Yowana 12 - Iimuuma Iinyaaya

Maryamu kaayaka Yeesu amafuta

¹ Bhunu ꞉gyariga gisigaaye nsiku sansabha okuyika mu-nsikukuru ya Ipaasaka, Yeesu ˆnaayika kweki Bhetaaniya, mw-igunguri rinu Yeesu ꞉aasuuriiye-mo Raajaaro okusooka mu-bhafuuye.

² Mmbe, abhaanu bheenda ayo mbamukorera obhugenyi. Marita ˆnaareeta ebhyokurya kw-igari. Raajaaro ꞉aariga ari wumwi wa abhaanu bhanu ꞉bhaariga bheekaaye kw-igari amwi na Yeesu.

³ Mmbe, Maryamu ˆnaagega inchupa ya amafuta amarange ga obhugusi bhunene, ˆnaayaka Yeesu ku-maguru, ˆnaamufwafuuta na ginfwiri gyaye. Iinyumba yoone kutyo niiranga ebhirange bhiyo.

⁴ Nawe owumwi wa abheeyigira bhaaye unu ꞉aabhirikirwaga ati Yuuda Esikariyooti, unu kaaja okurya Yeesu injeejemo, ˆnaaika ati,

⁵ “Ndora amafuta gayo gataagusibhwa dinaari magana gasatu, kigabhire abhatobhu?”

⁶ Yuuda okwaika kutyo ꞉aariga atakufwira ekigongo abhatobhu, tari ni kwa okubha ꞉aariga ari mwifi. Omwene niwe ꞉aariga ˆnaagwatirira insawo ya giiyera, ˆneebhaga giiyera ginu ꞉gyatuurwaga mu-nsawo muyo.

⁷ Mmbe, Yeesu ˆnaasubhya Yuuda ati, “Musige okunyansha omugasi unu, kwa okubha aanyaka amafuta ku-nsonga ya orusuku runu bharimbiika.

⁸ Abhatobhu muri nabho nsiku gyone kutyo. Nawe mutakuuja okubha amwi na anye nsiku gyone kutyo.”

Abhatangasha bha Abhayawudi abhaaikana okwita Raajaaro

⁹ Mmbe, abhaanu abhaafu mu-Bhayawudi mboongwa ati Yeesu ꞉aariga ari eyo, mbagenda-yo, itari okumurora omwene era, tari ꞉bhaariga mbeenda okurora na Raajaaro, unu Yeesu ꞉aasuurire okusooka mu-bhafuuye.

¹⁰ Mmbe, abhashengesi abhakuru mbakora ekiina bheete na Raajaaro,

¹¹ kwa okubha ku-nsonga ya Raajaaro, Abhayawudi bhaafu ꞉bhaaremere amangʼana ga abhatangasha bheebhwe, mbeekirisha Yeesu.

Masiya Yeesu keengira Yerusareemu

¹² Mwejo yeende-ko, abhaanu bhaafu bhanu ꞉bhaariga bheejire okurya insikukuru, ꞉bhoonguuywe ati Yeesu ari mu-njira kaaja Yerusareemu.

¹³ Mmbe, mbagega amatabhi, mbasooka Yerusareemu mbagenda okumuramira. Mbaamura obhuraka mbaaika ati, “Wosaana! Ayaaywe giinonkwe unu kaaja kw-isiina rya Raatabhugenyi! Ayaaywe giinonkwe Omukama wa Abhaijirayeeri.”

¹⁴ Mmbe, Yeesu ˆnaanyoora ekimoori kya insikiri, ˆnaariinya-ko rwa kutyo ikaamirwe mu-Makaamo Amataakatiifu ati,

¹⁵ “Emwe abhaanu bha Sayuuni, musige okuubhaya! Muringire, omukama weemwe kaaja, ariinyire ku-kimoori kya insikiri!”

¹⁶ Ku-kabhaga kayo, abheeyigira bha Yeesu ꞉bhataasombookeeywe amangʼana gayo. Nawe bhunu Yeesu asuukire, niwe mbayiita ati Yeesu ꞉aariga akaamiiywe amangʼana gayo, na nigo ꞉bhaamukoreeye.

