1 Yoni 1 - The Keyagana NT and 25 OT books

Maige maige huta maisuna yaʼmo afoʼamofeʼmo huʼniya gemae

¹ Lagaemo mago vekamo agiʼamo Goti Geʼamo maige maige huʼa neʼmaiya yaʼmo afoʼamofeʼmo ava gemo huta mani gemo avoʼmo nekaone. Ani vekamo aliʼyaʼamo aepa faino aliʼniya afinatetiʼmo maime maime eʼnigetaeʼmo geʼamo afiteta laulagafatiʼmo ageʼnone. He, aulu haeta ageteta agufaleʼmo layatetiʼmo ame aliʼnone.

² Mani vekamo afaʼa neʼmaiya yaʼmo aepa vekamo afole aiʼnigeta agetetaeʼmo agaefeʼmo faigoko geʼamo aeta hakalo huta lapa nepaune. Agaemo maige maige huʼa neʼmaiya yaʼmo afoʼamoʼmo Goti muki yaʼmo Afoʼamoʼeʼmo magokepi lokaeno maiʼneno lagaetegamo afole aiʼniya vekaeʼmo ava gemo huta lapa nepaune.

³ Lagaemo afiteta ageʼnona kavafeʼmo ava gemo hutaeʼmo lapakaemo lagaeʼeʼmo afalu afalugana huta maisunafeʼmo aeta hakalo huta lapa nepaune. Lagaemo Afotimoʼe mafaʼneʼamo Yesu Kalaisiʼeʼmo afalu afalugana huta neʼmaune.

⁴ Lagaemo lapaipafiʼmo lapamogaga aisaya kavaʼmo havai tesiyafeʼmo mani gemo avoʼmo nekaone.

⁵ Goti Mafaʼneʼamoʼmo ani ge huno laha paiʼnigeta afitetaeʼmo aeta hakalo huta lapa nepaune. Lapa paitaeʼmo Gotiʼa ha le yaʼaʼe vekamo maiʼnigeno aipafiʼmo hani yaʼamo alagi ohaneʼniye, huta lapa nepaune.

⁶ Lagaemo hanipiʼmo umenitata nehutaeʼmo, Gotiʼeʼmo afalu afalugana huta lokaeta maiʼnone, huta nehisunana aigofe gemo huteta lama gemo alagi akame nosune.

⁷ Lagaemo hanipiʼmo umenitata osuta Gotiʼa aeno ha leʼniya yateʼmo neʼmaiya kava huta aeno ha leʼniya yateʼmo umenitata nehisunana agaeʼeʼmo afalu afalugana huta maiʼnonagenoʼaeʼmo agaemo lagaeʼeʼmo ani kava huno afalu afalugana huno neʼmaigeno Mafaʼneʼamo Yesu Kalaisi kolaʼamoʼmo muki hosu kavatimo aeno kalo paeno neʼatale.

⁸ Lagaemo, hosu kavatimo ohaneʼniye, huta nehisunana lagaitieʼmo humi nelatonagenoʼaeʼmo lama geʼamo laipafiʼmo alagi nohane.

⁹ Lagaemo Gotifeʼmo, ani hosuʼmo kava huʼnove, ina hosu kavaʼmo huʼnove, huta aeta hakalo huta ha paisunagenoʼaeʼmo alagi alino ataleteno, afaʼa ateyo, huno huteno, muki hosu kavatimo aeno kalo paeno atalesiyafeʼmo agaemo huguve, huno hu maleʼniya geʼamo alagi akame huno fatago kavaʼamo hugiye.

¹⁰ Lagaemo, hosu kavaʼmo osuʼnone, huta nehisunana ani ge huta Gotifeʼmo hutaeʼmo, aigofe gemo nehiya vekae, huta nehunagenoʼaeʼmo lama geʼamo laipafiʼmo alagi nohane.