Yowana 15 - Iimuuma Iinyaaya

Yeesu niwe omujabhiibhu ogwenegwene

¹ Yeesu ˆnaagenderera okubheeyigisha ati, “Ni anye omujabhiibhu ogwenegwene, na Raata niwe omurimi.

² Amasagi goone kutyo ganu gandiko ganu gatakutwasha, Raata kaagatema-ko. Nawe amasagi goone kutyo ganu agatwasha, Raata kaagakongorera insonga gatwashe muno.

³ Emwe okuriingʼaana na riingʼana rinu naabhabhwiriiye mwamarire okukongorwa na muri bheeru mu-mitima.

⁴ Mwikare mu-mutima gwani, anye noone niikare mu-mitima gyemwe. Rwa kutyo riisagi ritakutura okutwasha amatwasho riri eryene era, ritari kw-isina rya omujabhiibhu, nikwo kutyokutyo mwone, muteekaaye mu-mutima gwani, mutakutura okutwasha amatwasho.

⁵ “Ni anye omujabhiibhu, emwe muri masagi. Omuunu unu kaabha mu-mutima gwani, anye noone nimba mu-mutima gwaye, uyo kaatwasha amatwasho maafu, kwa okubha nikasiga okubhasakira, emwe mutakutura okukora engʼana ryoneryone.

⁶ Omuunu woonewoone akarema okumba-ko, keeswa rwa riisagi ˆnaawotoka. Abhaanu abhaaja mbaribhooja, mbaryesa mu-muriro, ndiruungura.

⁷ Emwe mukeekara mu-mutima gwani, na amangʼana gaani ngeekara mu-mitima gyemwe, musabhe engʼana ryoneryone rinu omwenda, omuyaanwa.

⁸ Raabhe mukatwasha amatwasho maafu, omubha muri bheeyigira bhaani abheenebheene, na mukabha kutyo Raata kaagungibhwa.

⁹ Rwa kutyo Raata anyendere anye, nikwo kutyo anye noone nibheendere emwe. Mmbe mwikare mu-bhwendi bhwani.

¹⁰ Mukagwatira ebhiraagiro bhyani, omuuja okugenderera okwikara mu-bhwendi bhwani, rwa kutyo anye ꞉naagwatiiye ebhiraagiro bhya Raata niikara mu-bhwendi bhwaye.

¹¹ “Naabhabhwira gayo insonga obhujomerwa bhwani bhubhe mw-imwe, na obhujomerwa bhwemwe bhukuumire.

¹² Ekiraagiro kyani ni kinu, mwendane, rwa kutyo anye nibheendere.

¹³ Atariwo omuunu unu ari na obhwendi bhunene okukira bhunu, obhwa omuunu okusoosha obhurame bhwaye ku-nsonga ya abhasaani bhaaye.

¹⁴ Omuuja okubha bhasaani bhaani, mukakora ganu enibharagirira.

¹⁵ Nitakubhabhirikira kweki ati bhagaya, kwa okubha omugaya atakumenya kinu esebhugenyi kaakora. Nawe emwe enibhabhirikira bhasaani bhaani, kwa okubha goone kutyo ganu ꞉noonguuywe ku-Raata nibhabhwiriiye.

¹⁶ Emwe ꞉mutaansorere, nawe ni anye ꞉naabhasorere. ꞉Naabhasorere insonga mutwashe amatwasho, na amatwasho gayo gasige okuweesha, insonga mukasabha Raata ryoneryone kw-isiina ryani abhayaane.

¹⁷ Mmbe, enibharagirira emwe ati mwendane.”

Abhaanu bha mu-kyaro kinu abhabhiiyirirwa bhanu bheekirisiishe Yeesu

¹⁸ Yeesu ˆnaagenderera okubheeyigisha ati, “Raabhe abhaanu bha ekyaro kinu bhakabhabhiiyirirwa, mumenye ati bhaambire okumbiiyirirwa bhakyari okubhabhiiyirirwa.

¹⁹ Raabhe mukabheeye bhaanu bha mu-kyaro kinu, bhakabheendere rwa kutyo bheendere abhaanu bheebhwe. Nawe emwe mutari bha mu-kyaro kinu, tari ꞉naabhasorere okusooka mu-kyaro kinu, ku-nsonga iyo, abhaanu bha mu-kyaro kinu abhabhabhiiyirirwa.

²⁰ Muyiite riingʼana rinu ꞉naabhabhwiriiye ati, ‘Omugaya atakutura okubha mukuru okukira esebhugenyi.’ Mmbe, raabhe ꞉bhaanyansiishe, bharibhanyansha emwe mwone. Nawe raabhe ꞉bheekirisiishe ameeyigisho gaani, bhariikirisha na ageemwe.

²¹ Nawe abhaaja okubhakorera amangʼana gayo goone kutyo ku-nsonga ya riisiina ryani, kwa okubha bhatakumenya unu ꞉aantumire.

²² Raabhe nikaremere okuuja okwaika nabho, bhataakabheeye na ebhikayo, nawe woori, bhatakutura okwibhagira ati bhatari na bhikayo.

²³ Omuunu woonewoone unu kaambiiyirirwa anye, okubhiiyirirwa kwaye kuri na ku-Raata.

²⁴ Nikabheeye nitakorere ebhiruguusho bhinene bhinu omuunu owundi akyariga okukora, bhataakabheeye na bhikayo. Nawe woori bhaarorere goone kutyo ganu naakorere, nawe abhambiiyirirwa, na Raata woone abhamubhiiyirirwa.

²⁵ Ganu gabheeye-wo insonga amangʼana ganu gakaamirwe mu-Makaamo Amataakatiifu gakuumire ati, ‘꞉Bhaambiiyiriiywe bhusa.’

²⁶ “Nawe bhunu Omusakisi unu niribhareetera okusooka ku-Raata, Mwoyo Omutaakatiifu owa ekimari, unu kaasooka ku-Raata, omwene aribhabhwira ekimari kyani.

²⁷ Emwe mwone omuuja okubhwira abhaanu amangʼana gaani, kwa okubha muri amwi na anye okusookerera ku-bhwambiro.