2 Kini 1 - The Keyagana NT and 25 OT books

Ilaiyaʼmo kini vekamo Ahayaiyafeʼmo faligane, huno huʼniya gemae

¹ Ehapiʼmo falitegeʼapaeʼmo Movapu vayaʼmogimo Isaleli vayaʼai apaiyafiʼmo magoʼe huʼa oʼmaisayafeʼmo kamemo huʼa aeʼa apaka seʼnae.

² Inagi mago afinaʼmo Isaleli vayaʼmogi kini vekamo Ahayaiyaʼmo noʼafiʼmo mago anagamo aeno hanagi maleʼniya yapiʼmo maiʼnigenoʼaeʼmo ani anaga agotofulega yosamo aino lo aeʼnigeno mopafiʼmo asagauno aino haeno alino hosu huno ateʼniye. Haeno alino hosu huno ateʼniyaʼmofeʼmo mago vayaʼaifeʼmo hapa painoʼaeʼmo, Utapa Ekaloni vayaʼmogi gotiʼapimoʼmo Meyayimafeʼmo, Nagaemo nahagesifi naha okesifigi ge hutapa afi geyo, huno huteno alino apateʼnigeʼa uʼnae.

³ Uʼnayaʼmonanafa Ala kava neʼmo enisole vekamoʼmo Tisame taonifi vekamo Ilaiyafeʼmo ha painoʼaeʼmo, Sameliya kini vekamoʼmo mago vayaʼmo alino apateʼnigeʼa neʼayanagi he tika uka fotu hiyo. Hapa paikaeʼmo, Na kava higetapaeʼmo Ekaloni vayaʼmogi gotiʼapimoʼmo Meyayimafeʼmo ge hutapa afi gesayafeʼmo neʼae. Isaleli kotegamo mago Gotiʼmo oʼmaiʼniyaʼmofeʼmo lapakaemo ugefeʼmo nehafiye.

⁴ Hemenimo Ala kava neʼmoʼa kini vekaeʼmo ha painoʼaeʼmo, Kagaemo kaha okegaiye. Haʼao, kagaemo hipakaletiʼmo he otiganaʼmonanafa havaeka maiʼneka faligane, huno kaha paiʼniye, huka hapa paiyo, huno ha paiʼnigeno Ilaiyaʼmo Ala kava neʼmo geʼamo akame huno ani gemo alagi hapa paiteno apataleno uʼniye.

⁵ Alino apateʼniya vayaʼmogi Ilaiyaʼmo huʼniya gemo afiteʼapaeʼmo halate atagineʼa kini vekalegamo uʼnagenoʼaeʼmo kini vekamoʼmo hunʼaeʼmo, Na agufa kavaʼmo higetapaeʼmo ataginetapa eʼnae, huno ge huno apafi geʼnigeʼapaeʼmo,

⁶ Lagaemo mago vekaʼeʼmo kategamo fotu huʼnone. Agaemo laha painoʼaeʼmo, Alino lapateʼniya kini vekalegamo halate ataginetapa uta ina ge huta ha paiyo. Ala kava neʼmoʼa kaha painoʼaeʼmo, Na agufa kava higekaeʼmo Ekaloni vayaʼmogi gotiʼapimoʼmo Meyayimafeʼmo ge huka afi gesanafeʼmo vayaʼmo alika apateʼnanageʼa uʼnae. Isaleli kotegamo mago Gotiʼmo oʼmaiʼniyaʼmofeʼmo vayaʼmo alika apateʼnanageʼa uʼnafiye. Ani kavaʼmo huʼnanaʼmofeʼmo kagaemo hipakaletiʼmo he otiganaʼmonanafa havaeka maiʼneka alagi faligane, huno huʼniye, huʼa ha paiʼnae.

⁷ Kini vekamoʼmo ani gemo afitenoʼaeʼmo ina ge huno ge huno apafi geʼniye. Haiya agufa vekamoʼmo eno lapa paiʼniye, huno ge huno apafi geʼnigeʼapaeʼmo

⁸ apakaemo geʼaleʼmo aeʼa atagaina huʼapaeʼmo, Agaemo afumogi apayokatetiʼmo alo huʼnaya kukenamo vaino aliteno mapaluʼamo pulumaka agufaletiʼmo alo huʼnaya mapaluʼmo aeno aliʼniya vekamoʼae, huʼa ha paiʼnae. Kini vekamoʼmo afitenoʼaeʼmo, Agaemo Tisame taonifi vekamo Ilaiyageʼmae, huno huʼniye.

⁹ Inagi kini vekamoʼmo ati vayaʼaiteʼmo yagaino apateʼniya vekaʼe fifitiʼa ati vayaʼeʼmo alino apateʼnigeʼa uʼa Ilaiyaʼmo avaleliʼa esayafeʼmo neʼuʼapaeʼmo agayana Ilaiyaʼmo mago aise avefiʼmo fai maiʼnigeʼa ageʼnae. Inagi ati vayaʼaiteʼmo yagaino neʼapateya vekamoʼmo Ilaiyafeʼmo ha painoʼaeʼmo, Goti vekaʼamogae, huno, Kini vekamoʼmo hunoʼaeʼmo, Kagaemo eka emikeno, huno huʼniye.

