Yowana 16 - Iimuuma Iinyaaya

¹ “Naabhabhwira amangʼana gayo, insonga mwasiga okusiga obhwikirisha bhwemwe.

² Abhaanu bharibhabhirimya mu-masunagoogi. Kariyika akabhaga kanu abhaanu bharibheetaga, mbatoga ati abhakorera Nyamuwanga emirimu.

³ Bharibhakorera kutyo, kwa okubha bhatakumenya Raata, na bhatakummenya anye.

⁴ Naabhabhwira gayo, insonga akabhaga kayo kariyika, muyiite ati ꞉naabhabhwiriiye.” “꞉Nitaabhabhwiriiye amangʼana gayo goone kutyo ku-bhwambiro, kwa okubha ꞉naariga niri amwi na emwe.

Emirimu gya Mwoyo Omutaakatiifu

⁵ Nawe woori enigenda ku-Raata unu ꞉aantumire kw-imwe. Atariwo omuunu woonewoone agati weemwe unu kaambuusha ati, ‘Owugenda aaki?’

⁶ Tari woori kwa okubha naabhabhwira gayo, emitima gyemwe gyasurumbara muno.

⁷ “Nawe enibhabhwira ekimari ati, eyibha kujomu kw-imwe ati, anye enigenda ku-Raata. Kwa okubha anye nikasiga okugenda, Omusakisi uyo atakutura okuuja kw-imwe. Nawe nikagenda, eniija okumutuma kw-imwe.

⁸ Bhunu ariija, aryeresha abhaanu bhoone kutyo ati ni bhakayi, aribheeresha obhurengeresi bhwa Nyamuwanga, na kutyo Nyamuwanga ariramurira abhaanu.

⁹ Ku-rubhaara rwa ebhikayo, aribheeresha ati ni bhakayi, kwa okubha bhatakunyiikirisha.

¹⁰ Ku-rubhaara rwa obhurengeresi, kwa okubha anye enigenda ku-Raata, na mutakuuja okundora kweki.

¹¹ Ku-rubhaara rwa indamuro, kwa okubha aaramuriiye Sitaani, omutungi wa ku-kyaro kinu.

¹² “Nikyari na amangʼana maafu aga okubhabhwira, nawe woori mutakutura okusombookerwa.

¹³ Nawe bhunu Mwoyo wa ekimari uyo ariija, aribhatangasha mumenye ekimari kyone kutyo. Ataryaika amangʼana gaaye omwene era, tari aryaika ganu aryungwaga, naabhabhwira na amangʼana ganu gariija.

¹⁴ Mwoyo uyo aringungya, kwa okubha ganu aribhabhwira, garibha ganu asoosiishe ku-anye.

¹⁵ Ebhiinu bhyone kutyo bhinu Raata ari nabhyo ni bhyani. Kyakora enaaika ati, ganu Mwoyo uyo aribhabhwira, garibha ganu asoosiishe ku-anye.”

Insurumbaro iriyinduka okubha rugirigiri

¹⁶ “Kakyari kabhaga katooto mutakuuja okundora, kweki kakyari kabhaga katooto omuuja okundora.”

¹⁷ Mmbe, niwe abheeyigira bhaaye abhandi mbabhuushaanya ati, “Kaaika kiinuki kiyo? Ati, ‘Kakyari kabhaga katooto mutakuuja okundora, kweki kakyari kabhaga katooto omuuja okundora,’ na erindi ati, ‘Kwa okubha anye enigenda ku-Raata?’”

¹⁸ Mmbe, mbagenderera okubhuushaanya ati, “Ni engʼanaki riyo kaaika, ‘Kakyari kabhaga katooto?’ Eswe kitakumenya ganu kaaika.”

¹⁹ Yeesu ˆnaamenya ati ꞉bhaariga mbeenda okumubhuusha ganu ꞉aaikire, niwe ˆnaabhabhuusha ati, “Ganu naaika ati, ‘Kakyari kabhaga katooto mutakuuja okundora, kweki kakyari kabhaga katooto omuuja okundora’ nigo omubhuushaanya?

²⁰ Enibhabhwira ekimari ati, muririra na okusurumbara muno, nawe abhaanu bha ekyaro kinu bheeki bharijomerwa. Murisurumbara, nawe ekisurumbaro kyemwe kiriyinduka nkibha rugirigiri.

²¹ Rwa kutyo omugasi kaarumwa obhusungu bhwa okwibhura, kaasurumbara kwa okubha kaabha ari mu-kabhaga kaaye aka iinyanko. Nawe akamara okwibhura, atakuyiita kweki iinyanko iyo, ku-nsonga ya obhujomerwa bhwa omwana okwibhurwa mu-kyaro.

²² Emwe mwone woori anu musurumbaaye. Nawe eniija okubhasubha-ko kweki, na emitima gyemwe egiija okujomerwa, obhujomerwa bhunu atariwo omuunu unu kaatura okubhusoosha mu-mitima gyemwe.

²³ Na mu-kabhaga kayo, mutarimbuusha engʼana ryoneryone. “Enibhabhwira ekimari ati, mukasabha Raata ryoneryone kw-isiina ryani, aribhayaana.

²⁴ Na woori mukyari okusabha kyonekyone ku-Nyamuwanga, okuturira kw-isiina ryani. Musabhe Nyamuwanga, kaaja okubhayaana, insonga okujomerwa kwemwe kukuumire.”

Omurembe ku-bheeyigira

²⁵ “Naabhabhwirira amangʼana gayo mu-bhirengekanyo. Nawe akabhaga akaaja kanu nitakuuja okuroma na emwe naaikiraga mu-bhirengekanyo kweki, nawe niribhabhwirira abhweru amangʼana ganu agaaikira Raata.

²⁶ Mu-kabhaga kayo, murisabha Raata kw-isiina ryani. Nitakwaika ati anye niribhasabhira ku-Raata.

²⁷ Raata omwene abheendere, kwa okubha emwe munyendere, na mwikirisiishe ati ꞉naasookere ku-mwene.

²⁸ ꞉Naasookere ku-Raata niija mu-kyaro anu, nawe woori eniimuka mu-kyaro anu, nisubhe ku-Raata.”

²⁹ Mmbe, abheeyigira bhaaye mbamubhwira ati, “Woori waamba okwaika na eswe abhweru utaaikiiye mu-bhirengekanyo!

³⁰ Woori kyamenya ati umenyere amangʼana goone kutyo, na utakwenda muunu akubhuushe engʼana ryoneryone. Gayo nigo gaakora kiikirishe ati ꞉waasookere ku-Nyamuwanga.”

³¹ Yeesu ˆnaabhabhuusha ati, “Woori mweekirisha?

³² Mwitegeereshe, akabhaga akaaja, yee, akabhaga kayo kaabheeye-wo, emwe mwone kutyo omuuja okunyaragana munsige anye omwene, mwone kutyo wumwiwumwi ˆnaagenda ewaabho. Nawe anye nitakusigara omwene, kwa okubha Raata ari amwi na anye.

³³ Naabhabhwira gayo insonga mubhe na omurembe mu-mitima gyemwe, kwa okubha muri mu-mutima gwani. Mu-kyaro anu, muri na nyanko nene, nawe mwasiga okufwa emitima kwa okubha anye niyigire ekyaro.”