Yowana 7 - Iimuuma Iinyaaya

Yeesu kaagenda Yerusareemu mu-nsikukuru ya Ebhiwuuna

¹ Bhunu gayo ꞉gaawooye, Yeesu ˆnaamba okwiyindaga mbaara nyafu egya Gariraaya. ꞉Ateendere okwiyinda Ebhuyawudi, kwa okubha abhatangasha bha Abhayawudi ꞉bhaariga mbeenda okumwita.

² Kabhaga kayo, insikukuru ya Abhayawudi eya Ebhiwuuna ꞉yaariga irebhereeye okuyika.

³ Niwe bhaawaamuwaabho Yeesu abhatooto mbamubhwira ati, “Sooka anu, ugende Ebhuyawudi, insonga abheeyigira bhaawo bhoone bharore ebhiruguusho bhinu owukora.

⁴ Omuunu akeenda abhaanu bhamumenye, atakukora emirimu gyaye bhwiyibhise. Mmbe, raabhe awe owutura okukora amangʼana gayo, genda wiiyereshe ku-bhaanu bhoone kutyo, insonga bhakumenye.”

⁵ Bhaawaamuwaabho ꞉bhaaikaga kutyo, kwa okubha abheene bhoone ꞉bhaariga bhatakumwikirisha.

⁶ Niwe Yeesu ˆnaabhabhwira ati, “Akabhaga kaani aka okugenda eyo, kakyari kuyika, nawe emwe omutura okugenda kabhaga koonekoone.

⁷ Abhaanu bha ku-kyaro kinu, bhatakutura okubhabhiiyirirwa emwe. Tari abhambiiyirirwa anye, kwa okubha enibhabhwira ati, ebhikorwa bhyebhwe ni bhibhiibhi.

⁸ Ni emwe mugende Yerusareemu okurya insikukuru. Anye nitakugenda, kwa okubha akabhaga kaani kakyari kuyika.”

⁹ Bhunu Yeesu ꞉aamarire okubhabhwira amangʼana gayo, ˆnaasigara eekaaye Gariraaya ayo.

¹⁰ Nawe bhunu bhaawaamuwaabho ꞉bhaariga bhaamarire okugenda Yerusareemu okurya insikukuru iyo, Yeesu woone ˆnaagenda-yo. ꞉Ataagendere abhaanu mbamurora, tari ꞉aagendere muna bhwiyibhise.

¹¹ Mmbe, akabhaga ka insikukuru, abhatangasha bha Abhayawudi mbaagara Yeesu. Mbabhuusha abhaanu ati, “Omuunu wurya ari aaki?”

¹² Abhaanu bhaafu mbaamba okwisigiinyirira Yeesu. Abhandi mbaaika ati, “Yeesu ni muunu wa mutima mujomu,” nawe abhandi mbaaika ati, “Wuri, kaajimya abhaanu.”

¹³ Nawe atariwo omuunu unu ꞉aariga ˆnaamwaikira abhweru, kwa okubha ꞉bhaariga mboobhaya abhatangasha bha Abhayawudi.

Yeesu keeyigisha abhaanu mw-iyekaru

¹⁴ Bhunu ginsiku gya insikukuru ꞉gyariga gibhutukeene, Yeesu ˆnaagenda Yerusareemu, ˆneengira mw-ibhanja rya riiyekaru, ˆnaamba okwiyigisha abhaanu.

¹⁵ Niwe abhatangasha bha Bhayawudi mbaruguurira ameeyigisho gaaye, mbaaika ati, “Omuunu unu atasomere, kana amenyeeye aaki amangʼana ganu?”

¹⁶ Mmbe, Yeesu ˆnaabhabhwira ati, “Ameeyigisho ganu eniiyigisha, gatari gaani, tari agasooka ku-unu ꞉aantumire.

¹⁷ Omuunu woonewoone unu keenda okukora kutyo Nyamuwanga keenda, uyo niwe kaatura okusombookerwa ati, ameeyigisho gayo agasooka ku-Nyamuwanga, amwi ati ni anye era enigaaika.

¹⁸ Omuunu woonewoone unu kaaika amangʼana gaaye omwene era, owubha ˆnaagara okugungibhwa omwene, tari unu kaagara unu amutumire agungibhwe, uyo niwe owa ekimari na bhubhiibhi bhutamurimo.”

