Yowana 8 - Iimuuma Iinyaaya

¹ Niwe abhaanu bhayo mbeemuka, bhoone kutyo mbasubha eweebhwe. Yeesu woone ˆneemuka ayo, ˆnaagenda mu-kiima kya Emijeyituuni.

Omugasi unu ꞉aagwatirwe ekiroogi

² Bhunu ꞉bhwakyeye, Yeesu ˆnaagenda kweki ˆneengira mw-ibhanja rya riiyekaru. Abhaanu bhoone kutyo mbamuuja-ko, ˆneekara, ˆnaamba okubheeyigisha.

³ Kimwi abheeyigisha bha ebhiraagiro bhya Musa na Abhafarisaayo, mbamureetera omugasi wumwi unu ꞉aariga agwatirwe ekiroogi, mbamutuura agati wa riisangi rya abhaanu.

⁴ Mbabhwira Yeesu ati, “Mwiyigisha, omugasi unu, aagwatwa ekiroogi.

⁵ Woori, mu-bhiraagiro bhyeswe, Musa ꞉aakiragiriiye okukomera abhagasi rwa bhanu na amagina. Mmbe woori awe owaaika kutiki?”

⁶ Okumubhuusha riingʼana riyo ꞉bhaariga mbamusakya, insonga bhanyoore erya okumusitaakisha-ko. Nawe Yeesu ˆneenama, ˆnaamba okukaama na ekyara kyaye ansi.

⁷ Bhunu ꞉bhaagendereeye okumubhuusha, Yeesu ˆneenamuka, ˆnaabhasubhya ati, “Agati weemwe unu akyariga okukora ekikayo, abhe owa okwamba okubhuma omugasi unu na riigina.”

⁸ Mmbe, Yeesu ˆneenama kweki ˆnaagenderera okukaama na ekyara kyaye ansi.

⁹ Bhunu ꞉bhoonguuywe amangʼana gayo, mbarumwa muno mu-mitima gyebhwe, mbaamba okusooka-wo wumwiwumwi, okwambira ku-bhakaruka okuyikira ku-bhamura. Yeesu ˆnaasigara omwene era na omugasi uyo, ayambaayega.

¹⁰ Niwe Yeesu ˆnaayambaara, ˆnaabhuusha omugasi uyo ati, “Maayi, bhanu abhakusitaakya bhari aaki? Angu, atariwo muunu woonewoone unu aasigara-wo insonga akuramurire ati uri mukayi?”

¹¹ Omugasi uyo ˆnaamusubhya ati, “Raatabhugenyi, atariwo na wumwi.” Niwe Yeesu ˆnaamubhwira ati, “Anye noone nitakukuramurira. Genda, nawe okwambira reero, usige okukora ebhikayo kweki.”]

Yeesu niwe obhweru bhwa ekyaro

¹² Mmbe, Yeesu ˆnaagenderera okwaika kweki ati, “Ni anye obhweru bhwa ekyaro. Omuunu woonewoone unu kaanseeta, atariribhata mu-kisuute wuri, tari aribha na obhweru bhunu obhumutangasha mu-bhurame bhunu bhutakuweera.”

¹³ Abhafarisaayo mbabhwira Yeesu ati, “Gayo ni mangʼana gaawo omwene era. Amangʼana gaawo gatari ga kimari!”

¹⁴ Yeesu ˆnaabhasubhya ati, “Raabhé ikabha ati enaaika amangʼana gaani omwene, amangʼana gaani nigo ekimari. Anye nimenyere enu nisookere, na nimenyere enu enigenda. Nawe emwe mutakumenya enu nisookere na mutakumenya enu enigenda.

¹⁵ Emwe omundamurira okuriingʼaana na obhwiganiirisha bhwa abhaanu, nawe anye nitakuramurira omuunu woonewoone.

¹⁶ Nawe anye raabhé nikaramurira omuunu, indamuro yaani ni ya kimari, kwa okubha anye nitari anye omwene, tari niri amwi na Raata unu ꞉aantumire.

¹⁷ Na mu-bhiraagiro bhyemwe ikaamirwe ati, abhaanu bhakaaika bhabhiri obhwaiki bhuyo obhubha bhwa kimari.

¹⁸ Mmbe, anye eniyaaikira omwene, na Raata unu ꞉aantumire woone kaanyaaikira.”

¹⁹ Niwe Abhafarisaayo mbabhuusha Yeesu ati, “Esomwana ari aaki?” Yeesu ˆnaabhasubhya ati, “Emwe mutakummenya, na Raata woone mutakumumenya. Raabhe mukammenyere anye, mukamenyere na Raata woone.”

