Yuuda 1 - Iimuuma Iinyaaya

Obhukeesha

¹ Anye Yuuda, omujuuma wa Yeesu Kiriisitu, niri waamuwaabho Yakobho. Enibhakaamira emwe bhanu ꞉mweenderwe, mubhirikirwa na Raata Nyamuwanga, mwangarirwa kujomu ku-nsonga ya Yeesu Kiriisitu.

² Ekigongo, omurembe, na obhwendani bhibhe bhyafu kw-imwe.

Indamuro ku-bheeyigisha bha orubheeyi

³ Abheendwa bhaani, naaneendere muno ati nibhakaamire iiguru ya obhwerusha bhunu obhukigwatanya kyone kutyo amwi. Nawe woori enirora ati yeenderwe nibhakaamire iinyarubha inu nimbesaasaama era ati, murwanirire obhwikirisha bhunu Nyamuwanga ꞉aayaaye abhataakatiifu, rumwi era.

⁴ Enibhakaamira iinyarubha inu kwa okubha bhariwo abhaanu bhanu bhatakuungwa Nyamuwanga, bheeyingisiishe bhwiyibhise mbeesaasha na emwe. Abhaanu bhayo abhayindura ameeyigisho iiguru ya iinema ya Nyamuwanga weeswe insonga na abhaanu abhandi bhakore ganu gateesire, na abheegaana Yeesu Kiriisitu Omutangasha Omukuru, Raatabhugenyi weeswe. Nawe okwambira kara ikaamirwega ati, abhaanu bhayo bhariramurirwa rwa kutyo abhandi bhanu bhoone bhararamuriiywe.

⁵ Emwe mumenyere kujomu amangʼana ganu, nawe eneenda nibhayiitye era, kutyo Raatabhugenyi erusiishe Abhaijirayeeri okusooka mu-kyaro kya Miisiri enu ꞉bhaariga mbanyanka. ꞉Eejire aamara okubheerusha, kweki ˆnaasikya bhanu ꞉bhaatamire okumwikirisha.

⁶ Muyiite, bhaamaraayika bhanu ꞉bhaaremere okwangarira ekibharo kyebhwe, mbasiga obhwikasi bhunu ꞉bhwariga bhubheemiiye, Nyamuwanga abhabhoyere na eminyororo kajaanende, mu-kisuute ekinene. Eyo abharindirira orusuku orukuru orwa okuramurirwa.

⁷ Kweki muyiite abhaanu bha mu-misi gya Sodoma na Gomora, na abha mu-misi ginu ꞉gyariga gibheeyindire ꞉bhaasusanaga nabho. Abheene bhoone, ꞉bhaakoraga amajomerwa na okutaara ameega, ganu gatakuriingʼaana na kutyo ꞉bhaabhumbirwe bhakorega. Nyamuwanga ˆnaabhayaana ebhirusho, mbookiibhwa mu-muriro gunu gutakusimá, insonga kibhe kirengekanyo kya omuriro gunu gutakusimá ku-bhaanu bhoone kutyo.

⁸ Nikwo kutyo na abhaanu bhanu naaika ati bhatakuungwa Nyamuwanga bhari. Abhaaika ati Nyamuwanga kaabhayaana ebhirooto, ˆnaabhayaana obhuturo bhwa okutaara ameega mbakootya emibhiri gyebhwe, abharema obhutungi bhwa Nyamuwanga, mbajabhura na ebhibhumbwa bhya obhugungyo bhwaye bhinu bhiri mu-rwire.

⁹ Nawe Mikayiri maraayika omukuru woone, bhunu abhuushaanyaga na okubhambashaanya na Sitaani ku-nsonga ya omubhiri gwa Musa, ꞉ataasakire okumuramurira, na kumubhwira mangʼana ga injabhuro. Nawe ꞉aamubhwiriiye era ati, “Raatabhugenyi Nyamuwanga omwene akugonye!”

¹⁰ Nawe abhaanu bhanu abhajabhura amangʼana ganu bhatakumenya. Na amangʼana ganu bhasimukire bhagamenyere nigo agabhanyamura, bhari rwa gintyanyi ginu gitari na bhwenge.

¹¹ Garibhanyoora, kwa okubha bhasorere gintungwa gya Kaayini egya okukora ebhikayo. Abheeyaana abheene obhuniibhi, bhatakusiga okukora ebhikayo rwa bhinu Bhaaramu ꞉aakorere. Nikwo kutyo bhoone bhariramurirwa rwa Koora kwa okubha abheene bhoone ni bhajeemi rwa Koora.

