Yowana 14 - Iimuuma Iinyaaya

Yeesu ni njira ya okugenda ku-Nyamuwanga

¹ Yeesu ˆnaagenderera okubheeyigisha ˆnaaikaga ati, “Mwasiga okutitibhara mu-mitima gyemwe, omwikirisha Nyamuwanga, munyiikirishe anye noone.

² Ewa Raata bhurimo bhwikaro bhwafu. Ikabheeye itari kutyo, nikabhabhwiriiye. Anye enigenda okubharoosisha owa okwikara.

³ Mmbe nikagenda okubharoosisha owa okwikara, nirisubha nibhagege, insonga anu niribha, emwe mwone mubhe ayoayo.

⁴ Emwe mumenyere injira ya okuyika enu enigenda.”

⁵ Niwe, Tomaaso ˆnaabhuusha Yeesu ati, “Raatabhugenyi, eswe kitakumenya enu owugenda. Ekitura okumenya kutiki injira?”

⁶ Yeesu ˆnaamusubhya ati, “Ni anye injira, ekimari, na obhurame. Atariwo omuunu woonewoone unu kaatura okuuja ku-Raata ataturiiye ku-anye.

⁷ Mukabheeye mummenyere, mukamenyere na Raata. Okwambira woori, mumumenyere, na mwamurorere.”

⁸ Firipo ˆnaamubhwira ati, “Raatabhugenyi, nuukyereshe Raata era, amangʼana gawe.”

⁹ Yeesu ˆnaamusubhya ati, “Niikaaye amwi na emwe nsiku gyone ginu, awe Firipo utakummenya? Unu aandorere, arorere Raata. Mmbe woori, kubhaki owumbwira ati, ‘Nuukyereshe Raata?’

¹⁰ Utakwikirisha ati anye niri mu-mutima gwa Raata, na Raata ari mu-mutima gwani? Amangʼana ganu enibhabhwira nitakwiyaaikira omwene, nawe Raata, unu ari mu-mutima gwani, niwe kaakora emirimu gyaye.

¹¹ Mwikirishe ati niri mu-mutima gwa Raata, na omwene ari mu-mutima gwani. Nawe raabhe mutakwikirisha ganu enaaika, mmbe mwikirishe ku-nsonga ya emirimu ginu enikora.

¹² Enibhabhwira ekimari ati, muunu woonewoone unu kaanyiikirisha, emirimu ginu enikora, omwene woone arigikora. Yee, arikora emirimu eminene okukira giyo, kwa okubha anye enigenda ku-Raata.

¹³ Na mukasabha ryoneryone okuturira kw-isiina ryani, riyo enirikora, insonga obhugungyo bhwa Nyamuwanga bhubhe abhweru okuturira ku-anye.

¹⁴ Mukansabha engʼana ryoneryone kw-isiina ryani, niririkora.”

Yeesu kaaikira obhuuji bhwa Mwoyo Omutaakatiifu

¹⁵ “Mukanyenda, omuuja okugwatira ebhiraagiro bhyani.

¹⁶ Anye noone eniija okusabha Raata, omwene woone kaaja okubhayaana Omusakisi owundi, insonga Omusakisi uyo eekare na emwe kajaanende.

¹⁷ Uyo niwe Mwoyo wa ekimari. Abhaanu bhanu abharema Nyamuwanga bhatakutura okumuramira, kwa okubha bhatakumurora, na bhatakumumenya. Nawe emwe mumumenyere, kwa okubha eekaaye kw-imwe na aribha mu-mitima gyemwe.

¹⁸ “Nitakubhasiga bhataka, tari eniija okuuja kweki kw-imwe.

¹⁹ Kakyariwo kabhaga katooto, abhaanu bha mu-kyaro bhatakuuja kundora kweki, nawe emwe omuuja okundora. Na kwa okubha anye nitari mufuuye, emwe mwone mutakuuja okubha bhafuuye.

²⁰ Orusuku ruyo omuuja okumenya ati anye niri mu-mutima gwa Raata, emwe muri mu-mutima gwani, na anye noone niri mw-imwe.

²¹ Omuunu woonewoone unu amenyere na okugwatira ebhiraagiro bhyani, uyo niwe anyendere. Na omuunu unu anyendere, kaaja okwendwa na Raata. Anye noone eniija okumwenda na niriituura abhweru ku-mwene.”

²² Mmbe, omwiyigira wumwi riisiina ryaye Yuuda, nawe atari Yuuda Esikariyooti, ˆnaabhuusha Yeesu ati, “Raatabhugenyi, eyibha kutiki ati uriituura abhweru kw-iswe, na utakwituura abhweru ku-bhaanu abhandi bhoone kutyo?”

²³ Yeesu ˆnaamusubhya ati, “Omuunu akanyenda, kaagwatira riingʼana ryani. Raata woone kaaja okumwenda, anye na Raata kiriija ku-mwene nkikora obhwikaro bhweswe ku-mwene.

²⁴ Nawe omuunu unu atakunyenda, atakugwatira amangʼana gaani. Na riingʼana rinu omuungwa ku-anye, ritari ryani, tari ni rya Raata unu ꞉aantumire kw-imwe.

²⁵ “Naabhabhwira gayo goone kutyo nikyari amwi na emwe.

²⁶ Nawe Omusakisi uyo, Mwoyo Omutaakatiifu, unu Raata arituma kw-imwe kw-isiina ryani, kaaja okubheeyigisha na okubhayiitya goone kutyo ganu ꞉naariga nimbabhwira.

²⁷ Enibhasigira omurembe, enibhayaana omurembe gwani. Omurembe gunu anye enibhayaana, gutari rwa gunu ekyaro ekibhayaana. Musige okutitibhara mu-mitima gyemwe, na musige okuubhaya.

²⁸ ꞉Mwoonguuywe ganu ꞉naabhabhwiriiye ati, ‘Enigenda, na nirisubha kweki kw-imwe.’ Raabhe kimari mukabheeye munyendere, mukajomeeywe okuungwa ati enigenda ku-Raata, kwa okubha Raata ni omukuru okunkira anye.

²⁹ “Woori naabhabhwira amangʼana gayo gakyari okubha-wo, insonga gakabha-wo, munyiikirishe.

³⁰ Nitakyaika na emwe kweki mangʼana maafu, kwa okubha Sitaani, omutungi wa ekyaro kinu ari ayeeyi okuuja. Nawe atari na bhuturo ku-anye.

³¹ Ganu enikora nigo Raata ꞉aandagiriiye okukora, na enikora kutyo insonga abhaanu bhoone kutyo bhamenye ati nimwendere. “Mwimuke kigende.”