¹⁹ Yeesu ˆnaagenderera okwaika ati, “Angu Musa ꞉ataabhayaaye ebhiraagiro bhya Nyamuwanga? Nawe atariwo na wumwi agati weemwe unu kaagwatira ebhiraagiro bhiyo. Ndora omwagara okunyita?”

²⁰ Abhaanu bhayo mbamusubhya ati, “Awe! Uri na ekiwi awe! Ni niga unu kaagara okukwita?”

²¹ Yeesu ˆnaabhasubhya ati, “꞉Naakorere ekiruguusho kimwi era anu, emwe bhoone kutyo muruguura.

²² Mwitegeereshe, Musa ꞉aabharagiriiye okusaara abhaana bhwemwe abharume. Itari ati okusaara kuyo ꞉kwasookereeye ku-Musa omwene, tari ꞉kwasookereeye ku-bhaajaaji waanyu abha kara. Woori emwe omusaara abhaana bheemwe na ku-nsiku gya Insabhaato.

²³ Mukomeeye muno okugwatira ebhiraagiro bhya Musa ku-nsaaro gya abhaana bheemwe ku-rusuku rwa Insabhaato. Ndora woori omumbiiyirirwa kwa okubha ati ꞉naawosiishe omuunu ku-rusuku rwa Insabhaato?

²⁴ Mmbe, musige okuramurira omuunu okuriingʼaana na kutyo omurora na meeso era, tari muramurire omuunu murengeresiishe.”

Abhaanu abhabhuushaanya raabhe Yeesu niwe Kiriisitu

²⁵ Mmbe, abhaanu abhandi abha Yerusareemu ayo, mbaamba okubhuushaanya ati, “Angu, omuunu unu, atari unu abhaagara insonga bhamwite?

²⁶ Ndora kaaika ari abhweru, nawe abheene bhatakumubhwira engʼana ryoneryone! Eyitura okubha ati, abhatangasha bheeswe bhoone bhamenyere kimari ati, uyo niwe Kiriisitu?

²⁷ Omuunu unu kimenyere enu kaasookerera. Nawe bhunu Kiriisitu ariija, atariwo omuunu unu arimenya enu kaasookerera.”

²⁸ Bhunu Yeesu ꞉aariga ˆneeyigisha mw-ibhanja rya riiyekaru, ˆnaamura obhuraka ˆnaaika ati, “Kimari mummenyere, na mumenyere enu nisookereeye. Anye niteejire kwa kwenda kwani, tari unu ꞉aantumire ni wa ekimari. Na emwe mutakumumenya.

²⁹ Anye nimumenyere, kwa okubha niwe nisookere-ko. Na omwene niwe ꞉aantumire.”

³⁰ Niwe abhaanu mbeenda okumugwata, nawe ꞉ataabheeye-wo omuunu unu ꞉eemusiishe okubhoko kwaye okumugwata, kwa okubha akabhaga kaaye ꞉kaariga kakyari okuyika.

³¹ Nawe abhaanu bhaafu bhanu ꞉bhaariga bhasangire ayo, mbamwikirisha. Abhaanu bhayo mbaaika ati, “Angu bhunu Kiriisitu ariija, arikora ebhiruguusho bhyafu okukira bhinu omuunu unu aakorere?”

Abhasirikare abhatumwa okugwata Yeesu

³² Kimwi Abhafarisaayo mboongwa ganu riisangi rya abhaanu ꞉ryariga ndiisigiinyira Yeesu. Mmbe Abhafarisaayo bhayo, na abhashengesi abhakuru, mbatuma abhasirikare insonga bhagwate Yeesu.

³³ Niwe Yeesu ˆnaabhwira abhaanu bhayo ati, “Nikyari na kabhaga kafuyi era, niri amwi na emwe. Kakawa enisubha ku-unu ꞉aantumire.

³⁴ Murinyaagara, nawe mutarindora. Na anu niribhaga, emwe mutakutura kuuja-yo.”

³⁵ Niwe Abhayawudi mbaaikana abheene na abheene ati, “Angu, omuunu unu arigenda aaki enu eswe kitakutura okumurora? Angu, keenda okugenda ku-Bhayawudi bhanu bhanyaraganiiye mu-bhyaro ebhindi, na okwiyigisha bhanu bhatari Bhayawudi?