²⁰ Yeesu ꞉aaikire amangʼana gayo goone kutyo, bhunu ꞉aariga ˆneeyigisha mw-ibhanja rya riiyekaru, mu-kyumba kinu ꞉bhaariga mbatuura-mo amasandiko ga giiyera. Nawe atariwo omuunu unu ꞉aamugwatire, kwa okubha akabhaga kaaye ꞉kaariga kakyari okuyika.

Yeesu kaaikira okufwa kwaye

²¹ Mmbe, Yeesu ˆnaabhabhwira Abhafarisaayo bhayo kweki ati, “Anye eniimuka, na omuuja okunyaagara. Nawe murifwira mu-bhikayo bhyemwe. Enu enigenda, emwe mutakutura kuuja-yo.”

²² Niwe abhatangasha bha Bhayawudi mbaamba okubhuushaanya ati, “Kubhaki kaaika ati, ‘Enu enigenda emwe mutakutura okuuja-yo?’ Kaaja okwiyita?”

²³ Yeesu ˆnaagenderera okubhabhwira ati, “Emwe muri bha ku-nsi kunu, nawe anye nisookere iiguru. Emwe muri bha ku-kyaro kunu, nawe anye nitari wa ku-kyaro kunu.

²⁴ Kyakora ꞉naabhabhwiriiye ati, murifwira mu-bhikayo bhyemwe, kwa okubha raabhe mutakwikirisha ati ‘Anye Niwe,’ mmbe, murifwira mu-bhikayo bhyemwe.”

²⁵ Bheeki mbamubhuusha ati, “Ni awe niga?” Yeesu ˆnaabhasubhya ati, “Naabhabhwira ati anye ni unu naabhabhwiriiye okusooka ku-bhwambiro!

²⁶ Niri na amangʼana maafu ganu nikaturire okwaika, na okubharamurira, nawe nitakukora kutyo. Nawe unu ꞉aantumire ni wa kimari, na anye enibhwira abhaanu bha ekyaro kinu amangʼana ganu nunguuywe okusooka ku-mwene.”

²⁷ Bhunu ꞉bhoonguuywe gayo, ꞉bhataasombookeeywe ati bhunu ꞉aariga ˆnaaika nabho, ꞉aaikiraga Esemwene wa mu-rwire.

²⁸ Mmbe, Yeesu ˆnaabhabhwira ati, “Bhunu murimara okwimusha Omwana wa Adaamu ku-musarabha, niwe murimenya ati Anye Niwe, na omuuja okumenya ati nitakwikorera engʼana anye omwene era, tari enaaika rwa kutyo Raata anyiiyigisiishe.

²⁹ Unu ꞉aantumire ari amwi na anye. Akyari okunsiga anye omwene, kwa okubha ku-nsiku enikora ganu agamujomisha.”

³⁰ Bhunu Yeesu ꞉aariga ˆnaaika amangʼana gayo, abhaanu bhaafu mbamwikirisha.

Nyamuwanga kaayaana abhaanu obhwiyagaaro

³¹ Mmbe, Yeesu ˆnaabhabhwira Abhayawudi bhanu ꞉bhaamwikirisiishe ati, “Raabhe mukagwatira riingʼana ryani, kimari omubha bheeyigira bhaani.

³² Na omuuja okumenya ekimari, na ekimari kiyo, ekiija okubhayaana obhwiyagaaro.”

³³ Abheene mbamubhuusha ati, “Eswe kiri bheebhurwa bha mu-ruganda rwa Bhurayimu, riibhaga kikyariga okubha bhagaya. Kubhaki awe owaaika ati eswe kiriyaanwa obhwiyagaaro?”

³⁴ Yeesu ˆnaabhasubhya ati, “Kimari enibhabhwira ati, muunu woonewoone unu kaagenderera okukora ebhikayo, uyo ni mugaya wa bhikayo.

³⁵ Omugaya atakwikara iika nsiku gyone kutyo, nawe omwana niwe keekara iika nsiku gyone kutyo.

³⁶ Mmbe, raabhe Omwana wa Nyamuwanga akabhayaana obhwiyagaaro, omwiyagaara kimwikimwi.

³⁷ Nimenyere ati, emwe muri orwibhuro rwa mu-ruganda rwa Bhurayimu. Nawe omwenda okunyita, kwa okubha riingʼana ryani ritari mw-imwe.

³⁸ Ganu ꞉naarorere ku-Raata nigo enaaika. Emwe mwone ganu ꞉mwoonguuywe kw-isomwana nigo omukora.”

³⁹ Abheene mbamusubhya ati, “Bhurayimu niwe raata!” Yeesu ˆnaabhabhwira ati, “Raabhe mukabheeye bheebhurwa bha mu-ruganda rwa Bhurayimu, mukakorere ganu Bhurayimu ꞉aariga ˆnaakora.