¹² Mu-kuriira amwi kwemwe nabho obhugenyi mwendeene, bheeyangariiye abheene era, abharya bhatari na mbabhasi, abhaanu bhayo bhari rwa ebhijungu ku-bhwato. Bhari rwa ameere ganu gatari na ngubha, agayembwa ngasirwa enu na enu. Abhasusa rwa mati ganu gatari na matwasho mu-kabhaga ka okunogora-ko, goomire ni ga kwiywa na kweswa kimwi.

¹³ Abhaanu bhayo bhatakutura kwigaanya abheene, rwa amabhooka amanene mu-nyanja, ganu agasoosha riifiro rya ginswaro gyebhwe abheene. Bhari rwa ginjota ginu egiyegayega ginu gitakutura kutangasha. Bhatuuriiywe-wo ekisuute ekinene bheekare-mo kajaanende.

¹⁴ Enooki, jaaji wa mungati okusooka ku-Adaamu, ꞉aasoosiishe obhuragi kara iiguru ya abhaanu bhayo ˆnaaikaga ati, “Ringira, Raatabhugenyi kaaja na bhaamaraayika bhaaye abhataakatiifu bhaafu muno,

¹⁵ insonga aramurire abhaanu bhoone kutyo, na ayaane ebhirusho bhanu bhatakukora ganu Nyamuwanga keenda, ku-nsonga ya ganu ꞉bhaakoraga, na ku-mangʼana amabhiibhi ganu abhakayi ꞉bhaaikaga iiguru wa Nyamuwanga.”

¹⁶ Abhaanu bhayo bhari na amasoro, ukasiga amasoro ni bheririiji, nibho abhakora amabhiibhi ganu abharanga mu-mitima gyebhwe. Abheekumangya muno ati, nibho abhatura okukora amangʼana goone kutyo, na okukumangya abhaanu insonga bhanyoore kinu abhabheenda-ko.

Obhutongesi

¹⁷ Nawe emwe abheendwa bhaani, muyiitega amangʼana ganu ꞉gaaikirwe na abhatumwa bha Raatabhugenyi weeswe Yeesu Kiriisitu.

¹⁸ ꞉Bhaabhabhwiraga ati, “Mu-kabhaga aka obhuteero bharibha-wo abhaanu abhasangʼayi, bheendi bha okukora amabhiibhi ganu abharanga mu-mitima gyebhwe.”

¹⁹ Abhaanu bhayo nibho abhakora murema okuungwana, abheeganiirisha amangʼana ga ku-kyaro kunu era, bhatari na Mwoyo Omutaakatiifu wa Nyamuwanga.

²⁰ Nawe emwe, abheendwa bhaani, mwigumiirishe ku-bhwikirisha bhwemwe. Obhwikirisha bhuyo, obhusooka ku-Nyamuwanga, na kutyo Mwoyo Omutaakatiifu kaabhatangasha okusaasaama nikwo kutyo musaasaamega.

²¹ Nyamuwanga abheendere, ku-nsonga iyo, mwiyangarire mu-kabhaga koone kanu mukyarindirira Raatabhugenyi weeswe Yeesu Kiriisitu abhafwire ekigongo, abheengishe mu-bhurame bhunu bhutakuweera.

²² Mufwire ekigongo abhaanu bhanu abheetimaata.

²³ Abhandi eyeendwa mubheerushe mubhasakuraga okusooka mu-muriro, abhandi mubhafwire ekigongo nawe mwikengere, insonga mwasiga okwingira mu-bhikorwa bhyebhwe ebhibhiibhi.

Obhusaasaami bhwa ginkuma

²⁴ Nyamuwanga niwe ari na obhuturo bhwa okubhaangarira mwasiga okugwa, kweki niwe kaatura okubhatuura emwe ku-bhugungyo bhwaye obhukuru, mujomeeywe muno, mutari na katogosi.

²⁵ Omwene niwe Nyamuwanga era, Omwerusi weeswe okuturira ku-Raatabhugenyi weeswe Yeesu Kiriisitu. Woori akumangibhwe muno, kwa okubha niwe ari na obhugungyo, obhukuru, na obhuturo bhwone, bhusimukwa, woori, na kajaanende. Amina.