Yowana 6 - Iimuuma Iinyaaya

Yeesu kaayaana abhaanu bhiwumbi bhitaanu ebhyokurya

¹ Bhunu gayo ꞉gaawooye, Yeesu ˆnaagenda ngʼambu ya omwaro gwa Gariraaya. Omwaro guyo nigwo riisiina erindi ogutogwa ati Tibheeriya.

² Esangi enene erya abhaanu ꞉bhaariga mbaseeta Yeesu, kwa okubha ꞉bhaariga bharorere ebhimenyegesho bhinu ꞉aariga akorere ku-bharwaye.

³ Niwe Yeesu ˆnaariinya ku-kiima ekirebhe ari amwi na abheeyigira bhaaye, mbeekara eyo.

⁴ Kabhaga kayo, insikukuru ya Abhayawudi eya Ipaasaka, ꞉yaariga irebhereeye okuyika.

⁵ Bhunu Yeesu ꞉eenamukire, ˆnaarora esangi enene erya abhaanu ndimuujaga-ko. Niwe ˆnaabhuusha Firipo ati, “Angu, ekitura okugura aaki emikaate egya okuriisha abhaanu bhanu?”

⁶ Yeesu okubhuusha Firipo kutyo, ꞉aariga ˆnaamusakya, kwa okubha ꞉aariga amenyere omwene, kinu kaaja okukora.

⁷ Firipo ˆnaamusubhya ati, “Mikaate gya dinaari magana gabhiri gitakutura okwisa abhaanu bhanu bhari anu, raabhé kiraabhagabhire katoototooto.”

⁸ Niwe omwiyigira owundi owa Yeesu, Ndereya, unu ꞉aariga ari mumura waabho Simooni Peetero, ˆnaabhwira Yeesu ati,

⁹ “Ariwo mumura wumwi anu ari na mikaate etaanu egya giishayiri na nswi ebhiri. Nawe ebhyokurya bhinu bhitakutura okwisa, abhaanu bhanu ni bhaafu!”

¹⁰ Mmbe, Yeesu ˆnaaragirira abheeyigira bhaaye ati, “Mubhabhwire bheekare.” Ansi ayo, ꞉gaariga gariwo manyansi maafu. Niwe abhaanu bhoone kutyo, mbeekara. Mu-bhaanu bhayo, ꞉bhaariga bharimo abharume bhiwumbi bhitaanu.

¹¹ Kimwi Yeesu ˆnaagega emikaate giyo, ˆnaakumya Nyamuwanga, ˆnaabhuturabhutura emikaate giyo, ˆnaagabhira abhaanu bhoone kutyo bhanu ꞉bhaariga bheekaaye ayo. ˆNaakora kutyokutyo na ginswi giibhiri gyone, ˆnaabhagabhira. Abhaanu bhoone kutyo mbarya kutyo ꞉bhaariga mbeenda.

¹² Bhunu ꞉bheegutire, Yeesu ˆnaabhwira abheeyigira bhaaye ati, “Mukumanye ebhisigara bhyone kutyo, kisige okubhura na kimwi.”

¹³ Mmbe, mbabhikumanya bhyone kutyo, mbeejusha bhikapo ekumi na bhibhiri ebhya emikaate gya giishayiri ginu ꞉gyasigaaye.

¹⁴ Mmbe bhunu abhaanu bhayo ꞉bhaarorere ekimenyegesho kinu Yeesu ꞉aakorere, mbaaika ati, “Kimari omuunu unu niwe omuragi wa Nyamuwanga unu ꞉kyeesigaga ati ariija mu-kyaro anu.”

¹⁵ Yeesu ˆnaamenya ati abhaanu bhayo ꞉bhaariga mbeenda bhamugwate managa, insonga bhamukore okubha omukama weebhwe. Nawe Yeesu ˆneemuka ayo, ˆnaagenda kweki mu-kiima ari omwene era.

Yeesu kaaribhata iiguru ku-nyanja

¹⁶ Keegoro, abheeyigira bha Yeesu mbatebhera okugenda ku-mwaro gwa Gariraaya.

¹⁷ Mbariinya mu-bhwato, mbaamba okwambuka okugenda mu-musi gwa Kaperinawumu. Na akabhaga kayo, ekisuute ꞉kyariga kyeengiiye, nawe Yeesu ꞉aariga akyari kuyika okuyimbana nabho.

