3 Yoni 1 - The Keyagana NT and 25 OT books

Yoniʼa napa tali avoʼmo kaeʼniya gemae

¹ Nagaemo Goti vayaʼaleʼmo yagaiʼna neʼapatova vayatama vekamo Yoniʼnamo lama gelefeʼmo nahau nayamopafiʼmo nahauʼniya Gaiyasigaeʼmo mani gemo avoʼmo nekaove.

² Nahauʼniya vekaʼnimogae, huʼna, Kagupi mafaʼnekamo alagepa huno neʼmaiya kava huno kagufamoʼmo alagepa huno hanesigeno aliʼyakamoʼmo alagepa huno afole aisiyafeʼmo nunumuʼmo huʼna nekatove.

³ Mago konagatimogi eʼa huʼapaeʼmo, lama geleʼmo alagepa huno maiʼniye, huʼa kava gemo huʼa naha paiʼnageʼna afiteʼnaeʼmo namogaga aiʼnove. Ageʼnovana lama gemo alagepa huka akame nehane.

⁴ Mafaʼne anagaʼnimogi lama gemo alagepa huʼa akame nehae, huʼa apava gemo huʼa naha paiʼnageʼna afiteʼnaeʼmo namogaga neʼauva kavaʼnimoʼmo alu yafeʼmo namogaga neʼauva kavaʼmo alagi aeno agaseʼniye.

Gaiyasiʼa alagepa aliʼyaʼmo aliʼniya kavafeʼmo huʼniya gemae

⁵ Nahauʼniya vekaʼnimogae, huʼna, kagaemo konagatimogimo alagepa huka hapa maege nata vayaʼmo alagepa huka hapa maege nehana kavaʼmo alagepa aliʼyaʼmo neʼaline.

⁶ Ani nata vayaʼmogi siosi vayaʼaitegamo nehana kavafeʼmo huʼapaeʼmo, alagepa kavaʼmo nehiye, huʼa huʼnae. Kagaemo Gotiʼa ala agiʼamo alisiyafeʼmo kateʼmo uʼeʼa hisaya vayaʼmo hapa maesanana kanale kavaʼmo hugane.

⁷ Apakaemo Goti agiʼalefeʼmo uʼnae. Malaga vayaʼmogi apayapatiʼmo mago yaʼmo oʼaliʼnae.

⁸ Lagaemo ani agufa vayaʼmo hapa maesunageno lama geʼamo afole aisiyafeʼmo apakaeʼeʼmo magokepi lokaeta aliʼyaʼmo aligetao.

Naiyotelefisiʼa hosu kavaʼmo huʼniya gemae

⁹ Nagaemo siosilefeʼmo mani gemo avoʼmo kaeʼnovana Naiyotelefisiʼa hogote vekamo maisiyafeʼmo hauʼniyana geʼnimo noʼafiye.

¹⁰ Ani kava nehiyaʼmofeʼmo siosileʼmo visuva afinaʼmo huʼniya kavafeʼmo huʼnaeʼmo, afa geletiʼmo alino hosu huno lateʼniye, huʼna aeʼna hakalo huguve. Ani kavaʼmo hutenoʼaeʼmo magoʼe kavaʼmo hunoʼaeʼmo konaga vayatimo alino falu fala kavaʼmo huno oʼapateno aliʼa falu fala huʼa apatesaya vayaʼmo apatafauno apateteno siosi vayapatiʼmo alino hapafaino neʼapatale.

¹¹ Nahauʼniya vekaʼnimogae, huʼna, hosu kavaʼmo akame osuka alagepa kavakeʼmo akame huvo. Alagepa kavaʼmo nehaya vayaʼmo Goti vayaʼamo maiʼnageʼa hosu kavaʼmo nehaya vayaʼmogimo Gotiʼa oʼageʼnae.

¹² Muki vayaʼmogimo Nemitiliyasi agiʼaleʼmo aliʼa asaga huʼa neʼatae. Goti lama geʼaeʼmo ani kavaʼmo huno agiʼaleʼmo alino asaga huno neʼate. Lagaeʼeʼmo ageteta ha maeta faigoko gemo nehune. Kagaemo faigoko getieʼmo lama gemo nehae, huka afiʼnane.

Ge atupa gemo huʼniya gemae

¹³ Asole gemo kaha paisuvafeʼmo nehuvana avoʼmo kaesuvafeʼmo oʼnahaiye.

¹⁴ Nagaemo aise afinaʼmo kagaetegamo uʼna laʼaugosamo alitaʼa magoke hisuʼafeʼmo neʼnahaiye.

¹⁵ Kaipamoʼmo falu hino. Lao vayatimogimo ge kamamaeʼnae. Muki lao vayaʼaifeʼmo ge apamamao. He, lama ge.