Yowana 17 - Iimuuma Iinyaaya

Yeesu kaasabha ku-Nyamuwanga

¹ Bhunu Yeesu ꞉aamarire okwaika amangʼana gayo, ˆnaaragamira mu-rwire, ˆnaasabha ati, “Ee Raata, insa yaayikire. Yeeresha abhaanu obhugungyo bhwa Omwana waawo, insonga Omwana woone eereshe abhaanu obhugungyo bhwawo kutyo bhuri.

² ꞉Waayaaye omwana waawo obhuturo ku-bhaanu bhoone kutyo, insonga iri ati ayaane abhaanu bhanu ꞉waamuyaaye obhurame bhunu bhutakuweera.

³ Bhunu nibhwo obhurame bhunu bhutakuweera, ati abhaanu bhakumenye awe Nyamuwanga wa ekimari unu uri omwene era, bhamenye na Yeesu Kiriisitu, unu ꞉waatumire.

⁴ Anye neeresiishe abhaanu mu-kyaro anu obhugungyo bhwawo, okuturira ku-kukuumisha emirimu ginu ꞉waantumire okukora.

⁵ Woori Raata, enisabha weereshe obhugungyo bhwani, obhugungyo bhunu ꞉naariga niri nabhwo bhunu ꞉naariga niri amwi na awe, ekyaro kikyari okubhumbwa.”

Yeesu kaasabhira abheeyigira bhaaye

⁶ “Ee Raata, abhaanu bhanu ꞉waanaaye okusooka mu-bhaanu bha ekyaro kinu, naabhatuuriiye abhweru kutyo awe wuri. Abhaanu bhanu ꞉bhaariga bhari bhaawo, nuubhaanaana. Bhoone bhagwatiiye Riingʼana ryawo.

⁷ Woori bhaamenyere ati ebhiinu bhyone kutyo bhinu ꞉waanaaye, ꞉bhyasookere ku-awe,

⁸ kwa okubha amangʼana goone kutyo ganu ꞉waambwiriiye, naabhabhwiriiye, na bhoone bhaagaramiiye. Bhaamenyere ekimari ati nisookere ku-awe, na bheekirisiishe ati ni awe ꞉waantumire.

⁹ Bhayo nibho anye enisabhira. Nitakusabhira abhaanu bha mu-kyaro bhoone kutyo, tari enisabhira bhanu ꞉waanaaye, kwa okubha bhayo ni bhaanu bhaawo.

¹⁰ Abhaanu bhoone kutyo bhanu niri nabho ni bhaawo, na abhaanu bhaawo bhoone kutyo ni bhaani. Na abhaanu abhandi bhaamenyere kutyo obhugungyo bhwani bhuri, okuturira ku-bheene.

¹¹ Anye nitakyari mu-kyaro munu kweki, woori eniija ku-awe eyo. Nawe bhanu abhagenderera okubha mu-kyaro munu. Ee Raata Omutaakatiifu, enikusabha ubhaangarire na obhuturo bhwa riisiina ryawo rinu ꞉waanaaye, insonga bhabhe na obhumwi rwa kutyo anye na awe kiri.

¹² Bhunu ꞉naariga niri nabho, naabhaangariraga okuturira ku-bhuturo bhwa riisiina ryawo rinu ꞉waanaaye. ꞉Naabhaangariiye kujomu, nitabhusiishe muunu na wumwi, tari unu ꞉aariga ari wa okubhura, insonga ganu ꞉gaakaamirwe mu-Makaamo Amataakatiifu gakuumire.

¹³ “Ee Raata, woori eniija ku-awe, nawe enibhabhwira gayo goone kutyo nikyari nabho mu-kyaro munu, insonga okujomerwa kwani kukuumire mu-mitima gyebhwe.

¹⁴ Anye nibhabhwiriiye amangʼana ganu ꞉waanaaye. Nawe abhaanu bha mu-kyaro munu abhabhabhiiyirirwa, kwa okubha bhanu bhatari bha mu-kyaro munu, rwa kutyo anye nitari wa mu-kyaro munu.

¹⁵ “Ee Raata, nitakusabha ati ubhasooshe mu-kyaro munu, tari ubheerushe ku-mukayi Sitaani.

¹⁶ Bhanu bhatari bha mu-kyaro munu rwa kutyo anye noone nitari.

¹⁷ Ee Raata, enikusabha ubhakore bhabhe bhataakatiifu okuturira ku-kimari kyawo, kwa okubha riingʼana ryawo niryo ekimari.

¹⁸ Rwa kutyo ꞉waantumire mu-kyaro munu, nikwo kutyo anye noone nibhatumire mu-kyaro.

¹⁹ Eniisoosha anye omwene ku-awe ku-nsonga yeebhwe, insonga abheene bhoone bhabhe ku-kimari kyawo.”

Yeesu kaasabhira na bhanu bharimwikirisha

²⁰ “Nitakusabhira bhayo era, tari enisabhira na bhanu bharinyiikirisha okuturira mu-kuraasha kwebhwe.

²¹ Enibhasabhira ati bhabhe kiinu kimwi, rwa kutyo awe uri mu-mutima gwani, na kutyo anye niri mu-mutima gwawo, abheene bhoone bhabhe mu-mitima gyeswe, insonga abhaanu bha mu-kyaro bheekirishe ati ni awe ꞉waantumire.

²² Obhugungyo bhunu ꞉waanaaye, noone naabhayaana, insonga bhabhe na obhumwi rwa kutyo anye na awe kiri.

²³ Anye niri mu-mitima gyebhwe, awe woone ubhe mu-mutima gwani, insonga bhabhe bhakuumiiye ku-bhumwi. Enisabha kutyo, insonga abhaanu bhoone kutyo abha mu-kyaro, bhamenye ati ni awe ꞉waantumire, na bhamenye ati wendere abhaanu bhanu, rwa kutyo unyendere anye.

²⁴ “Ee Raata, eniranga ati abhaanu bhanu unaaye bhabhe amwi na anye anu niribha, insonga bharore obhugungyo bhwani bhunu ꞉waanaaye, kwa okubha ꞉waanyendere okwambira kara ekyaro kikyari na kubhumbwa.

²⁵ Ee Raata omurengeresi, abhaanu bha mu-kyaro kinu bhatakukumenya. Nawe anye nikumenyere, na abheeyigira bhaani woori bhaamenyere ati ni awe ꞉waantumire.

²⁶ Anye naabheeyigisiishe kutyo uri, na nikyagenderera okukora kutyo, insonga bheendane rwa kutyo unyendere anye, anye noone nibhe mu-mitima gyebhwe.”