¹⁷ Abhaanu bhanu ꞉bhaariga bhari na Yeesu bhunu ꞉aabhirikiiye Raajaaro okusooka mu-mbiiyira, ˆnaamusuura, ꞉bhaabhwiriiye abhaanu amangʼana gayo.

¹⁸ Na kwa okubha abhaanu ꞉bhaariga bhoonguuywe amangʼana ati Yeesu ꞉aariga asuurire omuunu, mbagenda bhaanu bhaafu okumuramira.

¹⁹ Mmbe Abhafarisaayo mbaaikana abheene na abheene ati, “Omurora! Kitakutura okukora kyonekyone! Murore, abhaanu bhoone kutyo abhamuseeta.”

Yeesu kaaikira okufwa kwaye

²⁰ ꞉Bhaariga bhariwo abhaanu bhanu bhatari Bhayawudi mu-bhaanu bhanu ꞉bhaariga bhariinyagisiishe okuja Yerusareemu okuramya Nyamuwanga mu-nsikukuru ya Ipaasaka.

²¹ Mmbe, abhaanu bhayo mbagenda ku-Firipo omuunu wa Bheetisayida ya Gariraaya, mbamusabha ati, “Mura, ekyenda kirorane-ko na Yeesu.”

²² Firipo ˆnaagenda okubhwira Ndereya amangʼana gayo, kimwi abhabhiri bhayo mbagenda ku-Yeesu okumubhwira.

²³ Yeesu ˆnaabhasubhya ati, “Akabhaga ka Omwana wa Adaamu aka okugungibhwa kaayikire.

²⁴ Enibhabhwira ekimari ati, imbibho ya ingano ikarema okugwa ansi, ifwe, eyisigara iri kutyokutyo. Tari ikafwa, eyimera niitwasha amatwasho maafu.

²⁵ Omuunu woonewoone akeenda okwiwonʼya, kaasikya obhurame bhwaye, nawe omuunu woonewoone unu atakwigana obhurame bhwaye mu-kyaro anu, uyo kaaja okubhuwonʼya, insonga bhubhe bhwa kajaanende.

²⁶ Omuunu woonewoone akaankorera emirimu, eyeendwa anseete. Na woonewoone anu enibha, ayo niwe omujuuma waani aribha. Na omuunu akaankorera emirimu, Raata arimuyaana ekibharo.

²⁷ “Woori omwoyo gwani gwatitibhara, naaikeki? Naaike ati ‘Raata, enikusabha unyeerushe mu-kabhaga ka iinyanko kanu?’ Wuri, nitakutura okusabha kutyo, kwa okubha niijire ku-kyaro anu, insonga ninyoore ebhinyansho bhiyo.

²⁸ Ee Raata Nyamuwanga, nuugungye riisiina ryawo.” Mmbe, riisi ndyaika okusooka mu-rwire ati, “Ee Omwana waani, naarigungya, na eniija okugenderera okurigungya.”

²⁹ Riisangi rya abhaanu bhanu ꞉bhaariga bhayambaaye ayo, bhunu ꞉bhoonguuywe riisi okusooka mu-rwire, abhandi ꞉bhaaikire ati, gyabha-wo njumo, abhandi mbaaika ati, maraayika wa Nyamuwanga aaika nawe.

³⁰ Nawe Yeesu ˆnaabhwira abhaanu bhayo ati, “Riingʼana rinu mwoongwa ritari rya okunsakira anye, tari ryaikwa okubhasakira emwe.

³¹ Woori indamuro ya ekyaro kinu ꞉yaayikire, Sitaani, na uyo niwe omutungi wa ekyaro kinu, kaaja okweswa asooke mu-kyaro.

³² Bhunu niriimusibhwa iiguru, nirifuta abhaanu bhoone kutyo bhaaje ku-anye.”

³³ Yeesu ꞉aaikire kutyo, okweresha ati ni rufuki runu arifwa.

³⁴ Mmbe, riisangi rya abhaanu ndimusubhya ati, “Ekisoma mu-Makaamo Amataakatiifu ati, Kiriisitu arirama kajaanende. Mmbe, kubhaki owaaika ati Omwana wa Adaamu ariimusibhwa iiguru? Angu, Omwana wa Adaamu unu, ni niga?”

