2 Yoni 1 - The Keyagana NT and 25 OT books

¹ Nagaemo Goti vayaʼaleʼmo yagaiʼna neʼapatova vayatama vekamoʼnamo Gotiʼa lekana paino kateʼniya a kanoʼe mafaʼne anagakamogiʼefeʼmo mani gemo avoʼmo nekaove. Nagaemo lapakaefeʼmo lama geʼalefeʼmo nahau nayamopafiʼmo nahauʼniye. Nagaeʼe muki vayaʼmogimo lama gemo afiʼnaya vayaʼmogiʼeʼmo lapakaefeʼmo lahau layamopafiʼmo lahauʼniye.

² Lama gemo laipafiʼmo haneʼniyanageno alagi hanege hanege huno hanegaiyaʼmofeʼmae.

³ Gotiʼa Afotimoʼe Mafaʼneʼamo Ala kava netimo Yesu Kalaisiʼeʼmo fikumo lapa maeʼana lapamiteʼana hanau huʼana lapatesaʼageno lapaipamoʼmo falu hino.

⁴ Mago mafaʼne anagakamogimo muki yaʼmo Afoʼamoʼa akame hiyo, huno laha paiʼniya keʼaepa geʼamo lama geʼamo akame nehageʼna apaketeʼnaeʼmo lusi kava huʼna namogaga aiʼnove.

⁵ Ane, huʼna, kagaefeʼmo kahaoke heʼnaeʼmo, konagatimogifeʼmo lahaino. Mani gemo saufa keʼaepa gemo ohaneʼnifa hogoteno aepa faino laha paiʼniya afinatetiʼmo afiʼnona gemo haneʼniye.

⁶ Gotifeʼmo lahau layamopafiʼmo nelahaiya kavaʼmo Goti keʼaepa geʼamo akame nehuna kavaʼmo haneʼniye. Ani gemo hogoteno aepa faino laha paiʼniya afinatetiʼmo afiʼnaya gemo haneʼniyanagi akame hiyo.

Kalaisi geʼaleʼmo atafauta alagi hiyo, huno huʼniya gemae

⁷ Asole vayaʼmogimo vayaʼaifeʼmo humi neʼapataya vayaʼmo ma mopafiʼmo umenitata nehae. Apakaemo huʼapaeʼmo, Yesu Kalaisiʼa ma mopafi vayaʼmogi agufamo aliteno vayaʼmo hamaleʼniye, huʼa aeʼa hakalo nosae. Ani gemo nosaya vayaʼmo Kalaisi kame vayaʼamo maiʼnae.

⁸ Alagepa miyatimo alisunafeʼmo aliʼyaʼmo aliʼnone. Fiku yanageta oʼaligunanagi alagepa hutapa yagaitapa maiyo alopa miyatimo aligune.

⁹ Muki vayaʼamogi Kalaisiʼa alino apaya maleʼniya geleʼmo atafauʼa alagi huʼa oʼmaiʼnisayana Gotiʼa avaleʼa apaipafiʼmo oʼateʼnae. Muki vayaʼamogi Kalaisiʼa alino apaya maleʼniya geleʼmo atafauʼa alagi huʼa maiʼnisayana Gotiʼa avaleʼa apaipafiʼmo ateʼnageno maiʼnigeno Mafaʼneʼaʼeʼmo apaipafiʼmo maiʼniye.

¹⁰ Mago vekamoʼmo lapakaetegamo enoʼaeʼmo mani agufa gemo alinino oʼmesiyana alita falu fala hutapa oʼatetapa notapifiʼmo avalelitapa oʼviyo.

¹¹ Hosu kavaʼamoʼmo aliʼa falu fala huʼa atesaya vayaʼai apakufaleʼmo aino kamaegaiye.

Ge atupa gemo huʼniya gemae

¹² Nagaemo asole gemo avoʼmo kaeʼna lapa paisuvafeʼmo nehuvaʼmonanafa avoʼmo kaesuvafeʼmo oʼnahaiye. Nagaemo lapakaetegamo visugeta laugosamo magokepi alita anupa hutetaeʼmo lusi kava huta lamogaga aisunafeʼmo nahauʼniye.

¹³ Gotiʼa lekana paino ateʼniya kaganakamo mafaʼne anagaʼamogimo ge lapamamaeʼnae. He, lama ge.