³⁶ Kaaika engʼanaki riyo ati, ‘Murinyaagara, nawe mutarindora. Na anu niribhaga, emwe mutakutura okuuja-yo’?”

Yeesu kaaikira okuuja kwa Mwoyo Omutaakatiifu

³⁷ Orusuku rwa okumariisha insikukuru ya Ebhiwuuna, ꞉yaariga iri nsikukuru nene. Mmbe, Yeesu ˆnaayambaara mw-ibhanja rya riiyekaru, ˆnaamura obhuraka ˆnaaika ati, “Omuunu akoongwa obhwiro, aaje ku-anye, anywe!

³⁸ Makaamo Amataakatiifu agaaika ati, muunu woonewoone unu kaanyiikirisha, ‘Giinyuji gya amanji ga obhurame giriwurura okusooka mu-mutima gwaye.’”

³⁹ Yeesu ꞉aariga ˆnaaikira Mwoyo Omutaakatiifu, unu abhaanu bhanu abhamwikirisha bhariyaanwa. Mu-kabhaga kayo, Nyamuwanga ꞉aariga akyari okutuma Mwoyo waaye okubhaaja-ko, kwa okubha Yeesu ꞉aariga akyari okugungibhwa.

Abhaanu abhaawukana ku-nsonga ya Yeesu

⁴⁰ Abhaanu abhandi mw-isangi riyo, bhunu ꞉bhoonguuywe amangʼana gayo, mbaaika ati, “Kimari, omuunu unu niwe omuragi unu ekirindirira okusooka ku-Nyamuwanga.”

⁴¹ Abhaanu abhandi mbaaika ati, “Omuunu unu niwe Kiriisitu.” Nawe abhandi mbaaika ati, “Wuri, Kiriisitu atakutura okusookerera Gariraaya.

⁴² Angu, Amakaamo Amataakatiifu gatakwaika ati, Kiriisitu arisooka mu-ruganda rwa omukama Dawudi? Na gatakwaika ati, ariibhurirwa Bhetereemu, mw-igunguri rinu Dawudi ꞉aariga eekaaye-mo?”

⁴³ Mmbe ku-nsonga ya amangʼana gayo, riisangi rya abhaanu ndyawukana.

⁴⁴ Abhandi mbeenda bhamugwate, nawe ꞉ataabheeye-wo omuunu unu ꞉eemusiishe okubhoko kwaye okumugwata.

Abhatangasha bha Abhayawudi bhatakwikirisha Yeesu

⁴⁵ Mmbe, abhasirikare bhanu ꞉bhaariga bhatumirwe okugwata Yeesu, mbasubha ku-bhakuru bha abhashengesi na Abhafarisaayo. Abhatangasha bhayo mbabhabhuusha ati, “Ndora mutaamureeta?”

⁴⁶ Abhasirikare bhayo mbabhasubhya ati, “Kikyariga okuungwa omuunu owundi unu kaatura okwaika rwa kutyo omwene kaaika.”

⁴⁷ Kimwi abhatangasha bhayo mbabhabhuusha ati, “Emwe mwone aabhajimiishe?

⁴⁸ Mwarorere niga mu-bhatangasha, amwi ati mu-Bhafarisaayo unu kaamwikirisha?

⁴⁹ Nawe abhaanu bhanu abhamwikirisha, ni bhaanu bhanu bhatakumenya ebhiraagiro bhya Musa. Bheeyiimirwe na Nyamuwanga!”

⁵⁰ Niwe Niikodeemu, owumwi wa abhatangasha bha Abhafarisaayo unu ꞉aagendere ku-Yeesu rusuku rumwi iri mu-ngeta, ˆnaabhuusha abheejaabho ati,

⁵¹ “Angu, ebhiraagiro bhyeswe ebhiikirisha okuramurira omuunu, akyari okwitegeeresibhwa okwamba, okumenya ganu kaakora?”

⁵² Abheene mbamusubhya ati, “Angu, awe woone usookere Gariraaya? Genda uringire kujomu Amakaamo Amataakatiifu, owuuja okusombookerwa ati, atariwo omuragi unu kaasookerera Gariraaya.”