Yowana 3 - Iimuuma Iinyaaya

Niikodeemu kaataarira Yeesu

¹ ꞉Aariga ariwo omutangasha wumwi mukuru wa Abhayawudi, ari Mufarisaayo, riisiina ryaye ˆnaatogwa Niikodeemu.

² Rusuku rumwi, ˆnaagenda ku-Yeesu iri ngeta, ˆnaamubhwira ati, “Mwiyigisha, kimenyere ati awe uri mwiyigisha unu usookere ku-Nyamuwanga, kwa okubha atariwo omuunu unu kaatura okukora ebhimenyegesho bhinu awe owukora, Nyamuwanga akabha atari amwi nawe.”

³ Yeesu ˆnaamusubhya ati, “Enikubhwira ekimari ati, omuunu ateebhuuywe orwa akabhiri, atakutura okwingira mu-bhukama bhwa Nyamuwanga.”

⁴ Niikodeemu ˆnaabhuusha Yeesu ati, “Omuunu kaatura kutiki okwibhurwa kweki aakokooye? Kaatura okusubha mu-nda ya nyira, amare eebhurwe kweki?”

⁵ Yeesu ˆnaamusubhya ati, “Enikubhwira ekimari ati, omuunu ateebhuuywe na amanji na Mwoyo Omutaakatiifu, atakutura okwingira mu-bhukama bhwa Nyamuwanga.

⁶ Kinu ekiibhurwa na omubhiri, kyone ekibha mubhiri, nawe omwoyo omuyaaya ogwibhurwa okusooka ku-Mwoyo Omutaakatiifu.

⁷ Siga okuruguura kwa okubha naakubhwira ati, ‘Omwendwa mwibhurwe orwa akabhiri.’

⁸ Mwoyo Omutaakatiifu kaasusana na omuyaga, gweki oguyemba nguja enu ogwenda. Owutura okuungwa oruyiriro rwagwo, nawe utakutura okumenya enu ogusooka na enu oguja. Nikwo kutyo gari ku-muunu woonewoone unu eebhuuywe na Mwoyo Omutaakatiifu.”

⁹ Niikodeemu ˆnaabhuusha Yeesu ati, “Amangʼana gayo agatura kutiki okubha-wo?”

¹⁰ Yeesu ˆnaamusubhya ati, “Awe uri mwiyigisha unu uri na ekibharo muno mu-kyaro kya Ijirayeeri, amangʼana gayo utakugamenya?

¹¹ Enikubhwira ekimari ati, rinu kimenyere niryo ekyaika, na rinu ꞉kyarorere niryo ekibhwira abhaanu. Nawe emwe mutakwikirisha ganu ekibhabhwira.

¹² Raabhe naabhabhwira amangʼana ga mu-kyaro anu, nawe emwe mutakugeekirisha. Woori omuuja okwikirisha kutiki nikabhabhwira amangʼana ga mu-rwire?

¹³ Na atariwo muunu woonewoone unu aragendere mu-rwire. Nawe Omwana wa Adaamu niwe ꞉eekire okusooka mu-rwire.

¹⁴ “Rwa kutyo Musa ꞉eemusiishe ekisusano kya ekisoro ku-nsi ya orukungu, nikwo kutyo Omwana wa Adaamu keendwa eemusibhwe,

¹⁵ insonga abhaanu bhoone kutyo bhanu abheekirisha bhabhe na obhurame bhunu bhutakuweera okuturira ku-mwene.”

¹⁶ Nyamuwanga ꞉eendere muno abhaanu bhoone kutyo abha mu-kyaro. Obhwendi bhuyo mbukora ˆnaatuma omwana waaye omumwemwe, insonga omuunu woonewoone unu kaamwikirisha asige okubhura, tari abhe na obhurame bhunu bhutakuweera.

¹⁷ Nyamuwanga ꞉ataatumire Omwana waaye mu-kyaro, ati aramurire abhaanu, tari abhaanu bheerusibhwe okuturira ku-mwene.

¹⁸ Unu keekirisha Omwana wa Nyamuwanga atakuramurirwa. Nawe omuunu unu atakumwikirisha, aamarire okuramurirwa, kwa okubha ateekirisiishe riisiina rya Omwana omumwemwe wa Nyamuwanga.