³⁵ Yeesu ˆnaabhabhwira ati, “Obhweru bhukyari amwi na emwe kabhaga kafuyi era. Mugenderere okuribhata mu-kabhaga kanu muri mu-bhweru bhuyo, ekisuute kyasiga okubhayiga. Omuunu unu kaaribhata mu-kisuute, atakumenya enu kaagenda.

³⁶ Woori emwe mu-kabhaga kanu muri mu-bhweru, mutuure obhwikirisha bhwemwe ku-bhweru bhuyo, insonga mubhe bhaana bha obhweru.” Bhunu Yeesu ꞉aamarire okwaika amangʼana gayo, ˆneemuka ayo, ˆnaagenda okwiyibhisa areera-wo.

Abhayawudi abhaafu abharema okwikirisha Yeesu

³⁷ Raabhé kutyo Yeesu ꞉aakorere ebhiruguusho bhyafu mbamuroraga, ꞉bhataamwikirisiishe.

³⁸ ꞉Gaabheeye kutyo, insonga amangʼana ga omuragi Isaaya gakuumire ati, “Raatabhugenyi Nyamuwanga, ni niga unu ꞉eekirisiishe amangʼana geeswe? Na Raatabhugenyi ꞉eeresiishe niga amanaga gaaye?”

³⁹ ꞉Bhataamwikirisiishe kwa okubha Nyamuwanga ꞉aaikire okuturira ku-muragi Isaaya ati,

⁴⁰ “Awofusiishe ameeso geebhwe, ˆnaakora emitima gyebhwe gibhe mikomeeye, bhaasiga kurora na ameeso geebhwe, bhaasiga okusombookerwa mu-mitima gyebhwe, insonga bhaasiga okuuyindukira nibhawonʼye.”

⁴¹ Isaaya okwaika amangʼana gayo, ni kwa okubha ꞉aariga arorere obhugungyo bhwa Yeesu, ku-nsonga iyo ˆnaaikira amangʼana ga Yeesu.

⁴² Nawe mu-bhatangasha bha Abhayawudi, ꞉bhaariga bharimo bhaafu bhanu ꞉bheekirishaga Yeesu, nawe ku-nsonga ya okuubhaya Abhafarisaayo ati abhaaja okubhabhirimya mw-isunagoogi, ꞉bhaariga bhatakwaikira abhweru.

⁴³ Abhatangasha bhayo ꞉bhaariga bheendere muno okugungibhwa na abhaanu, okukira okugungibhwa na Nyamuwanga.

Abhaanu bhariramurirwa okuriingʼaana na amangʼana ga Yeesu

⁴⁴ Mmbe, Yeesu ˆnaamura obhuraka ˆnaaika ati, “Omuunu unu kaanyiikirisha anye, atakwikirisha anye era, tari keekirisha unu ꞉aantumire.

⁴⁵ Unu kaandingira anye, kaaringira unu ꞉aantumire.

⁴⁶ Anye niijire mu-kyaro anu, nibhe obhweru bhwa ekyaro, insonga abhaanu bhoone kutyo bhanu abhanyiikirisha bhasige okubha mu-kisuute.

⁴⁷ “Na omuunu woonewoone akoongwa amangʼana gaani, ˆnaarema okugagwatira, anye nitakumuramurira, kwa okubha niteejire mu-kyaro anu okuramurira abhaanu, tari niijire okubheerusha.

⁴⁸ Omuunu woonewoone unu kaandema, unu atakwikirisha amangʼana gaani, ari na unu arimuramurira. Riingʼana rinu enaaika niryo ririmuramurira ku-rusuku rwa obhuteero.

⁴⁹ Enaaika kutyo, kwa okubha anye nitakwiyaaikira anye omwene era, tari Raata unu ꞉aantumire, niwe andagiriiye aga okwaika na injira ya okugaaika.

⁵⁰ Na nimenyere ati kinu kaaragirira, ekiyaana abhaanu obhurame bhunu bhutakuweera. Mmbe ganu enaaika, enaaika rwa kutyo Raata andagiriiye okwaika.”