaʼmo aepa nefaiya kavaʼmo haneʼniyaʼmonanafa negi vayaʼmogimo afiteʼa ageʼnaya gelefeʼmo apakameʼyamo amiteʼa aliʼa apaya neʼmalaya gemo noʼafiye.

⁸ Mafaʼnenimogae, huʼna, afokamoʼnamo aliʼna kaya neʼmalova gemo afiyo. Itakamo keʼaepa geʼamo amagika oʼatalo.

⁹ Geʼanimoʼmo alagepa konali yakamo kagenopaleʼmo hanegaiye. Lugokafiʼmo alagepa konali senimo huka aligane.

¹⁰ Mafaʼneʼnimogae, huʼna, hosu vayaʼmogi hosu kavaʼmo hisanafeʼmo kagesamo faiteʼa kayateʼmo alisayafeʼmo nehisagekaeʼmo geʼapimo afiteka akame osuvo.

¹¹ Apakaemo huʼapaeʼmo, Lagaeʼeʼmo egetao. Lagaemo mago vayaʼmo apamagisunafeʼmo uta ka agiʼnaleʼmo fala kita maiʼneta apamagigune. Mago hosu kavaʼapimo ohaneʼnegaiyaʼmonanafa afaʼa lahauʼniya kavaʼmo akame huta kamitimo apamagigune.

¹² Lagaemo malage huta uta apamagisunageʼa faligae. Falisaya kavaʼmo malage huno vayaʼaiteʼmo afole aiʼnigeʼa faliteʼa vayaʼmo faliʼa uʼa neʼmaiya kotegamo neʼvaya kava huta uta apamagigune.

¹³ Lagaemo ani vayaʼmogi alopa monileʼyaʼmo aeno agaseʼniya kagemi yaʼapimo aligune. Lagaemo alinita uta notifiʼmo malesunageno notifiʼmo kili paegaiye.

¹⁴ Eka lagaeʼeʼmo lokaegetao. Alita fako huta magoke aiyaya huta aligune, huʼa hisagekaeʼmo geʼapimo oʼafiyo.

¹⁵ Mafaʼneʼnimogae, huʼna, Neʼvaya kateʼmo oʼuvo. Kaiyaleʼmo ageka maiteka apakame huka oʼuvo.

¹⁶ Apakaemo hosu kavaʼmo hisayafeʼmo nagu nagu huʼa neʼvae. Malage huʼa vayaʼmo kamitimo apamagisayafeʼmo nehae.

¹⁷ Mago vekamoʼmo umenimo maleʼnisigeʼa nama anagaʼmogimo agesayaʼmoʼmo eʼa ohaigae.

¹⁸ Nama anagaʼmo eʼa ohaigayaʼmonanafa ani vayaʼmogi uʼa umenimo aliʼa avayaka hu maleʼnayanageno apakaiʼapimo apatafaugiye. Maleʼnaya umenimoʼmo apatafausigeʼa faligae.

¹⁹ Hapaʼye nehigeʼa fikumo neʼaliya vayaʼmogimo ani agufa kavaʼmo nehae. Hapaʼye nehiya vayaʼmogi apakaiʼapimo aliʼa hosu huʼa neʼapatae.

Alagepa gemo noʼafiya vayaʼmo lusi kana yaʼmo neʼaliye, huno huʼniya gemae

²⁰ Ageteno afiʼniya kavaʼmoʼa mago a kanogana huno maiʼneno maketileʼmo maiʼnaya vayaʼaifeʼmo ge nehiye.

²¹ Aliʼa anupa huʼa maiʼnaya yateʼmo maiʼneno ge nehiye. Yafa lafi kegiʼyamo haopaleʼmo aliʼa anupa huʼa neʼmaiya vayaʼaifeʼmo ge nehiye. Agaemo ina ge huno huʼniye.

²² Oʼafiʼnaya vayaʼmogitapamo na magi afinaʼmo gemo oʼafitapa maime maime neʼutapa gemo noʼafiya kavafeʼmo olapaugiye. Ge neʼafiya kavafeʼmo huʼa faipa huʼa ateteʼa apakameʼyamo neʼamiya vayaʼmogi huʼa faipa huʼa neʼataya kavafeʼmo apamogaga neʼaiye. Negi vayaʼmogi afisayafeʼmo nohapaiye.

²³ Nagaemo huʼnaeʼmo, lapakaemo hosu kavaʼmo nehae, huʼna nehisugetapaeʼmo afitetapa ataleta aitapa afe leyo. Nauneʼnameʼmo aliʼna lapakaetegamo aniʼmo lakigekana huʼna lapamiteʼna geʼnimo afisayafeʼmo lapa paiguve.

²⁴ Keya aeʼna ge huʼnovana oʼafiʼnae. Nagesayafeʼmo nayaʼmo ataleʼnovana aulu hetapa oʼnageʼnae.

²⁵ Aliʼna api aiʼna lapateʼnovana olapauʼnigetapa lapavenatuʼna hetapa atalegekana hutapa ataletetapa geʼnimo oʼafiʼnae. Hosu kavaʼmo nehae, huʼna lapa paiʼnogetapaeʼmo lapakameʼyamo namiʼnae.

²⁶ Ani kavaʼmo huʼnayaʼmofeʼmo hanageke yaʼmo neʼalisageʼnaeʼmo kigi huʼna lapategauve.

²⁷ Lusi kava huno yasi aliteno ko aigekana huno hosu kavaʼmo lapakaeteʼmo afole aisigetapa lapamoʼyamo aigae. Lusi kava huno yasi aligekana huno aliteno alino lapagoʼya lagauno lapatalegaiye. Lapakafu kisigetapa lusi hosu kavaʼmo hutapa maigae.

²⁸ Ani kavaʼmo hutapa maiʼnetapaeʼmo nagaefeʼmo keya aeta ge hugayaʼmonanafa getapimo oʼafiguve. Lapayamukiki hutapa kahauya hutapa nagesayafeʼmo hugayaʼmonanafa oʼnagegae.

²⁹ Gemo afisayafeʼmo alagi ohapauʼniyaʼmofeʼmae. Ala kava nefeʼmo koli huteʼa akame hisayafeʼmo ohapauʼniyaʼmofeʼmae.

³⁰ Aliʼna api aiʼna lapateʼnogetapaeʼmo olapauʼnigetapa geʼnimo oʼafiʼnae. Hosu kavaʼmo nehae, huʼna lapa paiʼnogetapaeʼmo olapauʼnigetapa lapavenatuʼna hetapa atalegekana hutapa ataletetapa lapakameʼyamo namiʼnae.

³¹ Ani kavaʼmo huʼnayaʼmofeʼmo hosu kavaʼapilefeʼmo miyaʼapimo aligae. Vae, huʼna, Huʼnaya kavaʼmoʼa hosu yosa alagamo aesigeʼa lagiʼa negae.

³² Gemo noʼafiya vayaʼmogimo nagaemo apakameʼyamo namiʼnayanageno ani kavaʼapimoʼmo hapaesigeʼa faligae. Negi vayaʼmogi huʼapaeʼmo, alagepa huta maiʼnone, huʼa nehaya geʼapimoʼmo apakaiʼapimo alino hano huno apatalegaiye.

³³ Apatalegaiyaʼmonanafa geʼnimo alagepa huʼa apaketafo huʼa neʼafiya vayaʼmo ofaliʼa afaʼa maigae. Apakaemo hosu kavaʼmo afole aisiya kavafeʼmo koli osuʼa afaʼa maigae.