¹⁸ Mmbe, omuyaga ngubhiiya, amabhooka ngamba okubha manene.

¹⁹ Bhunu abheeyigira bhayo ꞉bhaariga bhaafugire muna kiromiita etaanu kutya, mbarora Yeesu ˆnaaribhataga ku-nyanja aarebhereeye okuyika ku-bhwato bhwebhwe. Mboobhaya muno.

²⁰ Niwe, Yeesu ˆnaabhabhwira ati, “Musige okuubhaya! Ni anye!”

²¹ Mmbe, abheene mbeenda ati ariinye mu-bhwato. Ayoayo, obhwato mbugobha ku-kyaro enu ꞉bhaariga mbagenda.

Yeesu niwe ebhyokurya bhinu ebhiyaana abhaanu obhurame

²² Mwejo, riisangi rya abhaanu bhanu ꞉bhaariga bhasigaaye ngʼambu, mbarora bhwato bhumwi era ayo. ꞉Bhaariga bhamenyere ati Yeesu atagendere bhwato bhumwi na abheeyigira bhaaye, tari ꞉bhaariga bhamenyere ati abheeyigira bhaaye ꞉bhaagendere abheene era.

²³ Kimwi abhaanu abhandi mbaaja na amaato okusooka mu-musi gwa Tibheeriya, mbayika anu ꞉bhaariiye emikaate, bhunu Raatabhugenyi Yeesu ꞉aariga akumiishe Nyamuwanga.

²⁴ Bhunu abhaanu bhayo ꞉bhaarorere ati Yeesu atari ayo, na abheeyigira bhaaye bhoone bhatariwo, mbeengira mu-bhwato, mbagenda Kaperinawumu okwagara Yeesu eyo.

²⁵ Bhunu ꞉bhaayikire ngʼambu, mbamurora, mbamubhuusha ati, “Mwiyigisha, wiijireri enu?”

²⁶ Yeesu ˆnaabhasubhya ati, “Enibhabhwira ekimari ati, omunyaagara itari ati musombookeeywe ekimenyegesho kinu ꞉naakorere, tari ni kwa okubha ꞉mwariiye emikaate mwiguta.

²⁷ Musige okukorera emirimu ebhyokurya bhinu ebhimara mbinyamuka, tari mukorere emirimu ebhyokurya bhinu bhitakunyamuka, bhinu ebhiyaana abhaanu obhurame bhunu bhutakuweera. Omwana wa Adaamu kaaja okubhayaana ebhyokurya bhiyo, kwa okubha uyo niwe ayaaywe obhuturo bhwa okukora kutyo na Raata, Nyamuwanga.”

²⁸ Niwe abheene mbamubhuusha ati, “Angu, woori kikore kutiki insonga kiture okukora amangʼana ganu Nyamuwanga keenda?”

²⁹ Yeesu ˆnaabhasubhya ati, “Amangʼana ganu Nyamuwanga keenda mukore, ni kwikirisha unu ꞉aatumirwe nawe.”

³⁰ Mbamubhuusha kweki ati, “Woori owuuja okukora ebhimenyegeshoki, insonga kibhirore, kikwikirishe? Owuuja okukora engʼanaki?”

³¹ Bhaajaaji ꞉bhaariiye iimanu bhunu ꞉bhaariga bhari ku-nsi ya orukungu, rwa kutyo ꞉yaakaamirwe mu-Makaamo Amataakatiifu ati, “꞉Aabhayaaye ebhyokurya bhya mu-rwire bharye.”

³² Mmbe, Yeesu ˆnaabhabhwira ati, “Enibhabhwira ekimari ati, Musa ꞉ataabhayaaye ebhyokurya bhiyo, tari ni Raata Nyamuwanga unu woori kaabhayaana emwe ekyokurya ekyenekyene kinu ekisooka mu-rwire.

³³ Ekyokurya kya Nyamuwanga ni kinu ekiika okusooka mu-rwire nkiyaana abhaanu bhoone kutyo abha mu-kyaro kinu obhurame bhunu bhutakuweera.”

³⁴ Niwe abheene mbamubhwira ati, “Raatabhugenyi, nuukiyaane ekyokurya kiyo ku-nsiku.”