¹⁹ Na inu niyo indamuro, ati, obhweru bhwijire mu-kyaro, abhaanu mbeenda ekisuute okukira obhweru, kwa okubha ebhikorwa bhyebhwe ni bhibhiibhi.

²⁰ Abhaanu bhoone kutyo bhanu abhakora ebhikorwa ebhibhiibhi, abhabhiiyirirwa obhweru bhuyo. Bhatakwenda okuuja ku-bhweru insonga ebhikorwa bhyebhwe ebhibhiibhi bhyasiga okumenywa.

²¹ Nawe abhaanu bhoone kutyo bhanu abhakora ekimari, abhaaja ku-bhweru, insonga ebhikorwa bhyebhwe bhirorwe ati bhikorerwe okuriingʼaana na kutyo Nyamuwanga keenda.

Yeesu na Yowana Omubhatiisha

²² Mmbe, gayo ꞉geejire gaawa, Yeesu na abheeyigira bhaaye mbeemuka ayo mbagenda ku-nsi ya Ebhuyawudi. ˆNaasaraarira nabho eyo, ˆnaabhatiishaga abhaanu.

²³ Yowana woone ꞉aariga ˆnaabhatiisha abhaanu Ayinooni eyo, ayeeyi na mw-igunguri rya Saarimu, kwa okubha eyo niwe amanji ꞉gaariga gari maafu. Na abhaanu ꞉bhaariga mbagenda ku-Yowana abhabhatiishe.

²⁴ Mu-kabhaga kayo, Yowana ꞉aariga akyari okutuurwa mu-jeera.

²⁵ Rusuku rumwi, abheeyigira bha Yowana mbaamba okubhambashaanya na Omuyawudi wumwi iiguru ya gintungwa gya okwiyesha.

²⁶ Niwe mbagenda ku-Yowana, mbamubhwira ati, “Mwiyigisha, omuunu unu ꞉aariga ari na awe ku-ngego ya oruuji rwa Yorodaani, unu ꞉waakibhwiriiye amangʼana gaaye, Omwene woone kaabhatiisha. Na abhaanu bhoone kutyo abhamuuja-ko!”

²⁷ Yowana ˆnaabhasubhya ati, “Omuunu atakutura okuramira engʼana ryoneryone, raabhe atayaaywe na Nyamuwanga okusooka mu-rwire.

²⁸ Emwe ni emwe ꞉mwoonguuywe nimbabhwira ati ‘Anye nitari Kiriisitu, tari Nyamuwanga ꞉aantumire nitangate, Kiriisitu akyari okuuja.’

²⁹ Omwenga ni wa omugabhusi. Anye niri rwa insendekereja ya omugabhusi, niyambaaye ku-mbarika yaaye, na enijomerwa muno okuungwa riisi ryaye.

³⁰ Mmbe obhujomerwa bhwani bhwakuumira. Eyeendwa Yeesu abhe iiguru, nawe anye nibhe emwaro.”

Amangʼana ga unu asookere mu-rwire

³¹ Unu kaaja okusookerera mu-rwire, ari na obhuturo okukira abhaanu bhoone kutyo. Unu kaasookerera mu-kyaro, obhusimukwa bhwaye ni bhwa mu-kyaro, kaaika amangʼana ga mu-kyaro munu. Nawe unu kaaja okusookerera mu-rwire, ari na obhuturo okukira abhaanu bhoone kutyo.

³² Omwene, ganu ꞉aarorere na okuungwa, nigo kaabhwira abhaanu. Nawe atariwo muunu unu keekirisha amangʼana gaaye.

³³ Omuunu woonewoone unu keekirisha amangʼana gaaye, kaamenyegesha ati Nyamuwanga ni wa kimari,

³⁴ kwa okubha Nyamuwanga ꞉aatumire Yeesu insonga aaike amangʼana gaaye. Nyamuwanga amuyaaye Mwoyo Omutaakatiifu atari na dengo.

³⁵ Ese Mwana eendere Omwana waaye, na amuyaaye obhuturo ku-bhiinu bhyone kutyo.

³⁶ Omuunu woonewoone unu keekirisha Omwana wa Nyamuwanga, kaanyoora obhurame bhunu bhutakuweera. Nawe unu atakumwikirisha, uyo ataribhunyoora, tari Nyamuwanga arigenderera okumubhiiyirirwa.