Yowana 2 - Iimuuma Iinyaaya

Obhwenga mu-musi gwa Kana

¹ Mmbe, orusuku rwa akasatu mbubha-wo obhwenga mu-musi gwa Kana, Gariraaya eyo. Mu-bhwenga bhuyo, nyiramwene Yeesu woone ꞉aariga ariwo.

² Yeesu na abheeyigira bhaaye bhoone ꞉bhaariga bharaarikirwe mu-bhwenga bhuyo.

³ Anu bhagenyi ꞉bhaanyweye iidivaayi niiwa-mo, nyiramwene Yeesu ˆnaamubhwira ati, “Abhagenyi bhaamara-mo iidivaayi yoone kutyo.”

⁴ Yeesu ˆnaamusubhya ati, “Maayi, owunyaagara-koki? Akabhaga kaani kakyari okuyika.”

⁵ Niwe nyiramwene ˆnaabhwira abhaanu bhanu ꞉bhaariga mbagabha iidivaayi ati, “Ryoneryone rinu araabhabhwire, mukore.”

⁶ Mmbe, mu-bhwenga ayo ꞉gaariga gariwo amatuumo gasansabha garoosiibhwe na amagina, garimo amanji. Abhayawudi ꞉bhaariga mbatuura-mo amanji aga okwiyesisha. Na riituumo erimwi ꞉ryariga ndigega muna madumu gataanu aga amanji.

⁷ Yeesu ˆnaabhwira abhaanu bhanu ꞉bhaariga mbagabha iidivaayi ati, “Mwijushe amanji mu-matuumo gayo.” Bhoone mbeejusha amanji mu-matuumo gayo mbeejusha jabhi.

⁸ Kimwi Yeesu ˆnaabhabhwira ati, “Woori, mutaye-ko amanji gayo, musirire omufuuyisha.” Bhoone mbakora kutyo.

⁹ Omufuuyisha uyo ꞉eejire aagarabha, ˆnaanyoora amanji gayo gaayindukire gaabheeye divaayi. Omwene ꞉ataamenyere enu iidivaayi iyo ꞉yaariga isookere, nawe abhagabhi bhayo, bhanu ꞉bhaariga bhatayire amanji mu-matuumo ꞉bhaariga bhamenyere. Niwe omufuuyisha ˆnaabhirikira omugabhusi,

¹⁰ ˆnaamubhwira ati, “Unu kaakora insikukuru kaayaanaga abhagenyi iidivaayi injomu okwamba. Bhakamara okukorwa, niwe ˆnaayaana abhagenyi iidivaayi inu itari njomu. Nawe awe waabhiika iidivaayi injomu okukira eya okwamba, okuyikira woori!”

¹¹ Yeesu ꞉aambire okukora ekimenyegesho, bhunu ꞉aariga ari Kana mu-kyaro kya Gariraaya. Ekimenyegesho kiyo ꞉kyariga kiri ekya okwamba ekya okweresha obhugungyo bhwaye, na abheeyigira bhaaye mbamwikirisha.

¹² Bhunu obhwenga ꞉bhwawooye, Yeesu ˆnaatebhera okuja mu-musi gwa Kaperinawumu bhari amwi na nyiramwene, bhaawaamuwaabho abhatooto, na abheeyigira bhaaye. Mbeekara eyo nsiku ntooto era.

Yeesu kaabhirimya abhasuruja mw-iyekaru rya Nyamuwanga

¹³ Bhunu Ipaasaka ya Abhayawudi ꞉yaariga irebhereeye okuyika, Yeesu ˆnaariinyagisha okuja Yerusareemu.

¹⁴ Mmbe, bhunu ꞉aayikire eyo, ˆneengira mw-ibhanja rya riiyekaru rya Nyamuwanga, ˆnaanyoora-mo abhaanu mbagushaga giingʼombe, giingʼondi na ginguuti gya okusoosisha ebhimweso, na abhandi ꞉bhaariga bheekaaye ku-meeja gyebhwe mbafunjaga giiyera, gya okusoosha omugabho mw-iyekaru.

¹⁵ Bhunu Yeesu ꞉aarorere gayo, ˆnaaruka ekikoto kya ingoye, ˆnaabhirimya abhaanu bhoone kutyo bhanu ꞉bhaariga mbagusha ebhiinu mw-ibhanja rya riiyekaru rya Nyamuwanga. ˆNaabhirimya giingʼondi na giingʼombe. ˆNaagaramura giimeeja gya abhaanu bhanu ꞉bhaariga mbafunja giiyera, giiyera gyebhwe nginyaraganira ansi.

¹⁶ Niwe ˆnaabhwira bhanu ꞉bhaariga mbagusha ginguuti ati, “Musooshe anu ginguuti ginu! Musige okukora iinyumba ya Raata okubha ya kukorera-mo obhusuruja!”

¹⁷ Bhunu abheeyigira bhaaye ꞉bhoonguuywe gayo, mbayiita amangʼana ganu gakaamirwe mu-Makaamo Amataakatiifu ati, “Obhwendi bhwani ku-nyumba yaawo, bhurimmara-wo.”

¹⁸ Bhunu abhatangasha bha Abhayawudi ꞉bhaarorere ganu Yeesu aakora, mbamubhuusha ati, “Woori owukora kimenyegeshoki okukyeresha ati uri na obhuturo obhwa okukora amangʼana gayo?”

¹⁹ Yeesu ˆnaabhasubhya ati, “Mukambure riiyekaru rinu, anye eniija okuryumbaka nsiku esatu era.”

²⁰ Mmbe Abhayawudi mbamusubhya ati, “Riiyekaru rinu ꞉ryoombakirwe myaka makumi gana na sansabha! Awe owutura kutiki okuryumbaka nsiku esatu?”

²¹ Nawe Yeesu ꞉aariga atakwaikira riiyekaru eryene, tari ꞉aariga ˆnaaikira omubhiri gwaye.

²² Akabhaga kanu Yeesu ꞉aasuukire okusooka mu-bhafuuye, abheeyigira bhaaye mbayiita kutyo ꞉aaikire. Abheeyigira bhayo mbeekirisha Amakaamo Amataakatiifu kutyo ꞉gaaikire, na kutyo Yeesu woone ꞉aaikire.

Yeesu kaamenya ganu gari mu-mitima gya abhaanu bhoone kutyo

²³ Bhunu Yeesu ꞉aariga ari Yerusareemu mu-nsikukuru ya Ipaasaka, abhaanu bhaafu mbaamba okumwikirisha, kwa okubha ꞉bhaarorere ebhimenyegesho bhinu ꞉aariga ˆnaakora.

²⁴ Nawe Yeesu ꞉aariga atakwikirisha amangʼana geebhwe, kwa okubha ꞉aariga amenyere kinu ꞉kyariga kiri mu-mitima gyebhwe bhoone kutyo.

²⁵ ꞉Ateendere omuunu woonewoone amubhwire ganu abhaanu abheeganiirisha, kwa okubha ꞉aariga amenyere goone kutyo ganu gari mu-mitima gya abhaanu bhoone kutyo.