³⁵ Yeesu ˆnaabhasubhya ati, “Ni anye ekyokurya kinu ekiyaana abhaanu obhurame bhunu bhutakuweera. Omuunu woonewoone unu kaanyiija-ko okunyiikirisha, atarirumwa omweko kimwi, amwi ati okuungwa obhwiro kweki.

³⁶ “Nawe anye enibhabhwira ati, mwandora, nawe mutakunyiikirisha.

³⁷ Abhaanu bhoone kutyo bhanu Raata kaanaana, abhaaja okuuja ku-anye okunyiikirisha. Woonewoone unu kaanyiija-ko nitarimweseranya wuri.

³⁸ Anye niteejire okusooka mu-rwire insonga nikore ganu eneenda anye, tari niijire insonga nikore ganu unu antumire keenda.

³⁹ Unu antumire keenda ati, nisige okubhusha na wumwi ku-bhanu anaaye, tari nisuure bhoone kutyo ku-rusuku rwa obhuteero.

⁴⁰ Enaaika kutyo kwa okubha kinu Raata keenda ni ati, abhaanu bhoone kutyo bhanu bhamenyere Omwana waaye mbamwikirisha, bhabhe na obhurame bhunu bhutakuweera. Anye noone niribhasuura ku-rusuku rwa obhuteero.”

⁴¹ Mmbe, Abhayawudi bhanu ꞉bhaariga bhari ayo, mbaamba okwisigiinyira kwa okubha Yeesu ꞉aariga aaikire ati, “Ni anye ekyokurya kinu kiikire okusooka mu-rwire.”

⁴² Mbabhuushaanya ati, “Angu, unu atari Yeesu omwana wa Yuusufu, unu eswe kyone kimenyere abheebhusi bhaaye? Woori, kaatura kutiki okwaika ati eekire okusooka mu-rwire?”

⁴³ Yeesu ˆnaabhasubhya ati, “Musige okwisigiinyira emwe abheene na abheene.

⁴⁴ Atariwo omuunu unu kaatura okuunyiija-ko atafutirwe na Raata unu antumire. Anye noone nirimusuura ku-rusuku rwa obhuteero.

⁴⁵ Ikaamirwe na abharagi mu-Makaamo Amataakatiifu ati, ‘Abhaanu bhoone kutyo bharibhaga bheeyigisiibhwe na Nyamuwanga.’ Mmbe, omuunu woonewoone unu keetegeeresha na okwiyigira okusooka ku-Raata, uyo kaaja ku-anye.

⁴⁶ Nitakwaika ati ariwo omuunu unu ararorere Raata Nyamuwanga, tari ni unu ꞉aasookere ku-Nyamuwanga, uyo niwe aramurorere.

⁴⁷ “Enibhabhwira ekimari ati, omuunu woonewoone unu kaanyiikirisha, uyo ari na obhurame bhunu bhutakuweera.

⁴⁸ Ni anye ekyokurya kinu ekiyaana abhaanu obhurame bhuyo.

⁴⁹ Bhaajaaji waanyu ꞉bhaariiye iimanu bhari ku-nsi ya orukungu, mbafwa.

⁵⁰ Nawe anu kiriwo ekyokurya kinu kiikire okusooka mu-rwire, omuunu akakirya atakuuja okufwa.

⁵¹ Anye ni anye ekyokurya kinu kiikire okusooka mu-rwire, kinu ekiyaana abhaanu obhurame bhunu bhutakuweera. Omuunu woonewoone unu kaarya ekyokurya kiyo, kaabha na obhurame bhunu bhutakuweera. Ekyokurya kiyo ni mubhiri gwani, enigusoosha ku-nsonga ya abhaanu bhoone kutyo abha mu-kyaro kinu, bhabhe na obhurame bhunu bhutakuweera.”

⁵² Mmbe, Abhayawudi bhayo mbaamba okubhambashaanya abheene na abheene, mbaaikaga ati, “Omuunu unu, kaatura kutiki okukiyaana omubhiri gwaye kigurye?”

⁵³ Niwe Yeesu ˆnaabhabhwira ati, “Enibhabhwira ekimari ati, raabhe mutariiye omubhiri gwa Omwana wa Adaamu, na okunywa amaanyinga gaaye, obhurame bhunu bhutakuweera bhutakutura okubha mw-imwe.