⁴⁰ Woori omwagara okunyita, anye unu naabhabhwira ekimari kinu ꞉noonguuywe ku-Nyamuwanga. Bhurayimu ꞉ataakorere kutyo.

⁴¹ Emwe omukora emirimu gya esomwana.” Niwe mbamusubhya ati, “Eswe kitari bhigwebhanja. Eswe kiri na Raata wumwi era, ni Nyamuwanga!”

⁴² Yeesu ˆnaabhasubhya ati, “Raabhe Nyamuwanga akabheeye Esomwana, mukaanyendere, kwa okubha nisookere ku-Nyamuwanga, nniija enu. ꞉Niteereetere anye omwene era, tari Nyamuwanga omwene niwe ꞉aantumire.

⁴³ Kubhaki mutakusombookerwa ganu enaaika? Ni kwa okubha omurema okwitegeeresha riingʼana ryani.

⁴⁴ Emwe ni bha Sitaani, uyo niwe esomwana! Na ganu esomwana kaaranga okukora nigo emwe mwone mwendere okukora. Omwene ꞉aariga ari mwiti okusooka ku-bhwambiro. Ni mubheeyi, atakwenda ekimari, kwa okubha atari na ekimari mu-mutima gwaye. Akabheeya kaabha ˆnaaika ganu gari mu-mutima gwaye omwene, kwa okubha omwene ni mubheeyi, na ku-mwene niwe obhubheeyi obhusooka.

⁴⁵ Nawe anye kwa okubha enibhabhwira ekimari, mutakunyiikirisha.

⁴⁶ Kw-imwe ni niga unu kaatura okweresha abhaanu ati niri na ebhikayo? Ndora nikaaika ekimari mutakunyiikirisha?

⁴⁷ Owa Nyamuwanga, koongwa amangʼana ga Nyamuwanga. Emwe mutakuungwa ganu Nyamuwanga kaaika, kwa okubha emwe mutari bhaaye.”

Yeesu ni omukuru kukira Bhurayimu

⁴⁸ Abhayawudi mbabhuusha Yeesu ati, “Angu, kitakwaika ekimari ati, awe uri Musamaariya, na uri na ekiwi?”

⁴⁹ Yeesu ˆnaabhasubhya ati, “Anye nitari na ekiwi. Anye eniyaana Raata ekibharo, nawe emwe omunjeera.

⁵⁰ Anye nitakwagara okugungibhwa, nawe ariwo unu kaagara okungungya, na niwe aribha omuramusi wa ekimari.

⁵¹ Enibhabhwira ekimari ati, muunu woonewoone unu kaagwatira riingʼana ryani, atarifwa kajaanende.”

⁵² Mmbe, Bhayawudi bhayo mbabhwira Yeesu ati, “Woori kimenyere ati, awe uri na ekiwi! Bhurayimu ꞉aafuuye, na abharagi bhoone ꞉bhaafuuye. Nawe awe owaaika ati, ‘Omuunu woonewoone unu kaagwatira riingʼana ryani, atarifwa kajaanende.’

⁵³ Woori owiikora okubha omukuru okukira jaaji Bhurayimu? Omwene ꞉aafuuye, na abharagi bhoone ꞉bhaafuuye. Woori awe owiikora ati ni awe niga?”

⁵⁴ Yeesu ˆnaabhasubhya ati, “Raabhe eniigungya omwene, okwigungya kwani kutakusakira kiinu. Nawe Raata, unu emwe omwaika ati ni Nyamuwanga weemwe, niwe kaangungya.

⁵⁵ Emwe mukyariga okumumenya, nawe anye nimumenyere. Raabhe nikaaika ati nitakumumenya, eniija okubha mubheeyi rwa emwe. Nawe anye nimumenyere na enigwatira riingʼana ryaye.

⁵⁶ Jaaji waanyu Bhurayimu, ꞉aabheeye na orugirigiri okumenya kutyo arirora orusuku rwa okuuja kwani. Woone ˆnaarurora, ˆnaajomerwa muno.”

⁵⁷ Mmbe, Abhayawudi mbabhwira Yeesu ati, “Awe ukyari kuyikya myaka makumi gataanu, ꞉waarorere kutiki Bhurayimu?”

⁵⁸ Yeesu ˆnaabhasubhya ati, “Enibhabhwira ekimari ati, bhunu Bhurayimu ꞉aariga akyari okubha-wo, Anye Niriwo.”

⁵⁹ Bhunu Abhayawudi ꞉bhoonguuywe amangʼana gayo, mbabhooja amagina insonga bhamubhume nago, bhamukomere. Nawe Yeesu ˆnaabheeyibhisa-ko, ˆnaasooka mw-ibhanja rya riiyekaru.