¹⁰ Inagi Ilaiyaʼmo geʼaleʼmo aeno atagaina hunoʼaeʼmo, Goti vekaʼamo maiʼnisuvaʼmoʼmo kokuʼnapatiʼmo atamo emineno kagaeʼe fifitiʼa ati vayakaʼeʼmo lapaleno, huno huʼnigenoʼaeʼmo kokuʼnapatiʼmo atamo emineno ati vayaʼaiteʼmo yagaino neʼapateya vekaʼe fifitiʼa ati vayaʼaʼeʼmo apaleʼnigeʼa faliʼnae.

¹¹ Inagi kini vekamoʼmo alu vekamo ati vayaʼaiteʼmo yagaino neʼapateya vekaʼe fifitiʼa ati vayaʼaʼeʼmo alino apateʼnigeʼa Ilaiyategamo uʼnae. Apakaemo uʼa avaʼyi huteʼapaeʼmo yagaino neʼapateya vekamoʼmo Ilaiyafeʼmo ha painoʼaeʼmo, Goti vekaʼamogae, huno, Kini vekamoʼmo hunoʼaeʼmo, Kagaemo malage huka emikeno, huno huʼniye.

¹² Inagi Ilaiyaʼmo geʼaleʼmo aeno atagaina hunoʼaeʼmo, Goti vekaʼamo maiʼnisuvaʼmoʼmo kokuʼnapatiʼmo atamo emineno kagaeʼe fifitiʼa ati vayakaʼeʼmo lapaleno, huno huʼnigenoʼaeʼmo atamo emineno ati vayaʼaiteʼmo yagaino neʼapateya vekaʼe fifitiʼa ati vayaʼaʼeʼmo apaleʼnigeʼa faliʼnae.

¹³ Inagi kini vekamoʼmo halate alu ati vayaʼaiteʼmo yagaino neʼapateya vekaʼe fifitiʼa ati vayaʼaʼeʼmo alino apateʼnigeʼa Ilaiyategamo uʼnae. Ani napa tali vekamo ati vayaʼaiteʼmo yagaino neʼapateya vekamoʼmo avefiʼmo uno haino Ilaiya haopaleʼmo aleʼyamo faiʼnenoʼaeʼmo ina ge huno ha paiʼniye. Goti vekaʼamogae, huno, kahau huka lato. Kahao ke hovanagi kaulagaleʼmo afaʼa neʼmauna yatiʼmo alopa yaʼmo haneʼniye, huka kagesamo afigane.

¹⁴ Afiyo, huno, Kokuʼnapatiʼmo atamo emineno ati vayaʼaiteʼmo yagaiʼana apateʼnaʼa vekalaʼe ati vayaʼaniʼeʼmo apaleʼniye. Apaleʼniyaʼmonanafa nagaemo kahaoke hovanagi kaulagaleʼmo afaʼa neʼmauva yaʼnimo alopa yaʼmo haneʼniye, huka kagesamo afigane, huno ha paiʼniye.

¹⁵ Inagi Ala kava neʼmo enisole vekamoʼmo Ilaiyafeʼmo ha painoʼaeʼmo, Kagaemo ani vekaeʼmo koli osuka magokepiʼmo utana lamiteka agaefeʼmo koli osuvo, huno ha paiʼniye. Inagi Ilaiyaʼmo he tino agaeʼeʼmo magokepiʼmo kini vekalegamo uʼnaʼae.

¹⁶ Ilaiyaʼmo uno avaʼyi hutenoʼaeʼmo kini vekaeʼmo ha painoʼaeʼmo, Ala kava neʼmoʼa kaha painoʼaeʼmo, Na agufa kavaʼmo higekaeʼmo Ekaloni vayaʼmogi gotiʼapimoʼmo Meyayimafeʼmo ge huka afi gesanafeʼmo vayaʼmo alika apateʼnanageʼa uʼnae. Isaleli kotegamo mago Gotiʼmo oʼmaiʼniyaʼmofeʼmo geʼamo afisanafeʼmo ge huka afi okeʼnapiye. Huʼnanaʼmofeʼmo kagaemo hipakaletiʼmo he otiganaʼmonanafa havaeka maiʼneka alagi faligane, huno huʼniye, huno ha paiʼniye.

¹⁷ Inagi kini vekamo Ahayaiyaʼmo faliʼnigenoʼaeʼmo ani gemo Ala kava neʼmoʼa Ilaiya avayafatiʼmo aeno hakalo huʼniya kavaʼmo alagi huʼniye. Ahayaiyaʼmo mafaʼneʼamo oʼmaiʼniyaʼmofeʼmo aganaʼamoʼmo Yiholamiʼmo agae aimuʼyaleʼmo Isaleli vayaʼmogi kini vekamo maiʼniye. Hamoʼamo Yiholamiʼmo Yihosafati mafaʼnemoʼmo Yuta vayaʼmogi kini vekamo lole kafugamo maiʼnigenoʼaeʼmo Yiholamiʼmo Isaleli vayaʼmogi kini vekamo maiʼniye.

¹⁸ Kini vekamo Ahayaiyaʼmo muki alu kavaʼamo huʼniya kavafeʼmo ava gemo mago mukumo Isaleli kini vayaʼmogi apava gemo haneʼniya mukufiʼmo haneʼniye.