⁵⁴ Omuunu woonewoone unu kaarya omubhiri gwani na okunywa amaanyinga gaani, uyo ari na obhurame bhunu bhutakuweera, anye noone nirimusuura ku-rusuku rwa obhuteero.

⁵⁵ Mumenye ati, omubhiri gwani nigwo ekyokurya ekyenekyene, na amaanyinga gaani nigo ekinywebhwa ekyenekyene.

⁵⁶ Omuunu woonewoone unu kaarya omubhiri gwani na okunywa amaanyinga gaani, uyo kaayimbana na anye, anye noone niiyimbana nawe.

⁵⁷ Rwa kutyo Raata unu kaarama kajaanende ꞉aantumire, na niwe kaakora anye noone niindama, okusooka ku-mwene, mmbe omuunu woonewoone unu kaandya, nirimukora woone arame.

⁵⁸ Mmbe, ni anye ekyokurya kinu kiikire okusooka mu-rwire. Kitakususana na ekyokurya kinu bhaajaaji waanyu ꞉bhaariiye, mbafwa. Tari omuunu woonewoone unu kaarya ekyokurya kinu, aribha na obhurame bhunu bhutakuweera.”

⁵⁹ Yeesu ꞉aaikire amangʼana gayo, akabhaga kanu ꞉aariga ˆneeyigishaga ari mw-isunagoogi, Kaperinawumu eyo.

Amangʼana ga obhurame bhunu bhutakuweera

⁶⁰ Mmbe, abhaanu abhaafu mu-bheeyigira bhaaye bhunu ꞉bhoonguuywe amangʼana gayo, mbaaika ati, “Amangʼana ganu ni makomeeye muno! Niga unu kaatura okugeekirisha?”

⁶¹ Yeesu ˆnaamenya mu-mutima gwaye ati, abheeyigira bhaaye abheesigiinyira ku-ganu ꞉aariga aaikire, ˆnaabhabhuusha ati, “Angu, amangʼana ganu gaabheeta emitima?

⁶² Woori, eyiija okubha kutiki mukarora Omwana wa Adaamu ˆnaariinya okugenda mu-rwire enu ꞉aariga ari ku-bhwambiro?

⁶³ Mwoyo wa Nyamuwanga niwe unu kaayaana abhaanu obhurame. Omuunu atakutura okukora kyonekyone kwa bhuturo bhwaye omwene era. Amangʼana gayo naabhabhwira ni ga Mwoyo wa Nyamuwanga, na nigo agareeta obhurame bhunu bhutakuweera.

⁶⁴ Nawe bhariwo abhandi mw-imwe bhanu bhatakwikirisha.” Yeesu ꞉aaikire kutyo, kwa okubha ꞉aariga amenyere bhanu bhatakwikirisha okusookerera ku-bhwambiro ati, ni bhaaya, na unu kaaja okumurya injeejemo.

⁶⁵ Mmbe, ˆnaagenderera okubhabhwira ati, “Kiyo nikyo kyakora naabhabhwira ati, atariwo omuunu unu kaatura okuunyiija-ko raabhe atatangasiibhwe na Raata.”

⁶⁶ Ku-nsonga ya amangʼana gayo, abhaafu mu-bheeyigira bhaaye mbamusiga, ꞉bhataagendereeye okubha amwi nawe kweki.

⁶⁷ Niwe Yeesu ˆnaabhuusha abheeyigira bhaaye ekumi na bhabhiri bharya ati, “Angu, emwe mwone omwenda okwimuka?”

⁶⁸ Simooni Peetero ˆnaamusubhya ati, “Raatabhugenyi, kigende kuuga? Awe uri na amangʼana ganu agakiyaana obhurame bhunu bhutakuweera.

⁶⁹ Eswe ekikwikirisha na kyamenyere ati, ni awe Omutaakatiifu unu usorerwe na Nyamuwanga.”

⁷⁰ Niwe Yeesu ˆnaabhabhwira ati, “Nibhasorere muri ekumi na bhabhiri okubha abheeyigira bhaani, nawe owumwi weemwe ni Sitaani.”

⁷¹ Ayo Yeesu ꞉aariga ˆnaaikira Yuuda, omwana wa Simooni Esikariyooti. Yuuda uyo niwe ꞉aariiye Yeesu injeejemo, raabhé kutyo ꞉aariga ari owumwi wa abheeyigira bhaaye ekumi na bhabhiri bharya.